今日返晏，十一點幾就起咗身喇！因為低能仔話今日同我買電話…
今日落街等佢嘅時候，行過報紙檔見到有佢想買嗰本雜誌，我竟然好似發現新大陸咁，好開心咁即時俾錢。。。等緊佢嘅同時，我坐咗響到睇嗰本雜誌，我終於明白究竟有咩咁吸引佢喇！因為連我都俾本書吸引住。。。
今日我哋響灣仔食完嘢，就去咗銅鑼灣買電話，今次部電話終於都係佢選擇，佢check，同佢同我去買喇！以後佢都唔會再話我買電子產品唔同佢去買喇，嘻嘻。。。等緊部電話嘅時候，我哋都好靜，每次咁樣我都會好唔知點，特別係今日嘅我！其實我知自己發燒，我今日成日個頭都好痛，兼且個身好熱。。。今日嘅我真係特別憫，仲要部電話啲嘢過極都仲係差緊啲！結果又係我搞到大家都唔開心，唉！！！！
走嘅時候大家都再冇講嘢，我同佢講我想自己行吓，其實我唔係想發皮氣，我只係唔想每次都俾佢見到我流眼淚，我唔想佢會覺得煩同討厭，我好怕有一日佢會講出口，我陣係想可以俾自己留返少少尊嚴，等自己可以好過一啲！我知道佢一直跟住我，而我亦冇理佢，陣係不停抖大氣咁行去靚仔醫生到。。。醫生話我好燒，而且氣管亦開始有啲細菌感染，可能因為尋晚淋過雨先搞到咁，所以今日仲燒得高咗，打針同抗生素都冇得選擇，一定要食！！！睇完醫生我已經覺得好攰，見到佢佢又唔出聲，我發佢皮氣叫佢走，今次係第一次。。。講完之後，其實我已經好後悔，但我拎轉頭佢已經走咗喇！係我趕咗佢走。。。我竟然將我最愛嘅人趕走咗。。。對唔住！
返到鋪頭已經好忙，我望住電話佢都冇揾過我。。。我只能 send句對唔住俾佢！今晚佢嚟咗接我，起初大家都冇嘢架！但我食咗藥真係好攰，我一直都吽吽哋。。。眼見我又唔出聲，而佢又黑面，仲開始覺得佢討厭我時，我忍唔住問佢我又做錯啲乜？？我忍唔住再一次響佢面前流眼淚。。。其實想講我真係好唔舒服！
分類: 我們的生活點滴 |
