終於都到星期五喇。。。呢個星期好似特別攰咁，或者因為一聽到考試兩個字，我個人又開始緊張起嚟，每晚都瞓得好差，兼且背理論背到發夢都背緊！

今晚收工之後，我就去咗旺角等啲人，但等到成十點先見到佢。。。嗚嗚~我好掛住佢呀！我哋去咗麥記，食完行咗就返屋企喇！因為唔止佢，其實我都攰到飛起😫希望今晚可以瞓得到好一啲，然後可以精精神神咁同佢放一日假！

今日星期四喇。。。下星期又考試，結果尋晚瞓得勁差，三點幾先瞓，朝早6點就起身∼做咗一輪功課同温咗陣書，就整嘢返工喇！今朝個傻佬好 sweet ，我話我好想見佢，結果佢自拍咗張相俾我睇，不過都好冧，但其實我想見到真人多一啲！

今朝返到公司已經開始有嘢做，一路做到食飯，今日我冇出去食，因為有同事生日，我哋叫咗 pizza 同買咗生日蛋糕返去開 party ！其實識到佢哋我真係好開心架∼

收工又係嗱嗱臨返嚟買嘢煮飯，不過啲人好夜返，我只係見咗佢一陣就返屋企喇！因為我真係好攰。。。但有人話聽晚帶我去街街呀😍 

 話咁快又到星期三喇！尋晚好早瞓著咗，不過瞓得好差，成晚瞓吓醒吓咁。。。

今日返到公司已經開始忙，忙到食飯先可以鬆一鬆。。。幸好我嘅低能仔打咗個電話俾我咋，我先可以 relax 一啲！食飯嘅時候醒起星期一買咗張六合彩，諗住順便對埋，然後掉咗去，點知俾我中咗。。。『三個字』！雖然得四十蚊，但都覺得好開心😌

今晚啲人收工就返咗嚟，我拎埋飯過去就一齊睇電視，啲人陪我睇又俾我嗲，仲要餵埋我食薯片添！好想呢一世都係咁呀~因為我真係好愛佢…

 今日都係要返工，一早起身依然都係好攰。。。好想瞓覺💤💤但都好努力咁爬起身返工！返到公司差唔多全日都瞓響到冇郁，因為要俾個同事按摩，我按到瞓著咗一陣…

呢兩日食飯都好唔習慣，因為啲人冇打過電話俾我，我好掛住佢架嘛！收工就趕返嚟煮飯俾啲人，尋日已經懶咗一日，今日唔可以再偷懶，要煮飯俾我個低能仔食…

今晚啲人9點幾先返到，幸好趕得切一齊睇同盟啫！最鍾意就同啲人一路睇電視，一路嘆薯片！呢種生活係最正架😋😋今晚啲人好嗲，我好鍾意咁嘅佢∼好想快啲到星期六同佢一齊放假，因為呢啲日子得翻個幾月咋😞😞

今日係超唔願意起身嘅一日，個人真係又攰又眼瞓。。。一起身嗱嗱臨睇吓有冇打風同黑雨🙈結果係乜都冇，要起身返工喇！

今朝返到公司上半晝上理論堂，下半晝就做機，其實呢部機之前響 IM 都學過，所以唔太擔心∼只係啲筆記要重新再整理一吓！

收工本來諗住返去煮飯，但因為我響荃灣買唔到啲人要嘅酵素，所以我就諗住出去買同接埋啲人食飯，我就響旺角等佢！今晚啲人好早出咗嚟，我其實已經好攰，但我一見到佢就已經好開心…不過我知佢都係咁攰，所以我哋食完飯行咗一陣就即刻返屋企，因為我唔捨得佢攰！

低能仔，多謝你今晚對我咁好呀！