眨吓眼一日假期又冇咗喇。。。尋晚攰到唔知幾點瞓咗，今朝瞓到十一點先醒，但可能因為天氣太凍，我響張床到唔想起身~

晏晝同婆婆去咗飲茶，飲完就買餸返去煮飯俾啲人帶飯同今晚食~搞掂之後就返上床 hea 住煲劇，點知不知不覺又瞓著咗😅瞓到成七點爸爸打電話俾我先起身，不過個頭依然好痛😞

今晚啲人好早返嚟陪我，啲人好嗲好嗲，又瞓響我隻腳到睇電視，又買定薯片俾我，仲同我玩添。。。咁凍嘅天氣有佢響身邊真係好呀！不過我最想都係同佢一齊放假…但最快都要等到26号先可以😔唔知冬至嗰日啲人收幾點呢？

今日仲凍過尋日，真係超唔願起身返工，但為咗1500，我點都要爬起身返工💤💤

今朝要930返到公司，因為要十點過到OMEN 做一個客，所以要早啲返去換衫同打咭😪第一次過男賓部，種感覺好唔同，雖然唔係好習慣，但嗰到環境都幾舒服∼而且個客仲讚我按得舒服，令到佢瞓著咗，我諗呢個都係一個滿足感同肯定∼

今晚啲人嚟接我收工，我哋食完飯同gogogo 咗一陣就返屋企二人世界，有人嗲我要我幫佢按肩頸，雖然真係好攰，但見佢咁嗲乜都抵番晒啦！按完之後我哋一齊睇電視，我攰到瞓著咗，醒咗嘅時候我發現佢幫我蓋咗件外套，嗰種感覺真係好暖，其實佢都可以好細心架！ 

 今日凍咗好多，又要一早起身返工，好想喱響張床到唔出嚟，最好有啲人攬實我就更 perfect 池喇！啲人今日放假，好想可以同佢一齊放，好想同佢去玩同二人世界∼

今日又係超忙嘅一日，返到公司已經有客，一直做到成三點先食飯，又係食得個快飯就要趕返工，因為跟住3點半又有一個客，做完呢個客仲要做多個先可以收工。。。收工之後個人都散晒喇！

落到去以為見到啲人，點知人影都冇，仲要打俾佢電話又唔通。。。嗰一刻好擔心佢，明明講好咗接我，但又見唔到佢同揾唔到佢😞原來啲人電話冇電，返咗公司😪😪見到啲人之後，我哋去咗食嘢，跟住行咗陣，不過我有啲唔開心，我知佢都感覺得到，我望住佢電話唔離手其實有啲無奈，因為我哋依家真係好少時間可以一齊行吓街，傾吓計∼所以我好想好好珍惜呢啲僅有嘅相處時間！

本來今晚要返嚟煮飯俾啲人，但我實在太攰，要難為啲人星期一返工自己食飯喇！對唔住呀…

今日返早。。。8點幾就起身返工∼雖然要好早放 lunch ，但今日時間過得好快，因為食飯嘅時候覆診後，返到去就已經開始有嘢做，一直做到收工∼

今晚收七點，食咗啲藥個人已經散晒，加上做埋個客先收工，個人超眼瞓，返到屋企爸爸已經買定飯盒等我，今晚同爸爸撐枱腳∼

啲人今晚都係夜返，佢上咗嚟我到食飯，可以攬住佢嘅感覺真係好，好想每晚收工都可以返到屋企都攬住佢，攬住佢睇電視，攬住佢歎薯片，攬住佢瞓，攬住佢一直到老∼ 

今日休息。。。可以瞓得晏一啲∼ 尋晚食咗啲藥依然好早瞓著咗，瞓醒就趕住去覆診，搞掂就去買餸預備今晚嘅晚餐∼

今晚好想煮啲嘢俾啲人補吓，我就上網學整麻油栗子雞，呢個餸好補身同好有營養，好想啲人會鍾意食！另外仲整咗個未整過嘅嘢…蜜桃煙鴨胸~

啲人今晚好夜先返，我只係叫佢上嚟食，因為我都仲好攰，兼且仲有痛。。。依家我收早或者放假，佢又收得好夜，我又覺得攰，唯有只可以叫佢上嚟食，我哋好耐都冇試過響屋企二人世界喇😞😞