今日都係要返工，返埋聽日就可以抖吓喇。。。自從整親隻手之後，做嘢真係好唔方便，兼且真係好痛😞但我都撐住繼續做，因為只有繼續做，先可以揾多啲錢，加上包薪只係包到23号，我只能接多啲工先可以維持到生活∼

今晚收工之後，我響灣仔等啲人，我哋食完嘢就去咗行360，之後就返屋企，其實唔好話佢，連我都好攰好攰。。。聽晚啲人話早啲收工陪我，希望可以早啲見到啲人啦∼ 

 尋晚隻手個傷口一路瞓一路痛。。。今朝起身洗傷口嘅時候，個傷口仲有血流出嚟😢兼且開始有啲發炎同發燒，我食咗粒退燒藥之後，就出門口返工∼

今晚收工之後，啲人就帶我去西環一田，因為我哋要去濕平呀😍啲人同我食完嘢，我哋就去瘋狂買嘢，我由得啲人任買，個傻佬係咁問我佢有冇份？其實點會冇佢份？我叫得佢帶我去，就係諗住同佢一齊買，就好似響日本咁∼有人開心到傻，兼且仲滿載而歸添∼因為大部份都係佢架囉😂

濕平完我哋都已經好攰∼一齊搭車返屋企。。。其實佢話佢好多晚都冇瞓，我係好擔心佢，除咗唔知佢係咪身体有事？又唔知佢搞乜搞到唔瞓覺？低能仔，你知嘛我真係擔心你，有時見你唔揾我，但又唔係瞓咗，我真係唔知點架！

今日都係返早，因為姐姐放大假嘅關係，我返到去見未有客，就整定啲檸檬水俾啲客，不過我就好唔小心切到隻手，其實一切到嗰一刻我唔覺得痛，陣係不停流血，因為切到成忽肉出嚟，我仲好淡定咁問同事拎膠布，點知我兩個同事仲緊張過我，仲幫手止血，嗰一刻我真係開始感覺到好痛😭主管返到嚟知道之後，見我仲未止到血，仲去買止血散同消毒嘅嘢俾我，我嗰一刻覺得好窩心，加上個個同事都好錫我，定時幫我消毒又幫我同客按肩頸，講真一句，遇到呢班同事邊會捨得走∼不過今晚返到屋企拆膠布時，原本癡住傷口嗰忽肉，唔單止冇埋口，仲要甩埋出嚟😭仲痛過今朝整親嘅時候🤕

收工之後啲人已經響樓下等我，我梗係爭取時間嗲啲人，我係咁樹起隻手指叫痛，啲人就帶我去買嘢食氹我，之後同我食麥當奴換鬆馳熊😍又同我行咗一陣∼不過其實我已經有啲攰，同隻手又真係好痛。。。佢就同我搭車返屋企！其實我真係好鍾意嗲佢，好鍾意佢著緊我嗰種感覺∼

話咁快兩日假又冇咗，一諗到聽日又要返去對住主管，我就開始頭痛∼唔緊要，我只要努力做好自己就得，我相信我做得到！

今日我同啲人去街，我好期待，因為我好少紅色假期會同啲人一齊放假，加上我尋日又冇見過啲人，所以我更加掛住佢，更加想同佢開開心心咁過一日！

出到旺角我哋去咗食日本嘢，我扮返咗日本咁。。。不過啲人唔係好受落，我陣係想同佢開開心心！食完嘢陪佢交收完，我哋就去行街，但其實我有啲唔開心，因為今日佢基本上機不離手，兼且冇乜理過我同我講嘢😞我唔想咁樣。。。每一次咁我都覺得好難受，我唔想搞到好似自己去街，自己食飯，自己搭車咁😔😔😔因為咁樣會令我哋越行越遠，感情越嚟越淡！加上每次咁我都會更大壓力，返工係咁，拍拖又係咁。。。我仲可以點？ 或者佢根本就習慣自己一個！

今日都係要返工，不過好在返晏，可以瞓得晏一啲，呢幾日真係攰到冇朋友，尋晚一瞓落床就瞓著咗喇！

返到公司已經開始有嘢做，又係忙到收工，連食飯時間都冇，個人又餓又暈。。。其實我鍾意返工有食飯時間，因為可以抖一抖，個人冇咁攰∼今日真係勁辛苦，做完嘢已經成八點半，但我收九點半，唯有問主管可唔可以早一個鐘走當Lunch ，我真係好肚餓同胃痛，雖然最後可以早啲走，但就有說話聽，其實嗰一刻有啲嬲，因為我真係做嘢做到咁晏，連亦唔係專登收咁早囉！算啦。。。唔諗咁多，始終我相信只要我用個心去對人好，人哋自然都會對返我好！比啲心機做番自己嘢啦！

收工之後，我就落銅鑼灣等啲人，啲人放咗咁多日假冇咁早收工，但我已經餓到去偷食咗啲嘢先，到啲人收工我哋就去食麥記，平時一個包都夠飽嘅我，今晚都食咗好多薯條，仲食蘋果批同麥旋風，好似好耐都冇餓到食咁多嘢😂食完嘢同啲人買埋濕紙巾我哋就返屋企∼呢幾日我都好鍾意嗲啲人同攬到啲人好實，因為當返完一日工，個人好攰好攰嘅時候，只有佢先可以令我放鬆一啲，其實我壓力好大😞