尋晚又不知不覺咁瞓著咗，瞓到五點幾就醒咗。。。因為仲係好燒，起身食咗藥之後，我返翻上床抖多陣，原本諗住返工，不過最後都好辛苦，結果一早就打俾 milky 請假。。。

瞓到十二點幾就起身，媽咪同我去食嘢同睇醫生，搞掂晒就買埋餸返去煮飯俾啲人。。。食咗啲藥個人好攰，兼且仲係好燒，好想啲人響我身邊照顧我，真係好想好想！啲人今晚好夜先返，我攰到唔願郁，但都有拎飯同幫佢按摩，今晚我好快就走。。。

尋晚食咗啲藥好早就瞓咗，不過又係燒到醒咗😞起身食多次藥就返番上床同啲人whatsapp 一陣又瞓番，我連同爸爸飲茶都冇去，繼續響屋企瞓，一瞓瞓到十二點幾！

啲人今日要返工，我就煮定嘢等佢返，但我真係好辛苦，個人越嚟越熱，食咗退燒藥都冇用。。。煮完嘢又要做功課同夜晚返阿麻到食飯，完全冇胃口。。。之後就去幫啲人買嘢同拎飯過去俾佢，好攰！

今晚過到佢到，我已經散晒，所以冇乜講過嘢！見佢攰我就幫佢按摩，我哋攬住瞓咗一陣就返屋企，因為我真係燒到好辛苦😭 

今日星期六可以放假，尋晚等啲人等到好夜，而且發燒搞到瞓得唔好，所以今日都係好攰。。。

今日同啲人出街，起初真係好開心，因為佢見我燒得好勁，佢就帶我去睇醫生，不過當我睇完醫生出到嚟，一切都唔同晒。。。究竟當中發生咗啲乜嘢事呢？

睇完醫生之後，我一路冇乜點出聲，因為見到佢咁我真係覺得好攰。。。食嘢嘅時候都已經好似各有各食咁😞食完嘢陪佢交收埋，食哋就返去。。。響地鐵我其實已經好攰，我一直攬住佢望住度門嘅倒影，我好想望吓佢攬住我嘅時候係咩表情，但我望到啲我好唔想發生嘅嘢，由佢開相機直到較位到影咗兩張相，我其實好清楚睇到晒~我嗰刻第一個返應係望一望個女仔，再望住度門我自己嘅倒影，我竟然覺得自己已經變得好陌生，同時亦好嬲。我嬲到唔想講任何嘢，因為我覺得樣樣嘢我都要遷就佢，体諒佢。。。但點解應有嘅尊重同尊嚴都唔可俾我？

好攰…真係好攰，我仲行唔行到落去？我自問已經做晒女朋友嘅責任喇… 

 今日要返工，返一日聽日又放假，尋晚半夜開始發冷，醒咗都仲係咁，因為咁有一刻我真係想請假，不過一諗到扣好多錢，我最後都係選擇返工…

今日唔算太忙，因為有好多人請假，上晝學完機同理論，下晝做一陣嘢就收工，本來諗住食飯嘅時候去睇醫生，但可惜醫生食飯，收工之後就趕返屋企煮嘢俾啲人食！

啲人今晚早咗返，我就煮定嘢俾啲人返嚟食∼今晚我哋見咗一陣，睇咗陣電視就返咗屋企。。。我真係好想攬住佢瞓到天光！因為可以癡住佢嘅日子得番好小日子😞😞😞我唔想咁，真係唔想咁樣！

 今日係中秋補假，我又係一早起咗身。。。醒咗之後都依然係病，爸爸同家姐同我去灣仔食早餐，順便睇吓有冇醫生睇，不過紅色假期冇醫生睇！

而啲人就瞓到十一點幾先醒，但我哋好晏先見…今晚我哋響香港仔食飯，食完飯我哋去咗 gogogo，不過我其實越嚟越唔舒服，就連返到佢屋企我連薯片都冇乜胃口食，陣係想啲人抱住我，俾我嗲佢。。。原來當唔舒服時，佢一路抱住我，一路輕輕咁拍我背脊係好舒服，舒服到想瞓覺架！