今日年初五，亦係我們的57個月，原本應該開工大吉，不過起身嘅時候，隻左耳仍然好痛，同埋仲好燒，結果就請假去咗睇醫生！

睇完醫生啲人打電話俾我，原來佢今日放假架！但返到公司先知囉！就係咁我哋多咗一日二人世界，不過夜晚我要去食婆婆生日飯，所以啲人就自己一個！

今晚食完飯就返咗嚟揾啲人，啲人陪咗我一陣我就返屋企喇！其實我食咗啲藥仲係好眼瞓… 

今日係年初四，最後一日嘅假期！一早起身同爸爸食完嘢就返咗姑婆到拜年，之後就返咗屋企食藥瞓覺，今日成日不停食藥，不停瞓覺。。。就連約咗同事去拜年，我都攰到冇去∼而啲人今日節目好豐富，朝早就去同朋友飲茶，夜晚就返奶媽到食飯。。。

夜晚啲人返咗嚟陪我睇戲，我哋睇棟篤特工，其實套戲幾好笑，加上有啲人陪住我，我開心好多。。。不過今日已經係最後一日一齊放假，下次可以二人世界又要等好耐。。。 

今日係年初二，因為尋日已經去婆婆同阿麻到，今日比較得閒，而啲人尋晚基本上冇瞓過，我有啲無奈，所以我由佢響屋企抖吓！

同爸爸食完嘢，我就返咗阿麻到，我好掛住啲人。。。啲人夜晚要返婆婆到食飯，我就響阿麻到食，今晚第到成十二點啲人先返，不過佢堅持要上嚟睇我，如果以後都可以好似今日咁，佢對我都係咁温柔咁想見我，我就覺得好幸福……一生一世咁落去就足夠！ 

今日係年初一，一早就起身過婆婆到，之後就返嚟等埋啲人一齊過阿麻到！

今年佢係第一年同我一齊返阿麻到，所以我好緊張，見佢落到街著住對拖鞋，我忍唔住話咗佢一句，搞到佢有啲黑面同返咗去換鞋。。。其實因為我認定咗佢，我唔想佢俾人話，但我更唔想佢唔開心！

上到阿麻到已經好多人，我完全估唔到。。。嗰一刻我好驚啲人會唔鍾意，因為佢好怕人多！我哋坐咗一陣，同玩咗陣魚蝦蟹就走喇！因為佢今朝講咗話唔想響到食，我就唔勉強佢，同佢一齊出街食~

夜晚我哋去咗深水埗，因為新年嗰到開咗條食街，我好想去。。。去到嘅時候好多人，我知佢唔鍾意，同埋佢覺得冇乜咁特別，所以行咗個圈我哋就去西九食飯！食完飯我哋就返屋企喇… 

今日開始假期第一日，不過都係好早起身，因為每年年三十都係好忙嘅一日。。。要幫阿麻佢哋預備團年飯嘅嘢，又要辦年貨，又要幫爸爸包利是，仲要整埋自己房嘅嘢！仲忙過返工😪

啲人今日都收早，不過佢就過奶媽到食飯，而我就響阿麻到食∼夜晚佢返咗嚟陪我，其實我想去香港仔買花，但佢個樣好黑，所以我決定返屋企！因為我唔想出到去最後都係唔開心∼返到屋企佢先話冇濕紙巾，結果就去咗海怡，順便買埋阿麻份禮物，同啲人任買。。。其實我有啲無奈，唔係因為要任買，而係佢嗰一刻先有笑容，我唔知佢係咪因為咁先會笑😭😔而我就令唔到佢開心？

買完嘢返到屋企，我講咗好多我嘅感覺出嚟，或者因為無咗承諾，同時亦見佢每日都係咁，我真係好無助，覺得係每日一癲。。。低能仔，我要嘅嘢真係真係好簡單！

聽日啲人話陪我返阿麻到拜年，第一年咁樣，希望我哋有個開心甜蜜嘅新年啦！