今日我終於都可以打到一號嘅日誌，近排真係好忙完全係忙到連開電
腦都無，1/4 嗰日我同基仔帶咗阿 B去《海洋公園》，嗰日我好早就起咗
身可能心情緊張啦，所以攪到成晚都瞓吓醒吓，好似怕會瞓得晏過頭咁，
因為除咗我地【三人行】之外另外仲有另一組【三人行】就係阿明、車厘
同埋馬巧兒，其實今次有得去《海洋公園》都係多得阿明咋如果唔係因為
佢牛一我都唔知要同阿 B等幾耐先可以等到爸爸同我地去呀！大慨九點鐘
我地就出門口去食早餐先再搭車去金鐘轉車，事關我地唔會玩機動遊戲，
所以唔駛咁早去到都夠時間行哂我地想去睇嘅地方，大慨十一點幾十二點
我地就到咗《海洋公園》門口，但阿明佢地仲未到所以我地就入場行住先
，如果唔係怕阿 B會等等吓瞓著覺，搭車去緊嗰陣叫佢瞓陣又唔肯今朝又
早起身，唉─真係俾阿 B激死！入到去嗰刻阿 B好開心咁喺“嘩！靚靚”
側邊行過嘅路人 A、路人 B都望住阿 B笑，其實由呢一刻起阿 B已經眼瞓
但佢見到咁多新奇事又點會肯去瞓吖！入到去行唔夠五分鐘就已經聽到面
有表演我呢啲死唔蝕嘅緊係行快兩步睇吓咩嚟先啦，點知原來啱啱做完，
唯有行埋一邊望吓張地圖睇吓我地附近有咩劇場或者有啲咩動物睇啦，根
住我地再睇埋其他劇場嘅表演時間再作安排，第一站最近原來係睇我啲同
伴尢爸爸話我好似佢地架就係《熊貓館》嘞；淨係識食同瞓囉！『乜我真
係咁嘅咩？』 其實都唔知已經有幾多年無去過《海洋公園》好多地方都
唔同哂位置；以前《熊貓館》邊有咁近個入口架，而且喺《熊貓館》入門
口之前又有個玻璃隔住入面有條唔覺會郁嘅噩魚睇吓！當我地預備入《熊
貓館》之前基仔突然抱起阿 B同佢講話入到去唔准大嗌叫佢記住乖乖地唔
好咁大聲嚇親啲熊貓，見到基仔咁唔知點解我覺得有小小好笑，可能我覺
得阿 B仲細佢根本未必完全聽得明全部意思，但每次爸爸都係咁真係兩父
女一擔擔^^行到入去發覺個距離比以前近咗好多，而且仲多咗一隻好似狸
貓嘅狸貓做鄰居，今次亦係阿 B第一次見到熊貓當爸爸抱起佢睇時，佢個
樣好似喺到諗緊呢隻究竟係咩嚟動物，於是我就同佢講：『阿 B呢隻係熊
貓。』佢聽完我講之後就好快咁話『貓貓』我再同佢講『唔係貓貓，係熊
貓』之後佢先跟我講『熊貓』咁啱嗰陣隻熊貓喺到開緊餐，阿 B好快就話
『熊貓食Mum Mum』我同基仔一齊笑起嚟，行到訌唔多近出口有隻人扮嘅
熊貓企咗喺到好似迪士尼咁同人影相，好彩嗰日問咗二哥借部相機啫，如
果唔係咪無相睇，我地行完阿明佢地先到咁我地咪諗住行出去同佢地會合
囉，點知途經間買紀念品同公仔嘅商店阿 B見到隻會郁嘅公仔熊貓唔肯走
，最攪笑係我同佢講：『阿 B馬巧兒到咗啦』佢一聽完就即刻一邊嗌馬巧
兒一邊走去搵，基仔同我都係咁笑阿 B佢第一次聽我咁講就即刻叫，仲要
成日叫人全名，以前都叫人姐姐但依家知道人地個名就係咁叫人住名俾佢
笑死。
今次打住《海洋公園》一日遊上集，有時間先再打埋下集
