今日都係返工日。。。返埋今日就放假，我又係等埋啲人一齊返工，好想以後都係咁！

今日休半日，我睇埋醫生買埋餸就返屋企，食咗藥個人更攰，我就整定啲人嘅晚餐，然後就上床瞓，一瞓瞓到6點幾。。。不過都仲係好痛同燒！

今晚啲人收工就返嚟，我就拎埋啲嘢過佢到，二人世界嘅日子得返兩日咋。。。好唔捨得冇得同啲人一齊攬住瞓，睇電視同嘆薯片呀😫😫家。。。我想有個屬於我哋嘅家呀！

今日第一日落鋪，幸好朝早有人陪我一齊返工，等我可以冇咁緊張。。。

今日朝早好悶，成個朝早除咗 check 房就冇嘢做過🙄好難先捱到食飯！食飯嘅時候有人打電話俾我，令我可以苦中一點甜~食完飯返去就開始忙，執貨執到癲，攰到阿媽都唔認得。。。

收工返到去，爸爸同我落街食飯，爸爸同我講假如我覺得份工真係唔啱自己，唔好因為唔想佢哋擔心而勉強做落去。。。因為佢覺得我唔開心😔聽完佢咁講其實我好感動，不過都係嗰句睇定啲先！

食完飯嗱嗱臨返去煮飯俾啲人，但我遲咗過去，搞到啲人唔係咁開心。。。今晚我哋睇咗陣電視同攬住一齊瞓咗陣，我就返咗去喇！期待聽晚同啲人去街街😍 

唉。。。今日係落鋪前最後一日假，聽日開始又冇得放星期六，而星期日又只係得兩日😫好唔想咁呀！

今朝9點就起身，同爸爸食完嘢，我同家姐就去灣仔同銅鑼灣，家姐買咗好多嘢俾我，又買衫又買蜜糖俾我，好開心呀！濕平完拎埋蛋糕同買埋餸，我就返去做煮飯婆喇。。。

今晚本來出街同家姐食生日飯，最後我哋買咗壽司返去，爸爸就整蟹同蝦俾我食，我就焗咗椒鹽油金魚俾佢哋，第一次焗魚幸好爸爸都鍾意食~食完飯我就拎埋啲嘢過啲人到！

今晚啲人陪我睇十二夜，呢套戲其實我一直幾鍾意，因為真係好似講緊普遍情侶所發生嘅嘢！只不過當初冇經歷過，感覺冇咁大！但今晚睇番感覺就好大，好似開始明白低能仔諗緊啲乜咁。。。

睇完電視我哋嘅假期就完喇！聽日又要返工，啲人咁啱都係返銅鑼灣，有人話聽朝同我一齊返工呀😍 

今日星期六，係最後一個星期六可以同啲人一齊放假…朝早8點幾醒咗食藥就再瞓過，但瞓到十點又俾姑姐嘈醒咗，搞掂啲嘢之後，我就瞓到點半啲人就叫醒我。。。

我哋今日出咗銅鑼灣食嘢同行咗陣，之後就一齊返屋企。。。啲人今日對我特別熱情同嗲，係我一直想要嘅感覺，但我好無奈，因為我好似變得冇乜感覺！直到返到屋企，啲人攬得我好實嘅時候，我忍唔住喊咗出嚟，我同佢講（點解每次當我想走嘅時候，你先會咁對我？）其實每一次當我想走，而佢又會咁嘅時候，我都會心軟~但我真係好怕呢啲感覺又只係維持一兩日又打回完形😞

今晚響佢到執屋同打蠟，我專登要佢幫手同留番啲俾佢自己做，我想佢學識分擔一吓，兼且假如冇咗我，佢都知點樣去做！其實有佢幫手整，啲嘢都好快搞掂晒…係打蠟真係好攰~整完之後成個人都散晒😩周身都好攰！希望佢可以好好 keep 住間屋乾淨，直到佢阿媽返嚟為止啦！ 

 今日係響荃灣最後一日，亦即係話係我最後一日同啲人一齊返工。。。我依然買定早餐等啲人！

今日好忙，因為最後一日，有好多嘢要處理，不過我最後都考唔晒啲機，遲啲應該要返去考番，不過唔理咁多，遲啲先算啦！

今晚啲人帶我去睇燒烤叉演唱會，我好開心架。。。因為我真係好鍾意安仔！個演唱會真係好好睇，見到安仔喊我覺得好感動~因為我唔捨得佢哋各有各發展。。。

其實今日我成日都好似心事重重咁，就連返工都冇乜點講嘢∼因為我覺得自己好似唔再係自己咁，原來我真係可以做到冇咁愛佢同緊張佢。。。今日我基本上冇點 whatsapp 過佢，就連 lunch 我連一句掛住佢都冇講過😞直到演唱會唱天梯時，我差啲流眼淚，我諗番起啲人第一次同我去台灣嘅情景，佢當初一返到嚟就即刻錄咗呢首歌送俾我，自此我哋就好似連体嬰咁，每一日都響埋一齊！

搭車返去時，我本來諗住撩佢講嘢，但佢話佢好攰時，我就去返唔再講嘢。。。以前我會好唔開心，因為我哋今日應該講唔夠三十句嘢，但今日我再冇感覺喇。。。點解我會變成咁？