| «‹ September 2026 ›» | | S | M | T | W | T | F | S | | | 1 | 2 | 3 | 4 | 5 | | 6 | 7 | 8 | 9 | 10 | 11 | 12 | | 13 | 14 | 15 | 16 | 17 | 18 | 19 | | 20 | 21 | 22 | 23 | 24 | 25 | 26 | | 27 | 28 | 29 | 30 | |
|
| 幾得德國菜@Schnee German Restaurant |
分類: 飲飲食食 |
根據非正式及科學化統計, 對食德國菜既慾望, 通常都係半年內梗會產生, 今晚就黎到呢間有波睇既德國餐廳開餐
水吧位設置大電視, 播放著精彩球賽, 岩晒一班球迷係度飲野睇波, 內裏佈置成德國feel, 又唔會以為自己去左Bar!
餐牌上有頭盤, 熱湯, 主菜及甜品供應, 散叫/二人晚餐各式其色, 今晚試下散叫, 確保每樣都係自己想食既
先黎頭盤希靈魚柳伴紅菜頭青蘋果他他 ($128), 賣相精緻, 一口一件, 帶點咸味又口感爽脆既希靈魚柳, 伴以紅菜頭青蘋果粒, 味道酸酸, 三者既結合, 無論口感或味道都豐富起來
跟住分別點左兩款熱湯, 黎到德國餐廳, 當然要試下呢款德國經典薯仔湯 ($58), 果然好香濃薯仔味, 似飲緊液體版既薯蓉, 薯不簡單; 另一款係傳統匈牙利熱燉牛肉湯 ($58), 開初飲有少少辣味, 可能材料有紅椒, 其他材料包括薯仔粒及牛肉粒, 感覺有D似飲緊羅宋湯但走酸版, 隨湯附送麵包一片, 飲完湯都已飽了不少!
黎食德國菜, 好大程度都係沖住呢款招牌脆皮燒德國咸豬肘伴酸椰菜烤燒薯角 ($198)而黎, 上枱時已經聞到好香燒肉味, 相機先食完後, 侍應就會幫忙起肉, 好貼心既服務; 豬肘燒得皮脆肉嫩, 食皮時會聽到"咔喳"聲, 肉味道又唔會過咸, 點少少傳統醬或芥辣, 滋味滿分, 飲啖德國清啤 ($68), 真係大杯酒, 大塊肉! CHEERS...............
估唔到係呢度都有得食Risotto, 呢款露荀牛肝菌忌廉汁意大利飯 ($198), 份量夠多又夠晒熱辣辣, 每一粒意大利飯都索滿忌廉汁, 煮得夠腍身又入味; 飯中配以牛肝菌粒, 入口食到好香菌味, 清清地無肉都唔錯!
由頭盤熱湯開始食到主菜, 無理由唔食埋個甜品架?! 呢款傳統德國蘋果卷伴雲呢拿汁 ($88)又點睇呢? 由於即叫即焗, 需要點時間等待, 一客兩件既酥皮蘋果卷, 外脆酥皮內面係以蘋果做餡, 配以少少提子乾, 好"外國甜品" feel; 蘋果餡味道帶酸, 配以香甜既雲呢拿汁就岩岩好!
埋單九百幾元, 年青侍應服務態度幾好, 反應又快, 不失為享用德國菜既好地方!
Schnee German Restaurant : 銅鑼灣駱克道447-449號中威商業大廈1樓
contact me : [email protected]
|
2017 年 3 月 2 日 星期四  |
| 值得支持@The Staff |
分類: 飲飲食食 |
對於一D開設在小街內, 嘗試在離晒地既租金中找尋自己一片天既餐廳, 都有一種特別既情意結, 心想應該對於烹飪有熱誠, 中伏既機會率都應該低D!
室內環境走簡約路線, 令人感覺舒服
餐牌主要供應套餐, 散叫, 飲品及甜品, 各種選擇數目唔講得話好多, 但望落都幾吸引, 價錢仲幾親民
晚飯時間到, 一於叫個SET DINNER試下, 頭盤五選二，我地二人只需諗唔要邊一樣就ＯＫ啦。。。。哈！
主廚濃湯(蕃茄湯)配麵包, 食落好香蕃茄味, 仲食到佢既籽, 將麵包條點落湯到食仲滋味!
巴馬火腿配希臘沙律, 賣相幾吸引, 頂上放了一片巴馬火腿, 食落唔太咸帶少少油潤感, 沙律菜伴以黑醋汁一齊食, 口感夠晒清新!
藏紅花茴香柚子魷魚沙律, 食到好香魷魚味, 質感柔軟, 其餘既沙律菜就爽脆可口!
金銀魔鬼蛋配煙三文魚, 以皮蛋咸蛋加菠菜伴以蛋黃醬撈均再釀入烚好既鷄蛋內, 豪氣D將半隻蛋放晒入口, 滿滿既饀料填滿我既口腔, 食到香滑既口感, 半隻份量作為頭盤就岩岩好, 當然唔好忘記仲有片煙三文魚, 下次可以試下包住一齊食, 睇下會唔會仲好味D先?!
係5款主菜中點左全月早餐, 係全月並唔係全日, 食物相當豐富, 包括茄汁豆, 炒白菌, 昆布蘭腸, 牛仔腸, 黑松露炒蛋, 窩夫, 蕃茄, 煙肉, 沙律菜, 煙三文魚, 賣相都幾靚仔, 以木板奉上, 最欣賞佢既煙肉, 夠晒香脆, 唔係求其煎一煎比你就算數; 但對於佢既炒蛋就幾失望, 食落嚡口, 就算加左黑松露都係咁話!
另一樣主菜係野菌汁蝴蝶春鷄配甘荀牛油飯, 所謂既蝴蝶春鷄即係開邊斬, 望落靚仔D又方便食客用餐, 幾唔錯呀, 而春鷄燒得皮香肉滑, 味道唔會太濃, 點少少野菌汁食都幾好味, 要挑剔既係個醬汁係凍既, 煮返熱會好D囉; 另外個牛油飯係食到香濃牛油味既但又唔太油膩, 幾特別亦好岩胃口呀!
包埋甜品 : 我投了焦糖燉蛋一票, 甜脆既焦糖面配以香滑燉蛋, 雙重口感, 教我如何不愛它; 友人就投左佢果票比草莓奶凍, 原因係香濃奶味加夠滑身, 當然佢自己係草莓FANS都係加分理由之一!
加$25可轉特飲, 呢杯就係冰雪奇緣 (Frozen), 係熱情果加蘋果Smooththie, 好大杯飲落好香蘋果味, 又香又甜又夠凍; 加$10轉飲LATTE, 夠晒大杯, 沖得幾岩口味, 抵加錢!
散叫食物點左呢款芝士焗薯條配意式黑醋汁 ($45), 身為芝士控既我, 每次見到芝士+薯條都唔會放過, 薯條先炸然後放上芝士加黑醋汁再焗, 上枱時已聞到芝士香味, 食落口有薯條既香脆感, 繼而有芝士香味, 黑醋既酸甜味中和左兩者既膩感, 所以..............................咁既份量我地都食得晒!
全店免收加一, 真係相當抵食, 食物水準唔錯, 侍應服務夠細心又主動, 不時幫你加水及清理枱面, 呢D就係喜歡幫襯小店既理由!
|
| 進擊肉食類@西餐大排檔 |
分類: 飲飲食食 |
之前食過呢度既二人套餐, 友人對佢念念不忘, 相隔幾個月後再次重臨, 打開升降機門就見到呢個咁吸睛既門面, 霓紅燈招牌加上兩個大花牌, 認真搞鬼!
雖然佢既二人餐性價比相當高, 但都想試下其他菜式, 今晚一於散叫, 打開餐牌由沙律頭盤, 湯類, 海鮮類, 家禽類, 肉類, 意粉焗粉到甜品都包括埋, 勁齊全!
就由呢款水牛芝士及田園沙律配香草車尼茄汁(二人用/$168)開始先, 賣相幾吸引人, 份量亦足夠二人享用, 香軟煙韌既水牛芝士, "浸"入係香草車尼茄汁, 味道酸酸甜甜好醒胃, 亦可減低水牛芝士既膩感, 再有爽脆既沙律菜, 有多種層次, 配搭得唔錯!
今次終終食到呢隻每日限量供應既艾迪乳鴿 ($98), 係呢度既皇牌菜式, 侍應透露呢款BB鴿係預備左6-7小時比佢入味, 再用慢炸方式, 更能保持佢既肉汁, 一咬真係FEEL到D肉汁係口內爆發, D肉好夠味道, 果然係皇牌呀!
上湯啦....................一望到呢碗蟹肉黑松露磨菇湯 ($88), 不期然想講: 究竟係飲湯定食蟹肉呀? 廚師不計成本咁係咁落蟹肉, 啖湯首先係飲到濃郁磨菇味, 再加上有磨菇粒, 幾有口感; 之後再食埋蟹肉, 味道幾鮮甜, 估唔到兩者都夾得埋喎!
主菜有燒原隻法國春鷄 ($188), 話明係春鷄, 唔會太大隻但食落先知係好夠, 肉質嫩滑, 點少少汁食幾滋味, 最欣賞佢燒到個鷄皮香脆口又無脂肪, 食左都唔會有罪惡感
香燒澳洲羊T骨 ($198), 一客有三件羊T骨, 點了五成熟, 切開仍然見到紅色, 食落肉質算嫩口, 羊肉味都幾濃; 喜歡羊既朋友應該會滿意
最後點埋呢個好多人食過都推介既無骨黑毛豬扒焗飯 ($148), 選用既係Iberico黑毛豬, 厚切成條狀, 配以茄汁去焗, 賣相同口感都似食緊牛.......哈....咬落會感到有D油係口腔內爆發, 酸甜茄汁味醬汁會中和肉既肥膩感, 配埋炒飯食果然好好, 啖啖肉無需吐骨, 爽呀!
WOW......今餐乳鴿, 鷄, 羊, 豬都食齊, 肉食組萬歲! 值得一提係呢度既侍應招呼週到, 主動加水及換碟, 比個讚!
西餐大排檔: 銅鑼灣渣甸街50號渣甸中心7樓
contact me : [email protected] |
| 芝(滋)味無窮@米走鶪 Deluxe |
分類: 飲飲食食 |
我對芝士既鍾愛程度可謂有加無減, 之前係太子食過佢既芝士鷄煲令我念念不忘, 得知香港區有間Deluxe版, 放工後當然要去會一會佢啦!
一出升降機就見到門牌指示, 非常易搵!
皮梳化椅, 坐得幾舒服, 唔會太迫
餐紙上列出超多火鍋配料, 鷄煲有火燄麻辣/黃金之士選擇, 亦有"人氣之選"及"芝士配搭" 推介!
黃金芝士鷄煲 (小/$158), 身為芝士控的我, 每次黎到呢度都必叫既, 大量洋䓤及芫茜墊底, 芝士好快就被熱熔變成醬汁, 包住嫩滑鷄件, 份量岩岩好夠2人食, 唔會好膩, 食完仲可以叫侍應加清湯再繼續火鍋!
火鍋中牛肉之選已經由肥牛轉去食牛頸脊, 呢碟手切新鮮牛頸脊 (小/$208), 小既份量都唔算少喎, 肉色相當鮮艷吸引, 放入湯內烚10秒, 一片肉味濃質感滑既牛頸脊已落入我口裏!
白鱔片 ($88), 雪白既魚肉被切成薄片, 果真適合用作火鍋食材, 烚完又唔會變到好細片, 食落味道幾鮮甜!
花枝片 ($88), 厚薄度適中, 薄身之餘食起上黎都會有D口感, 偏淡味中但食到佢既原味!
呢款由侍應推介既黑松露蟹子魚面 ($138), 好耐都無食過唧魚面, 好玩又好味, 有墨魚粒係裏面, 食落彈牙有咬口, 食時再點少少黑松露蟹子, 鮮味倍增, 果然無介紹錯!
欣賞佢呢到蔬菜及菌類有全/份供應, 夠晒彈性, 呢款娃娃菜 (半份/$22), 半份2個人食都好夠, 鮮甜既娃娃菜烚完有芝士湯香味, 仿佛食緊輕量版既"奶油津白"; 而呢碟竹笙 ($42), 用黎索湯食就一流, 食落爽口無怪味, 推介呀!
佢呢既飲品選擇都唔少, 凍檸茶沖得幾好飲, 不禁飲完再叫多杯; 侍應服務態度良好, 反應夠快; 抽氣系統都做得幾好, 食完件衫都唔會好大陣火鍋味!
米走鷄Deluxe : 銅鑼灣渣甸中心三樓
contact me : [email protected]
|
| 2017 年 2 月 17 日 星期五 |
| 回春肌膚好品 (最終回)@Domohorn Wrinkle |
分類: 美容 |
每日同Domohorn Wrinkle接觸既日子, 不知不覺間原來已經有四個月, 對於Domohorn Wrinkle既初認識, 緣自可免費登記索取試用裝, 從佢地既電視廣告宣傳, 知道佢地產品目標是透過增強肌膚的自我修復能力，預防皺紋和老人斑。心諗............都岩自己用喎!
估唔到幾年後能夠獲邀參加呢個為期四個月既試用計劃, 亦因為呢個試用計劃, 令我加深左對品牌既認識! 欣賞佢地既產品絕不使用合成香料及人造色素。 取而代之的是天然成分。產品經過嚴格的製造過程管理，從原材料的混合至產品包裝都一絲不苟。全部產品由日本生產, 空運到香港都好方便快捷, 如果發現有任何問題, 都會有專人跟進, 咁貼心既售後服務, 當然LIKE啦!
產品由早到晚都照顧到, 開初都擔心咁多支, 自己會否有恆心支支都會用, 亦怕會對皮膚做成負擔, 但用落就知道呢D擔心係多餘既! 產品質地潤而不膩, 全面做到鎖水, 修護及補水功效; 日日Keep住用, 自己係會睇到皮膚質素係逐漸提昇緊, 例如減淡暗黃膚色, 回復應有光澤; 皮膚底層得到滋潤而令毛孔粗大問題亦有所改善, 望落去個人都有年輕感及醒神!
Domohorn Wrinkle每項產品之間能互相產生相乘作用，因此最理想係能夠全線產品同時間使用, 而且跟住包裝上既號碼次序用, 使用在皮膚上發揮最大功效, 繼而提升隨年齡增長而衰退的自我回復喚醒肌膚潛藏的力量。開初跟佢地使用說明書所講既使用/塗搽方法都覺有少少不便, 例如洗面要洗2次, 但試過之後會發現皮膚真的比以前乾淨左; 搽乳液時用雙手包圍住面部, 原來咁樣做係會令皮膚更加吸收乳液! 哈.........人地有圖片顯示點樣用, 確係有道理既! 塗搽份量, 手勢, 可搽既部位一一講解清楚比你知, 照跟足就包無錯啦!
日本產品向來質數有保證, 由潔面, 卸妝, 保濕, 修護, 鎖水, 防曬都照顧到, 只要跟足應有程序, 就可以有效改善皮膚問題, 我得, 你都得~
Domohorn Wrinkle : www.domohornwrinkle.com
產品由品牌提供, 內容為個人感受/分享
contact me : [email protected]
|
« | 37 | 38 | 39 | 40 | 41 | 42 | 43 | 44 | 45 | 46 | ... | 147 | »
|
