今朝早我同媽咪仲有阿B一齊過天水圍睇屋，因為今日髹埋油就攪掂嘞，咁咪諗住過去
睇吓間屋，順便俾埋啲尾數叔叔囉，上到去望見間屋我好開心，因為都尚算OK，事關我要求
唔算高，但求整整齊齊咁我就可以嘞，睇完屋之後，我地就落商場食嘢，過得天水圍緊係打個
電話俾NIKO睇吓佢同莊媽落唔落嚟一齊食嘢，咁啱我打俾NIKO時，佢原來已經開始預備整食，
佢望見係我打俾佢就諗•••『我唔係咁啱叫佢落去食嘢呱？』點知原來真係咁啱，唔怪得知
佢一聽電話就聽到佢笑啦，佢唔講我仲以為佢做乜笑得咁開心？我開頭聽到佢咁講仲以為佢唔
落，點不知我今次估錯咗•••佢竟然會話倒返啲湯出嚟先跟住就會落嚟，其實識佢咁耐都極小
會見到佢整緊食都寧願唔整住反而落街食，唔知係咪佢真係好掛住阿B？所以先會肯咁做呢，如
果係真嘅•••《我會好開心》因為我知道有個朋友咁鍚我個女【阿B】我又點會唔開心先得架
，開頭我同媽咪以為莊媽都一齊落，點知當阿恩 =“NIKO”到咗之後先知原來莊媽唔落，咁唯
有我地幾個食啦！食飽之後我等緊俾錢時阿恩突然開聲同阿B講話去買糖糖，我即刻『Say No！』
因為阿B仲咳緊，所以叫佢唔好買糖糖；俾完錢之後大慨估到阿恩會帶阿B去邊到買嘢食，就直接
行去搵佢地，阿恩真係無買糖，不過就買咗有朱古力面嘅百力滋俾佢，唉~真係俾佢激死，呢頭話
佢咳轉頭就買朱古力俾佢，但我無講啲咩俾阿恩聽，事關我覺得佢都係因為鍚所以先帶阿B食，
阿B又發生多一件令我又驚又喜嘅事，話說我地行返莊媽屋企途中經過商場中心啲擺擋，其中
一擋係賣《話梅》之類嘅食，人地已經將啲嘢食用戶透明膠蓋面，但阿B佢竟然伸手入去攞人啲嘢
食，我一見到就緊係將佢隻手攞返出嚟啦，仲拍咗佢隻手仔一、兩下，佢無喊不特止仲發我脾氣甩
開我隻手，話多佢兩句就連啋都唔啋我，但我相信阿B佢係知道自己錯乜，因為我拍完佢隻手之後，
佢連哇都無哇過一聲，我同阿B講啲嘢食係姨姨嘅，唔可以隨便自己用手去攞，佢聽完之後就開始
無咁硬頸，我話走啦，拖住媽咪啦，佢聽到之後就即刻拖住我隻手嘞，咁都總算佢明小小我講乜俾
佢知都仲有返啲“安慰”•起碼佢知道錯之後就無再甩開我隻手，仲肯拖實我。
§〝 記得有人同我講過 〞§
•••世事難，完美；
只能靠，“自己”•••
