今日好唔開心,應該話唔開心咗幾日先啱,不過一路都無搵朋友傾,

  唔知係自己唔想煩到人定係咩原因,發覺唔知由幾時開始就算自己有

  幾唔開心都盡可能唔會搵朋友傾講,甚至連身邊嗰個都唔會傾講,自己

  都鬱埋咗好多日,我知道如果我再唔舒緩(發)一吓自己嘅心情同情緒

  一定唔駛幾耐我又發神經都似啦,今日原本應該開心先啱,因為今晚係

  同老豆補番餐生日飯,開頭仲諗住帶埋阿B一齊去,不過後來都係決定

  唔帶,一來得我自己一個出去,二來又要逼巴士,所以到最後都係無帶,

  基仔今晚要開夜,所以去唔到食飯,當我坐緊巴士出旺角途中,我突然

  喺到諗今晚餐飯一定好難捱,其實我都唔知點解會咁諗,點知喺我落車

  無幾耐之後電話就嚮係二哥打嚟,佢問我係咪無同老豆講今晚訂咗枱

  食飯,我話唔係呀,老豆知今晚同佢食飯架,但點知原來老豆返咗上大陸

  咁二哥話過咗去富臨先啦,咁我咪上咗去先,姑姐.黑佬同家姐早就到咗,

  我上到去時,家姐同老豆講緊電話,我連坐都未坐定,家姐就好似審犯咁

  審我,問我幾時打過俾老豆,仲有點樣講,之後可能老豆叫我聽啦,家姐

  就咁放部電話喺我側邊,示意叫我聽,但佢一路都無開過聲,呢個都唔係

  問題,個問題係點解要咁對我,完全講到好似係我唔啱咁,但姑姐佢都開

  聲話老弄係知架,但家姐依然唔放過我,之後老豆仲喺電話到同我講咗聲

  "唔好意思"老豆唔會咗我嗰日講嘅嘢,佢仲話知我乖,有佢心,我聽完之後

  忍唔住喊,但我唔想老豆聽到我喊,所以一路都只係"唔"唔"聲咁應佢,喺

  呢刻我好唔開心,點解老豆要同我講"唔好意思"佢又無錯,點解因為家姐

  一個人嘅問題而攪到咁,同老豆收咗線之後,我同家姐一路都無講過嘢,直

  到二哥嚟到,我先開始講嘢,不過一定唔係家姐先,成晚都無同佢講過嘢,就

  連二哥都想發脾氣,不過同我一樣無發到,食飽之後埋完單我問二哥幾錢,我

  諗住夾返俾佢,但二哥就叫我一陣先,之後唔知隔咗幾耐,家姐先問埋咗幾錢,

  之後行到落樓下,以經唔見家姐嘅蹤影啦,佢要發脾氣行咁快先都阻佢唔到

  各有各走後,我就一邊行一邊諗,點解家姐會咁對我?究竟係咪我之前做過啲

  咩事而令到佢咁耐以嚟都要咁對我,唔計之前佢要我幫佢做嘅事,但我都無做

  過啲咩事而激嬲佢吖,點解對個個都無嘢亦可以算係好,但唯獨係對我就明顯

  係唔好,亦可以話係好唔鍾意我嗰隻,究竟點解,我都係佢個妹吖,為乜要咁憎

  我,我又無害過佢,返到屋企之後我基仔問我食飯食成點,咁咪照同佢講囉,就

  連講返出嚟我啲眼淚都"把把聲"係咁流,真係喊得好悽涼,唔知以為俾人打,基

  仔聽完我講之後都係嗰句囉,咪叫我唔駛理佢地,唔好咁在意囉,但基仔佢根本

  都唔明我個心諗乜同為乜嘢會喊得咁犀利,不過算啦,佢唔明係正常嘅,但我都

  無再刻意去解釋,自己知咪算囉,其實我喊得咁悽涼係因為我個心好痛,我對屋

  企人好並唔係想要得到啲咩回報,純粹係想佢地開心,話哂佢地都係我家人,我

  喊咗都唔係好耐啫,一個鐘都無,轉頭就無哂事,返到屋企之後其實我好想SEND

  SMS俾老豆,我好想同佢講我同家姐嘅問題,好想問吓老豆知唔知點解家姐會咁

  對我.不過我都係諗吓,無咁做到,因為我相信就算問咗都無結果,明知無結果嘅

  何必去做吖,無謂俾多個煩惱人嘛, 

         <<唔知我嘅唔開心要到幾時先唔會再嚟>>