今日要同個女返健康院所以好早就起咗身，原本佢應該係到三歲先再

返去檢查，但因為我發覺阿 B其中有一隻眼係唔太正，有啲人話係因為佢

其中一隻眼比較用力去睇嘢，所以就令到另外一隻會咁；但為咗安全又安

心起見就緊係去健康院俾醫生睇吓啦！免得第時大個隻眼有咩問題咁點算

而且有啲如果唔一早睇好隻眼就會有好大機會會醫唔返好•••

    大慨九點兩就出到荃灣，仲同阿媽、阿 B去大家樂食埋早餐先去健康

院見姑娘，當我地預備走時行到差唔多到門口阿 B佢唔小心跌倒落地，阿

媽見到就想行過去扶起佢之際我好快咁話唔准扶佢要佢自己企返起身，嗰

陣時阿 B根本就係喺到扮緊嘢想撒嬌佢根本就一啲都唔痛，因為佢仲仍然

趴喺地陏都唔陏等我地抱，如果佢真係跌到痛就一定唔會係咁，之後佢係

咁望住婆婆睇吓有人救佢，根住我就同阿 B講叫佢唔駛望啦無人會扶佢除

咗佢自己起身，見佢依然都係唔陏咪再用另一方法令佢起身就係話佢再唔

自己起身呢一陣俾小朋友醜佢囉，佢聽到之後都無即時起身，佢諗咗一陣

就好慢好慢咁起身，真係俾佢激死我•••去到健康院登記完之後先知今

次唔係喺地下見姑娘而係上一樓，上到去見到好小人小人到不得了，喺我

前面就祗有一個小朋友；而我地就係第二個排隊原本我諗住起碼都要攪到

晏晝點幾鐘！但點知快到不得了，當到阿 B入去見姑娘時，不知幾大擔就

咁自己行入去先，完全無回頭望吓我有無同佢一齊行！個姑娘同佢講早晨

佢又唔俾反應人又唔太理會人，今次見完個姑娘之後先至知道阿 B有無需

要見醫生，如果有先再約下次個期見，個姑娘同阿 B佢玩咗陣再留意咗佢

好一陣，就叫我拎埋張針咭落去約期，一約就約咗下星期二再見醫生，攪

到我有啲驚驚地同緊張！

    好失敗呀！到依家都仲未打到個『海洋公園』下集真係無鬼用嘞！隔

咗咁耐自己都開始唔太記得咁清楚啦，唉─仲諗住記低阿 B嘅一啲開心回

憶；點知原來自己失憶••••••

    尋日係『母親節』喺前一晚我已經問定媽咪第朝去唔去飲早茶，出奇

意外地佢話唔去咁我咪諗住瞓晏啲囉！但到咗夜晚阿恩打嚟問我星期日朝

一唔一齊同埋佢阿媽飲早茶，既然我媽咪都話唔駛我陪佢飲早茶咁就緊係

連阿恩嗰邊都唔去啦，幾大都瞓返晏啲先起身啦，呢排實在幾攰吓！雖然

『母親節』無陪阿媽飲早茶佢可能會有小小唔開心！但佢點都諗唔到我會

喺晏晝俾個驚喜佢，相信呢個驚喜都會令媽咪幾開心，而且仲可能會係咁

多年『母親節』裡面呢個係算最溫馨嘅一個『母親節』因為今年我打咗電

話俾二哥問佢同唔同阿媽飲茶或者食飯，就係咁所以今年多埋二哥一家三

口同阿媽一齊過『母親節』嘞，飲完茶之後預大多數阿媽都會上姑姐屋企

開枱，我知道基仔唔多唔小都有啲唔係咁想上去，事關我地兩個都唔打嘅

咁基仔佢怕悶所以先唔係咁想啫，後來諗諗吓既然都出開嚟觀塘區倒不如

去埋駱駝漆嗰邊睇波鞋好多開倉價，於是我地同阿媽、阿 B上到去坐咗陣

我地兩個就出門口去行街街嘞，講真吖！我都唔知有幾耐無同過基仔兩個

人咁去行街拍拖，就連早排一連三幾日無見過佢呀，每次我瞓著佢都未返

到朝早佢起身返工時間我又未起身，就係咁所以一連幾日無見過，雖然到

最後都係乜都買唔到，但都已經好開心 ^v^因為終於都有時間俾我地拍吓

拖嘛！

    今個『母親節』都過得唔算差吖，最起碼咁多年都無見過二哥同阿媽

一齊過嘅，今年俾呢個驚喜阿媽，唔知佢有幾開心呢？