今日一早就起咗身，因為尋晚應承咗幫契婆車阿茄落元朗睇醫生，
所以咪再早啲起身順便同阿媽佢地一齊飲埋茶囉，飲完茶之後我就返屋
企等阿媽佢地返睇吓今日爸爸今日會同阿 B去邊到行街街，返到嚟先知
原來阿媽佢自己有節目嘞，於是我就同阿 B瞓醒晏覺先再同爸爸睇吓點
點！大慨五點幾六點我地三人先出門口，起初爸爸諗住同阿 B去吉之島
行街順便去埋冒險樂園，但好唔好彩我地搵唔到位泊車，諗住改地方落
元朗啦，但又唔肯定間冒險樂園執咗未，於是爸爸就叫我打俾二哥睇吓
佢喺邊順便車埋啲煙俾佢，二哥原來去咗西貢燒野食，跟住我地就三人
行出發去搵二哥嘞，過到去西貢都已經差唔多成七點半啦，因為我同爸
爸都怕阿 B熱氣得滯所以就去咗買盒飯俾佢食，呢玩阿 B佢玩得好開心
，雖然開頭佢係唔多點出聲，但之後就唔係啦，佢同B 女都玩得不知幾
開心，因為二哥帶埋 B女架車仔去咁阿 B見到緊係要坐啦，佢見到舅父
(二哥)推住妹妹(B 女)架車玩得咁開心緊係心思思又想行埋去玩埋一份
啦，咁我話等妹妹玩完先到佢玩，點知二哥好快就叫咗B 女起身俾咗阿
B坐，跟住B 女就走架車仔後面學佢老豆咁推阿 B向前，開頭都推得唔
係好快，點知推推吓就越推越起勁，見到阿 B都坐咗兩轉咯咁就要換轉
到 B女坐吓嘛，阿 B聽到我叫佢起身俾妹妹坐，佢不但無唔願起身，而
且一落咗車就係咁叫妹妹坐吖、坐吖咁叫 B女坐，睇見佢咁都算幾好吖
，起碼唔會覊住自己玩唔俾人玩嘛，佢兩個輪流玩都不知玩得幾開心，
過咗一陣我發覺阿 B佢推車時係開心過佢坐喺到俾 B女推嘅時候，因為
我見佢推緊 B女嗰陣時係笑得開心過坐車車嗰陣，真係俾佢激死！佢兩
隻貪玩怪都玩咗好一陣子嘞，再加上嗰時已經都成十點幾啦，阿 B佢亦
開始眼瞓，B 女唔駛講都一樣係啦，我地都叫呢兩個百厭星唔好玩啦，
要休息陣啦，但兩隻嘢都仲想繼續玩，於是二哥就抱住 B女拍佢瞓，而
我就抱住阿 B唱歌氹佢瞓同等佢唔好扭計，爸爸見到阿 B開始好眼瞓就
問不如返屋企好唔好？問心吖，其實我就真係唔係咁想走先！事關我好
耐無同自己親人咁去玩嘞，雖然呢晚唔係話好多人，但都有成五、六人
吖，『姑姊、二哥，二嫂，小 B同 B女同埋再加埋我地三人行呢，咁都
算係好幾個啦！但見到阿 B佢個樣咁攰，無理由為咗我自己嘅開心而去
令到個女去辛苦架，所以到最後我都係決定返屋企同阿 B瞓覺豬，上車
之前我同爸爸都話阿 B今晚一定好好瞓，佢咁樣勞動完《走來走去》唔
攰就奇啦，點知開車無耐阿 B佢好快就瞓著咗跟住就到我嘞，返到屋企
就算大聲啲啲講嘢阿 B佢都一樣咁瞓，比起平時佢好大機會就會醒醒地
，相信阿 B佢今晚肯定好小機會會醒•••^^
『好耐無試過同自己親人去燒野食啦，所以今晚好開心^^』
