今日係最後一日假期，幸好可以同啲人一齊過∼我哋十二點幾就出咗去，其實我見到佢我真係好開心，因為終於都可以二人世界喇！

今日啲人好似怪怪哋，起初我以為佢唔舒服，所以我冇乜點講嘢，直到去到旺角，啲人終於都講發生咩事，原來係佢同媽咪發生咗啲唔開心嘅事~我發現係我唔夠細心，係我唔夠体貼佢！

今晚佢媽咪打完俾佢，佢就決定會搬走。。。其實我一直都想同佢有個家，但佢嗰一刻諗住搬時，係冇我響佢將來裡面，嗰一刻我個心好唔舒服。。。因為我響到諗，其實我哋經歷咗咁多嘢，我值唔值得同佢有將來？

返到屋企之後，佢俾咗段嘢我睇，係佢俾佢媽咪嘅。。。睇完嗰段嘢之後，其實我了解佢多咗，亦因為咁我更加想對佢好，或者佢哋關係搞成咁，有部份原因都係因為我。。。其實我離開對佢同佢媽咪會唔會關係好啲呢？ 

尋晚一啲都瞓得唔好，因為啲人要去韓國喇！我好驚佢隨時揾我我會唔知，所以我瞓吓醒吓，直到6點幾我先叫真正瞓著咗，因為佢話6點幾會到機場，我以為佢已經上咗機，點知。。。

8點嘅時候佢揾我，我即刻醒咗。。。啲人同我講佢去唔到，我起初以為佢講嚟呃我，但點知原來係真架😍因為佢唔知醒，醒番嘅時候架機已經走咗喇！

我諗住今日俾佢響屋企抖吓，所以下晝我醒咗之後，就落咗海怡食嘢同買餸，咁我哋可以成日都二人世界。。。不過最後佢都係要出去，我哋都係8點幾先有得見😞唔緊要啦。。。聽日出街拍拖啦！ 

今朝起身其實都仲有痛，返到公司個個都話我面色好差，結果俾多三日假我返去抖吓。。。雖然放到星期日先返工，但可惜啲人聽日已經響韓國！

今晚係暫時最後一晚見啲人，之後要見就要等到下星期，佢未去我已經開始好掛住佢，唔夠膽諗佢唔響香港呢幾日我會點😞所以我好期待今晚見到佢，我會諗佢會唔會對我特別温柔？特別唔捨得？特別早返嚟陪我？甚至會好似之前講好咗，佢臨去韓國前一日。。。結果乜都冇發生過！

今晚又係唔開心嘅一晚，我哋都係乜都冇乜點講，除咗我盡返我女朋友嘅責任幫佢執行李，買藥同按摩外，我哋只有各有各睇電視，其實我有覺得難受。。。我唔想我哋之間演變到咁，我更唔想好似五年前我去沙巴時，同佢講叫佢用嗰幾日時間俾大家諗清楚仲係需要對方😞因為我真係好驚。。。

無論如何你自己過到去要小心啦！ 

 自從尋日出院之後，我一直都覺得好寂寞。。。因為啲人真係好忙，而且星期五佢又要去韓國，我哋見嘅時間真係冇乜，兼且我揾佢佢都冇點覆過我😞

尋晚攰到根本唔知幾時瞓著咗，我今日瞓到十二點幾先醒，醒咗之後都仲有啲痛，抖多陣我就起身煮定今晚晚餐同聽日午餐俾啲人，搞掂晒我先落街買嘢食同食藥∼我攰到又瞓番！

今晚啲人都係好夜返，我好想見到佢，好想痛嘅時候可以嗲佢，我好想病嘅時候有佢響身邊，我好想有番每日一篇，等我可以知佢諗乜。。。我真係好想好想😞

尋晚入咗醫院，仲要被逼住咗一晚，其實好難捱，原來響我有事嘅時候，我真係好需要佢響我身邊，不過。。。

由尋日醒咗開始，我一直都冇瞓過。。。除咗要做一連串嘅檢查之外，仲因為得自己一個，我好掛住佢，所以我瞓唔著！而且隻手又咗吊鹽水，一郁又痛兼且又瘀晒，我要就住隻手唔夠膽亂郁… 我成晚瞓響張病床偷偷哋喊😭我真係好驚！

由尋晚到今晚嘅時間好難捱，我有諗過佢以前曾經講過，假如我入咗醫院嘅話，佢無論幾忙都一定會請假過嚟睇我，因為當日佢話無嘢俾我更重要，所以我今日有幻想過佢會突然出現響我面前，當然最後梗係冇！好唔容易先捱到夜晚6點幾可以出院，除咗覺得孤獨之外，仲覺得好攰。。。而啲人今晚都係夜返，我的確有小小唔開心，但算啦。。。佢想我學識体諒佢嘛！