今日同咗阿媽仲有阿B一齊過天水圍，我地食飽嘢先行返上樓，點知
行行吓我發現阿B對腳行得好似好唔自然，我咪睇吓係唔係有沙入咗鞋啦
，唔係；再以為佢入面絛貼身褲整到佢唔舒服，幫佢抆返好條褲腳之後佢
都依然行得好唔舒服咁，後來諗諗吓•••我估應該係佢對鞋仔開始頂指
嘞，所以先令到佢行得咁唔舒服，於是我就決定拖埋笪地等阿B瞓埋個晏
覺先去市中心買鞋，睇到阿B個樣已經知佢攰需要瞓晏覺，開頭我問阿B：
『媽咪抱妳瞓好唔好？』佢仲話『好！』原先都好地地伏喺我膊頭到想瞓
想瞓咁，但後尾當我一行埋床想同佢一齊攤喺床到瞓時佢就即刻唔肯，仲
好似好驚咁攬到我實唔肯瞓落床，咁我咪諗住抱住佢瞓囉！但過多一陣佢
又要搵返婆婆氹，可能阿B仲未慣新環境啦，所以先會有咁嘅反應，咁又
係 . . .佢仲咁細，無理由一下子咁快就適應到新地方嘅。既然阿B喺到
都瞓唔著，我就索性快快手拖完地就即刻過埋市中心同阿B買埋對鞋仔，
順便睇埋啲電視機平唔平有無得做分期。去到市中心間〈Dr•Kong〉見到
有對款都幾好，而且係鮮黃色打破以前一向嘅粉紅色，但可惜無阿B個碼
咁咪唯有睇過另一款囉，之後就選咗對類似杏色嘅款，開頭諗住就咁等媽
咪揹住阿B瞓，而我就輕輕力咁幫阿B試鞋，點知到最後阿B都係醒咗，反
正佢都醒咗咯咪直頭放埋阿B落地試真啲對鞋仲好，點知一放佢落地佢第
句就話『車車』因為〈Dr•Kong〉隔離就係啲入錢會陏嘅車，所以佢就係
咁望住因為佢好想坐，之後我同阿B講：『等媽咪買埋對鞋仔俾妳先同妳
過去坐車車，好唔好？』佢好似真係聽得明我講咩咁答我好，之後佢仲好
乖咁坐定定喺到等，當同佢著好對鞋之後就叫佢行埋去鏡鏡到睇吓靚唔靚
，阿B行到埋鏡前企咗一陣，跟住就左照一照，右照一照真係似模似樣架，
照完之後佢自己仲微微笑咗一笑，我估佢呢個微笑應該係因為鍾意呢對鞋
所以先由心慢慢咁笑出嚟，今次都係第一次見到阿B呢個笑容，唔知道幾時
會可以再見到阿B呢個笑容？真係好靚、好靚。
