又有好幾日無打過Blog啦，星期一〈15號〉嗰日我地去咗荃灣睇傢俬，因為嗰日基仔

  放假，所以先有時間同我地一齊去睇，不過睇咗好耐我都睇唔啱啲乜，唯一睇得啱嘅咪一

  張Look架床囉！事關啱哂阿B同阿媽瞓嘛，下床又係雙人，側邊又有櫃仔可以擺嘢，咁遲吓

  阿B大個咗讀書都可以放吓嘢，幾好呀！阿媽連衣櫃都睇埋啦，係我同基仔間房仲未睇啱之

  嘛，不過我地唔緊要啦，就算無床就咁瞓床祳都得嘅，最緊要係一大一細啫，其實間屋都攪

  得八八九九啦，我諗11月中左右應該可以搬得入去，搬咗入去之後又可以同阿B一齊住嘞，

  到時佢又可以時不時見到契婆、契媽啦開心死佢啦，不過我都開心嘅，因為我終於都可以有

  間屬於自己嘅屋企【家】呢樣我想咗好耐，唔知到我擁有咗之後又會變成點呢••••••

       對上個禮拜我好開心，因為我報讀再培訓嗰到面試Pass咗，不過到最後都係無讀到個課

  程，事關讀完個課程之後佢會介紹工俾我，大多數要返12個鐘，但如果唔做份工遲啲再報讀課

  程嘅時候，佢地會大多數唔收，所以我先無去讀！不過唔緊要啦，報住電腦先囉，學多樣嘢都

  好，遲吓有用嘛，不過都好起碼我都仲覺得自己有小小用。

                 

     今日我同媽咪仲有阿B荃灣睇燈，開頭諗住出開去順便搵奶奶飲下午茶，等佢見吓個孫嘛，但

  點知咁啱佢上咗阿哥到，唯有下次先啦，同媽咪行咗好幾間隔埋價，係得一間OK咋，不過好在

  包送、包裝啫，咁計起嚟都幾抵，今日仲睇到盞感應燈二佰幾蚊，等基仔聽日出去睇多次OK嘅就

  會買埋，今日連油簡埋啦幾好。

     唔知點解今日見到個女有啲感觸，見到佢越嚟越大個有啲唔識形容嘅感覺，可能見佢開始乜都

  識同知啦，仲開始識扮嘢，仲識睇人尾頭眼額呀，真係俾佢激死•••

                  『終於都有屬於自己嘅屋企啦』

                     

     今日陪阿媽、阿姨、姨丈仲有位嬸嬸佢地去咗一個專放《骨灰》嘅地方，阿姨佢仲話呢到要

  有律師先可以買或者共十一個月，唔睇唔知原來《骨灰位》都有分好多唔同嘅價錢，最高就最平

  就連坐咩方位都有唔同嘅價錢，真係不得了囉！連個位曬唔曬到太陽都有唔同，不過嗰到個環境

  真係唔錯，仲“背山面海”不過個海係用“口井”嚟代替，總之整體嚟講都唔錯，如果我有能力

  我諗我都會選返個位俾自己，誇張D嚟講可以話同《退休生活》差唔多，不過唔知阿媽佢想選邊

  到，因為之前佢原來同阿姨已經睇咗一個地方，但佢地諗住睇多個先再做決定，咁阿媽佢又想同

  阿姨、姨丈佢地一齊起碼無咁悶嘛，咁又係•••自己一個係會悶D而且周圍嘅《朋友》又唔識

  有個親人喺身邊係唔同D嘅，不過見到阿媽咁快搵定《骨灰位》個心情硬係唔知點咁，自己都知

  自己係諗多咗，但都好怕呢一日到，亦唔想有呢一日發生••••••

     今日基仔唔駛開夜，諗住佢會早小小返，但我係估錯咗囉！4點幾收工佢就成9點幾先返到，

  雖然小工開咗，心情係無咁好，但平時已經小見啦！咁今晚唔駛開夜，點解唔可以早小小返嚟陪

  吓我喎！不過算啦~我都慣啦！我發覺我嘅忍耐力大咗小小，以前問親佢嘢佢唔答我我就會發癲，

  但依家我問多幾次佢仲要慢多幾拍先應，我都可以無發脾氣，而且仲要笑笑口咁對住佢，雖然係

  咁，但佢都唔會覺得我有改過，因為喺佢心目中我都係一個仲有好多嘢要改好嘅人，相反我要佢

  改嘅，就連五樣都未有三樣做到，我諗今晚應該唔會好似上次咁等到好夜呱！上次就差唔多零晨

  4點幾先等到佢返，今晚應該唔會啦，又無人生日又無其他••••『等•••寂寞到夜深！』