今日係大年初一亦係一個情人節，就係因為呢個原因，所以我先可以實現到一個
差唔多有六年幾柒年嘅希望，一個每年都會應承陪我去行花市，但係又年年都無同我
行嘅人咪就係基仔囉！每次都話行但每次都反口！記得有年差啲為咗行花市而吵大鑊
，好彩最後都只係一小吵咋，如果吵大鑊的話個後果我都唔敢想像•••今年佢終於
都有同我行啦，真係好開心呀！起初見到佢好似好攰咁咪同佢講話如果佢攰就瞓啦，
我自己同阿恩行都得，但佢又話唔係攰，於是我同基仔出完大角咀剪完頭髮就打俾阿
恩睇吓佢會大慨幾點鐘開始行，點知佢同佢男朋友出咗市中心行街，咁我同基仔咪返
天水圍等佢地返去屋企放低啲戰利品之後先再去行花市，大慨等到十二點幾一點，阿
恩就打嚟話食埋支煙先出門口，咁食支煙應該好快啫都唔掙在嗰陣啦，點知道一食就
食咗好幾個字都唔見電話嚮！我就諗•••佢食嗰支係咪唔係煙而係食雪茄呀，可以
咁耐嘅？基仔叫我打俾阿恩睇吓佢地行得未？原來佢地行咗過嘉湖嗰邊睇吓有無啲未
關門執平嘢，於是我地就準備著褸行得，我同阿恩佢地約咗喺元朗東頭邨個花市門口
等，因為基仔佢揸車，而且佢地有六個人所以唔夠坐就先到先等啦，後來我同基仔過
到去阿恩所講嘅朗屏後面，但我基仔一啲都唔覺得嗰到似花市？咁我咪打多次去問清
楚究竟係邊個位置，原來唔係朗屏後面而係東頭邨嗰邊先啱，就係咁我地就遲到咗，
可能阿恩見等得耐啦！於是就打俾我話佢地行住先，雖然我就到啫！但無理由要咁多
個等我同基仔兩個嘛！唯有只可以話好啦！當我地行到過去花市打俾阿恩睇吓佢地行
到邊個位置再會合時，佢竟然話入面好多人，佢地都係慢慢咁推緊入去，起初我同基
仔諗住去撞佢地睇吓撞唔撞得到•••點知原來入面真係多人到企喺到陏都陏唔到，
雖然係好逼好辛苦，但我同基仔兩個都竟然無發脾氣，真係好難得•••後來我地見
咁多人應該都好難會撞到阿恩佢地，於是我地就一齊決定各有各行住先，唉！即係一
切隨緣啦！就係咁我同基仔就行埋一邊先，睇吓邊行有想買嘅嘢先好行入去，如果唔
係就有排逼囉，開頭諗住買返條大香蕉，睇咗好耐只見一檔有，但佢一開價就係$148
之後隔咗好一陣子諗住再去睇吓會唔會平小小，但點知道個價不但無減反而仲加高咗
個價變咗做$168嘩！我一聽到就即刻同基仔講唔要啦，佢地都痴痴地架越叫越高，去
睇另外好過！之後都有睇啱嘢嘅但因為個價問題所以到最後就乜都買唔到，淨係買咗
一個勁大風車同一盤水仙就走嘞。
唔知係咪因為買唔到嘢俾我所以我地時基仔佢就帶咗我去最鍾意嘅石磨坊食糖水
只係咁簡單我都已經開心到不得了，一齊咗六至八年咁耐佢今次都係第一次同我行花
市，所以我真係好開心•••希望下年會再行啦！
