今日考試喇。。。由我起身開始，個人已經好緊張😖直到返到公司，我即刻練第一部機，然後先考試，我雙手不停咁震！幸好 miss 都俾個 B- 我！其實考完第一部之後，miss都有問我做乜？我好老實咁答佢，我每次聽到考試兩個字，我都會好驚😞😞😞不過幸好考第二部時，我已經定咗啲，手冇震而且考完之後 miss 話冇嘢同我講，因為冇問題😂😂😂仲有個B+添呀😌嗰一刻我覺得對我係一個好重要嘅肯定！

上晝考完試食埋飯之後，我決定下晝抖一抖，瞓低俾同事做 model ，因為我真係好攰，特別肩頸同雙手位置都好痛，所以我叫同事幫我按摩，但按完之後好似仲攰過之前，陣係覺得好眼瞓！

收工之後，我響荃灣買埋餸返去煮俾啲人食！今晚媽咪唔響屋企，家姐又 OT ，就得我同爸爸撐枱腳，爸爸買壽司返嚟俾我食😍我話俾佢知我考成點，爸爸響到笑，睇得出佢好開心！

今晚啲人返嚟陪我睇同盟大結局，有佢陪我睇電視係最完滿架！不過唔知點解覺得啲人好似唔多開心咁，唔知佢係咪返工唔開心呢？ 

 尋晚唔知幾點瞓著咗，又同唔到啲人 goodnight 喇。。。雖然早咗瞓，但都係瞓得好小，兼且又6點醒咗😑😑超攰呀。。。

今日返到公司已經有嘢做，做到成兩點先食飯。。。食完飯就返去繼續做，好快就到收工~今晚收工就落銅鑼灣等啲人，啲人成9點先到！今晚我哋食完飯就去買埋UA 半價禮卷就返屋企喇！因為啲人好攰冇乜點講嘢，而我都係好攰，同埋燒到有啲暈暈哋😷雖然個傻佬冇乜點講嘢，但拖得我好實，令到我個心都覺得好實在！

尋晚冇乜點瞓過，一合埋眼就見到一大堆理論😞我諗成晚都唔知有冇瞓到兩個鐘。。。今朝又六點幾醒咗🙄🙄

今日要考試，我温咗好耐，練咗好多次，但最後都衰咗😖😖啲同事都呆咗。。。問我究竟做乜？其實連我自己發生咩事，我自己都唔知∼我陣係知道自己嘅狀態真係好差！幸好 miss 冇響我張分紙到寫，當我冇考過，仲可以俾我再考多次😭😭😭但我真係跌入谷底，壓力更加大！

收工之後我就搭地鐵返去，今日我好需要佢響我身邊，同埋好需要一點甜∼所以我響麵包鋪買咗個朱古力包食，希望食完可以放鬆啲！但好似唔係好 work 囉☹啲人今晚買咗雪糕返嚟俾我，我其實只係勉強咁笑。。。我好想嗲佢，攬實佢唔放！ 

 又到星期日喇😞😞放埋今日，聽日又要返工喇！可以癡住低能仔嘅日子又小咗喇…我其實好驚落到鋪之後，我哋可以一齊嘅時間唔多，好多嘢都會起變化😭😭但我知呢個係我揾錢嘅機會，我只有呢段時間努力啲，到結咗婚先可以同佢有安定嘅日子過∼我真係好驚冇咗佢，我好想嫁俾佢！亦因為呢個轉變，我先會成日同啲人講叫佢同我求婚，我想一世都跟住佢！

今朝我同爸爸二人世界，十點就出咗去食嘢，之後就拎月餅，買餸同幫啲人買埋紙巾。。。返去嗱嗱臨煮飯，咁就可以快啲見到啲人喇！晏晝成三點過咗佢到，我哋二人世界咗一陣，就落咗香港仔買嘢同 gogogo ，啲人夜晚仲買壽司同外賣，同我一齊響屋企撐枱腳添😍

食完飯我哋就一齊執屋，今晚個傻佬好乖，坐定定響到陪我抹地。。。搞掂晒啲嘢我哋一齊睇電視，我仲幫佢用尋晚買嗰支薰衣草按摩油按肩頸，希望按完佢會放鬆啲，瞓得舒服啲啦！佢攬住我瞓咗一陣，我就返屋企喇。。。其實我好想之後每個星期日都係咁過，簡簡單單二人世界，一齊響屋企食飯，睇電視，執吓屋，攬住瞓吓，同幫佢按摩。。。

今日雖然係放假嘅一日，但都係平時返工時間醒咗😞結果我執埋啲嘢，搬過爸爸房再瞓過，因為我房個冷氣仲未整好，想瞓得舒服啲，唯有過爸爸房瞓。。。

十二點幾醒咗就見啲人揾過我，我哋成兩點先出街。。。今日香港九龍一日遊，陪啲人去完旺角交收同食嘢，我哋就去將軍澳尋找小王子之旅，其實我好期待小王子之旅，因為我想同啲人影多啲相，不過一來冇乜嘢影，二來啲人唔肯影。。。其實我好想講，我愛嘅係佢個人，佢肥定瘦我都一樣咁愛佢，我成日都覺得我一生人冇乜嘢叻，最叻就係揀咗佢！所以我好想同佢影多啲相，可以儲更多我哋嘅回憶，整更多有我同佢嘅相簿，到我哋老咗都可以一齊睇番一齊回味！低能仔，我愛嘅真係你！

去完小王子之後，我哋就落翻銅鑼灣食飯同睇戲，啲人仲帶我去 sogo 買咗花茶俾我，等我可以好瞓一啲∼真係細心！今晚我哋睇西謊極落，呢套戲由我知佢想睇，我就即刻揾換票証，我想佢會開心！結果呢套戲真係令啲人由頭笑到尾。。。見到佢咁開心，我都覺得好開心，我好耐冇見過佢笑得咁多同咁開心喇！希望以後嘅每一日直到老都可以咁就好喇…