今日係第二日返工，返到去已經開始好忙，忙到收工都冇停過∼但最開心係姑姐上咗嚟睇我，唔知點解見到佢響房門口望我，種感覺好特別，好似啲小朋友返學，屋企人響門口偷望咁∼

今晚收工之後，就趕返大街覆診。。。爸爸就響地鐵站接我😆睇完醫生就買飯盒返屋企，啲人收工就返，我帶埋飯盒上佢到，今晚超攰呀！不過見到啲人就乜攰都唔記得。。。而且個傻佬仲買咗隻新嘅抹茶雪膠俾我，好冧呀~今晚我哋兩個都好似死屍咁灘埋一齊睇電視😂幫佢按摩咗一陣，睇埋電視，我就攰到返屋企喇！好想攬住佢瞓呀。。。

 今日終於都返工喇。。。兩個月悠長假期終於都完結，好唔捨得呢個假期，我好想繼續做煮飯婆，每日煮飯俾啲人食！好想一世都做佢嘅煮飯婆∼

今朝一早就起身返工，雖然咁耐冇返，但幸好都冇唔習慣。。。不過就好掛住啲人囉！所以我一有時間就揾啲人…今日都算過得好快，話咁快就收工，本來想返去陪爸爸食飯，但見啲人咁好話想我接佢收工，我梗係去接佢啦！

今晚企咗響街等佢等咗好耐。。。等咗成個幾鐘先等到佢😞我哋食完嘢就返去喇！不過啲人帶我去咗百街買布甸😆返到屋企就忍唔住即刻同爸爸一齊食~爸爸勁鍾意呀…爸爸仲話聽晚等我收工，同我睇埋醫生之後，我哋一齊去百佳買嚟食😆😆我人生有兩個男人都會我要乜就俾啲乜我，我真係好幸福😌😌

 今日係最後一日假期，一睜開眼除咗覺得依然好痛之外，原來已經8号風球😑點解個風會早咗一日到架？？

今朝有個傻佬好早就醒咗，佢知我一定會同爸爸食嘢，就特登 whatsapp 我話我知打風，要我小心啲。。。而我當然唔會放過呢個可以俾佢錫嘅機會，我買埋早餐上去揾啲人😌😌啲人陪咗我一陣之後，我就返屋企煮飯俾啲人聽日 lunch ~

今晚啲人襯我唔響到，自己偷走落海怡 gogogo 。。。而我就返阿麻到食飯，幾日冇乜點食過嘢，我真係好肚餓，阿麻話我瘦咗∼今晚又係冇乜點食到嘢，幸好有湯飲咋😭😭

食完飯我就返屋企整番熱啲嘢俾啲人食，最後一日假期，我真係好想攬實佢∼但今晚佢有啲怪怪哋，我好擔心佢。。。我真係好怕會冇咗佢！

今日係假期倒數嘅最後兩日，啲人今日都放假，佢瞓到點幾先起身，都好嘅，可以休息耐啲∼而我9點幾就痛醒咗，同爸爸食完嘢之後，就再去睇醫生😞😞

晏晝啲人一見到我就問我係咪嬲佢？其實我只係擔心我同佢又會唔會唔開心。。。不過啲人今日有啲唔同，對我細心咗，又拖住我同我傾計，又攬實我，最重要係大家都有笑容吖嘛！

我哋去咗旺角就即刻揾嘢食，因為啲人個胃唔舒服。。。有人請我食日本嘢😍但我食嘢都仲係好辛苦，壽司都要就咁吞😞😞雖然係咁，有佢笑住陪我食，我已經好開心架喇！食完嘢我哋就去咗 gogogo 。。。我哋玩得好開心，而且仲玩咗個推水晶南瓜車嗰部機，啲人好叻豬，我想要嗰兩架南瓜車都推到俾我😌😌

夜晚本來去書展，不過我唔想佢同人迫，所以冇去到∼我哋去咗睇喵星人。。。好好睇好好笑呀😂啲人都由頭笑到尾！我最鍾意見到啲人笑架喇…睇完戲我哋終於試咗一間有少少貴嘅餐廳，啲人仲陪我相機食先∼但我真係食得好辛苦，嗰種痛真係好難受，我唔想啲人擔心我，我一直扮冇嘢咁食，我只係希望同佢有個開心嘅假期！

低能仔，今日你話你冇以前咁愛我，其實我一早感覺到架！但依然好多謝你帶我吃喝玩樂。。。仲要細心到服侍埋我食藥~

尋晚半夜起咗兩次身食藥，今朝十點幾就起身再食藥，然後就同爸爸出去食嘢，睇醫生，兼且買定啲餸∼

返到屋企食咗啲藥開始好攰，而且仲係好痛。。。已經幾日冇乜嘢食過，搞到個人又餓又冇力😞好辛苦！響屋企瞓咗一陣之後就俾媽咪嘈醒咗，塊面又開始好痛，我就嚟痴線，不過一諗起夜晚可以見到佢，我就知我撐得住，因為我好想好好咁同佢拍吓拖，行吓街∼

今晚我等啲人收工，一見到佢我就已經好開心，我一直忍住痛唔出聲，食完飯我哋去咗玩同食雪糕∼響雪糕店見到有個好靚嘅女仔同佢打招呼，啲人塊面紅晒，好似好怕醜咁，嗰一刻我真係自卑😞😞

啲人買咗雪糕俾我之後，我一食就痛到流眼淚，其實我忍咗好耐，因為真係痛咗好耐∼今晚我哋都有開心，有唔開心∼開心係遇到佢偶像，仲可以影咗張相！唔開心係佢覺得我同其他人比較，的確我真係好羡慕其他人，羡慕佢哋可以拖住手好開心咁傾計，羡慕佢哋啲男朋友會攬住自己啲女朋友，更羡慕佢哋都會成日笑。。。