今日我好忙呀！一早起身同媽咪，阿B 食完早餐就要帶阿B 去睇幼兒園，之前都有問過
基仔俾唔俾阿B 讀N 1，但佢話唔駛住咁我咪無搵囉，點知佢早排問我點解唔同阿B搵學校，
聽到之後我咪同佢講係佢之前話唔駛我先無搵到，依家先走嚟話我好唔搵學校！後來我問佢
係唔係想俾阿B 讀N1，如果係我咪搵囉，就係咁所以之前幾日就睇咗好幾間就覺得一間稍為
好啲，而且個校長又話可以帶阿B 上去學校睇吓先，咁我見今日都有時間咪帶咗佢上去睇吓
先囉，上到去一出電梯咁啱有家長接小朋友所以有位MISS企咗喺到，阿B 一見到有人就好大
聲咁“HI”咗聲，個MISS見到就笑住咁同阿B “Say hi”真係俾阿B 笑死，後來位校長行到
出嚟再次咁帶我同媽咪仲有阿B 再次參觀間幼稚園，阿B 行到第一間課室時就已經想行入去
睇吓有咩玩啦，我同佢講話唔得架，有哥哥姐姐上緊堂唔可以走入去，之後佢就企喺門口望
入去，一邊行位校長就一邊講解間學校啲嘢，行到走廊盡頭係洗手間，阿B 一聽到就話要洗
手，真係攪攪震無幫襯呀！最後介紹到天台個遊樂場，上到去阿B 就怕怕醜醜咁想行埋去同
啲哥哥姐姐一齊玩，但又唔係咁敢！之後阿B 見到埋邊有好多小朋友喺到踩緊三輪車就急急
腳咁走埋去，有個小朋友好乖咁起咗身讓俾阿B 玩，但呢一架唔係三輪車，而係教小朋友點
運用腳力嘅私家車，阿B 坐上去發現駕車唔陏就即刻望住我意思係想我幫佢整陏駕車，因為
佢唔知班小朋友其實係用腳行駕車先會陏，跟住我咪叫阿B 行再幫佢推前駕車幾步佢就開始
知道原來係要用腳先會陏，但佢同以前啱啱坐學行車一樣都係入後波先，玩唔夠五分鐘佢就
起身唔玩，可能佢覺得唔好玩啦，跟住再走去隔離玩搖搖馬，無幾耐我地就行返落去，再問
清楚啲細節就走嘞，我問阿B 返學好唔好，佢話好•••不過講真吖問佢咩佢都話好嘅，之
後我地就返咗屋企瞓晏覺準備今晚同老豆佢地食飯，到咗夜晚差唔多六點半左右我打俾二哥
睇吓大慨幾點喺銀座邊到等，之後我仲叫佢不如過嚟接埋我先一齊去啦，之後我地一齊去到
，等咗好一陣老豆先到，大哥就最遲！餐晚飯好彩家姐無去咋，如果唔係我邊有得咁易捱，
每次有家姐嘅飯局我都一定好難捱！唔知點解呢？
