今日終於都好番啲，可以精神少少咁返工。。。一到星期五就超忙，要成兩點先食飯~但我返得好開心架…每日都嘻嘻哈哈咁過，時間都好容易過！不過遲啲落到鋪就唔知仲係咪咁喇😣

今晚收工原本去旺角等啲人收工，但佢響我臨落地鐵時打嚟改番響銅鑼灣等。。。見到佢我真係好開心，但啲人講咗樣嘢俾我知，佢應承咗十月會去韓國😞其實我唔想佢去，我承認我係好自私咁想留住佢，因為我真係好驚，好驚佢又會。。。坦白講我仲未復完架！

我哋食完嘢之後，我一直都冇出聲，如果俾翻錢佢可以留住佢，我真係好想。。。不過到最終又係咪真係留得住呢？我有諗過不如由佢去，咁可以藉住嗰幾日令佢知道自己仲有幾愛我？有幾需要我？但我真係唔夠膽博，我好驚佢去完返嚟先知自己已經唔再需要我😞😞我真係輸唔起。。。由我哋真正響埋一齊至今，除咗沙巴嗰幾日，呢幾年裡面我哋每日都一齊，冇一日分開過，我唔想真係好唔想同佢分開，就算只係得一日我都唔願意😭😭可唔可以唔好走呀？

 今日要返工喇。。。起身嘅時候其實都仲好燒，不過我想返工，所以我冇理咁多，照繼續返去！冇返兩日工，有好多嘢要做，時間過得相當充實，好快又收工喇！

收工之後我已經攰到散晒，屋企又冇飯食，本來應承煮飯俾啲人，到最後都只係去買外賣∼爸爸話食唐記，咁我就連埋啲人嘅外賣一齊買！

今晚啲人都係夜返，佢返嚟我就整番熱啲飯俾佢，我見唐記用發泡膠盒唔可以整熱，我就換過個盒整熱俾佢~上到佢到我真係好唔開心，因為佢嫌棄我買唐記俾佢😭我服侍完佢食飯之後，佢又自己食布甸唔理我，就好似尋晚咁，我忍唔住喊咗出嚟。。。我真係覺得好委屈，佢要我体諒佢攰，我同樣都想佢會。。。我每晚煮完飯俾佢，返到屋企除咗要洗佢夜晚嘅飯盒，仲要洗埋晏晝嗰個飯盒，跟住又要做功課同温書，仲要食咗藥，每日響公司按摩按到雙手都冇力，其實我都好攰，只不過呢一切佢都唔知😞攰喇。。。我真係覺得個心好攰喇😞😞

 今日都仲係好唔舒服，起身嘅時候腳好軟同好暈~結果都係請咗一日假…

醒咗之後啲人打俾我傾咗一陣，我就去買餸然後返嚟嗱嗱臨煮飯，因為搞掂完就要出去睇醫生。。。其實今日我唔係好想煮飯，因為真係好唔舒服，不過為咗想見到佢笑，我就堅持煮落去！

睇醫生探熱依然仲好燒，醫生話我流行性醫冒😪返到屋企我就等啲人返！啲人今晚都係夜返。。。我上到去服侍完佢食飯，我哋就各有各睇電視，我明白佢攰，但我都想我等佢返到嚟，佢會好開心咁面對我😞

響佢到走落到街之後，咁啱有人跳樓。。。仲要係已經死埋😖😖😖我真係好驚呀！嗰一刻要自己一個行番屋企，條路特別漫長！希望今晚唔會嚇到瞓唔到…

今朝七點就起身，本來整嘢返工，不過一落床就暈得好勁兼且又嘔，最後都係請咗一日假。。。我whatsapp 俾啲人同人講，想佢上嚟拎飯，因為食咗啲藥好眼瞓，但我估佢拎得飯嚟都應該遲到，所以我拎埋落去俾佢，有啲人仲買咗唐記俾我估早餐添。。。好sweet 呀！

返到屋企我食埋藥就頂唔順瞓著咗，一瞓就瞓到成三點，醒咗依然好攰，周身依然好痛~ 落街買完餸我就返去煮定飯俾啲人今晚同聽日喇！

啲人今晚都係好夜返，我過到去就服侍埋佢食飯，我哋睇咗一陣電視就走。。。不過今晚都好開心，只係我食咗藥仲係好唔舒服😞 

 今日又係一早起身返工，唔知點解不停咁嘔，嘔到連早餐都冇食，返到公司已經無晒力∼

收工之後，嗱嗱臨去咗睇醫生，醫生話啲菌去咗腸胃。。。睇完醫生就去咗等啲人接我食飯，嘔咗咁多次真係好肚餓！食完飯啲藥都已經開始散，完全頂唔順眼瞓到癲呀∼不過為咗令啲人開心，我哋去咗 gogogo…

去到 gogogo 嘅時候，啲人玩玩吓突然發皮氣，我從來都冇見過咁，我真係覺得驚。。。我之後冇乜點出聲，因為我唔知點算好！去完 gogogo 我哋就返去，但唔知點解我每講一句嘢，佢都不停遙頭，我嘅感覺好似佢嫌我煩咁😞我覺得好無奈。。。

食完藥我攰得滯瞓著咗，原本佢要交收，不過最後取消咗，我哋繼續留咗響屋企，我幫佢修完眉就落街食飯，食完飯我哋去咗百佳之後就返屋企，不過我又冇乜講嘢，其實我真係覺得驚，我唔知佢幾時又會話我。。。

你知嘛。。。我食咗藥咁攰都堅持都整飯盒俾你，係我真係重視你，好想你會開心，因為只要你開心，我哋兩個先會過得開心。