尋晚都係攰到不知不覺咁瞓著咗，雖然都係瞓得好差，但總算可以瞓到十點幾先起身，不過依然都係好攰∼

今日同啲人拍拖去街，我哋去咗旺角食完嘢同買嘢，就同佢去大圍交收∼雖然有小小無奈，因為我想同佢行吓同去玩，但唔緊要啦。。。佢開心就得！

夜晚就去美食節，其實我好期待同佢去，因為上年我哋去嘅時候係好開心架！四圍食嘢又係咁玩，我以為會好似上年咁，我哋都會食得好開心架~不過…

今晚我哋好早就走，我一直都冇講嘢，我陣係諗或者我同佢去係錯，因為佢覺得人多而唔會 enjoy ~或者以後呢啲節目我都可以唔諗同佢去喇！返到嚟我哋就各自返屋企。。。 

 終於都星期五喇。。。返埋今日又可以抖兩日，不過下星期考試，個人好似放鬆唔到咁∼尋晚又係好早瞓咗，不過都係瞓得好差，成晚發夢都係幫人按摩😞我應該好快癲！

今日收工之後，我就落銅鑼灣等啲人，做咗成日嘢其實已經有啲攰，之後企咗40分鐘等佢，我已經開始冇乜力。。。不過唔緊要啦！見到佢我就開心∼

今晚食完飯行咗陣，我見佢咁攰就話返屋企，不過。。。有時我寧願佢坦白咁答我話好！總好過佢講說話啲語氣好似有骨咁😞我聽完之後就再冇出過聲喇。。。其實我今晚咁想佢陪我，係因為今日係表弟嘅生忌，我好掛住佢∼

突然好驚聽日我哋都會係咁。。。

今日平時教開個 Miss 冇返，其實都有啲唔習慣，始終都對咗咁耐。。。不過今日個 Miss 又其實幾好，起碼我唔明嘅嘢佢真係用心教到我明，下星期二就考試喇！我已經好驚同好大壓力，尋晚雖然好早瞓，但真係瞓得好差，我除咗成晚發夢夢見自己返緊工之外，醒咗發現牙鉸位好攰，而且仲揸到拳頭好實。。。😞😞結果瞓咗等於冇瞓咁！

食飯嘅時候啲人打俾我，我終於都可以鬆一鬆。。。雖然只係幾句，但一個朝早同一個下晝都可以聽吓佢把聲，我已經好開心，亦覺得真係可以放鬆小小∼不過都好似抖唔到氣咁😖😖

收工之後我就落咗銅鑼灣接佢收工，因為啲人知我壓力太大放鬆唔到，就帶我去行吓~我見佢咁好梗係買啲嘢獎勵吓佢啦…我買咗個焦糖布甸俾佢，希望佢都可以甜一甜。。。食完嘢我哋行咗一陣就返屋企喇！

希望聽日可以順利渡過啦！ 

 今日都係返工，仲要 test。。。幸好過得到咋！不過我一路做一路認真咁諗，美容師呢條路係咪真係適合我行落去？其實我學得識要做嘅嘢，但我手震嘅問題依然解決唔到，呢個係一個好大嘅問題，亦係好大嘅困擾😞將來條路我應該點行呢？

收工返到嚟我去咗睇醫生，醫生話我感冒未清，要食咗啲藥兩日後再覆診∼睇完醫生街市都已經閂咗門，買唔到餸俾低能仔😞結果今晚佢食外賣，而聽日嘅飯盒仲要煮得好唔健康。。。

啲人今晚早收咗返嚟，我搞掂晒就過咗佢到，今晚我其實好專心咁望住個電視冇乜出聲，但其實我個心諗緊將來嘅問題，我覺得有啲抖唔到氣，壓力開始好大喇。。。好想行街😞😞好想散散步！

 如何回到當時？好掛住好掛住嗰個你…我仍然好需要你！