嘩~原來我咁多日無打過日誌嗱！真係抵打，不過就算之前有打網誌又如何......
咪又係多數唔開心嘅事
不過今日就有啲唔同。Sorry唔係今日，應該係尋日先至啱，
事關已經過咗凌晨十二點嘞【即 2009年11月26日】呢日係阿B出世咁耐到今日佢都打
過咁多次疫苗今次都係第二次喊！今次仲要比上次喊得仲勁個樣仲好可憐，而且加埋
一對好《悽涼》眼神就已經知道佢喺到等緊人去“鍚”同“呵”如果唔襯依家多人錫
等幾時呀！不過我諗阿B佢應該都有小小驚，可能再加埋佢都幾眼瞓；所以咪......
唉~個個小朋友都係咁架啦─眼瞓時特別扭；病咗時又係特別扭。不過今次返《健康
院》打疫苗都有開心事；相信除咗我...阿B都一樣覺得開心，因為當我帶阿B入房見
姑娘時，阿B就已經自動自覺同人Say Hi！阿B仲喺姑娘面前成日做洗手個動作，姑娘
一見到就好快咁同阿B講「係喎，好叻女噃^^識得點樣洗手手呀？」阿B一聽到就扮哂
怕羞咁將個頭仔倚喺心口，但係阿B佢係一路都笑笑口架，而且仲同姑娘講咗好多嘢，
姑娘仲話阿B有啲發音得唔係咁好，但都算幾叻喇^^。見完姑娘之後阿B佢仲自己識認
得返條路仔行返出大堂搵返嫲嫲、婆婆，我就行佢後面睇實佢。返咁多次健康院都未
試過聽姑娘讚過阿B一次，但今日終於都聽到喇，真係聽到我好開心^^
