今朝一醒咗就見到啲人嘅每日一篇。。。終於都有喇😭😭好開心呀！

下晝到我考埋下半部份嘅考試，心情超緊張∼加上條頸又痛，我唔理啲藥有幾眼瞓都食咗先，因為我唔想影響到考試！不過因為太緊張同大壓力，我一路做手一路震，好驚做唔到而冇咗份工，加上太多同事要重考，我都好驚我都會係咁！幸好最後出嚟嘅成績唔算差，亦一 take 過唔使重考。。。暫時都可以放下心頭大石，好好休息番幾日，下星期又要開始學機喇！

今晚收工我就趕返屋企煮飯俾啲人，啲人十點幾先返，我哋只係見咗好小時間😞😞但啲人買咗我想食嘅百力支俾我，當係我考得好嘅獎勵，不過韓燒就泡湯了😩😩 

 尋晚頸椎痛到冇乜點瞓，幸好今日有個難得嘅假期，可以響屋企抖吓∼7點起身見到掛咗8号風球，我就起身食藥繼續瞓，瞓到9點幾就俾爸爸叫醒咗，因為爸爸落街買早餐返嚟俾我哋食！食完嘢其實仲想瞓，但又唔知個風會掛幾耐，因為兩點半前除風球，我就要返工。。。所以我唔夠膽瞓，唯有煮定啲嘢俾啲人今晚同聽日下晝食啦！

好唔容易先等到兩點半肯定唔使返工，我就食多次藥繼續瞓。。。我今日成個下晝煮冇見過啲人，唔知道假期冇我響佢身邊，佢會唔會份外開心呢？夜晚食完飯，我就帶埋啲晚餐過去俾啲人食，但唔知點解我勁想嘔，我自己一個行咗出門口，因為我怕我真係嘔嘅時候，會整污糟佢屋企∼不過佢冇出嚟睇吓我有冇事，其實我小小唔開心！之後啲人帶咗我去百佳行咗陣，我哋就返去睇電視。。。但我哋都唔係見咗好耐，因為我仲要返嚟洗嘢，加上我真係好唔舒服∼

抖咗一日聽日就要考試喇！希望一切都順順利利啦。。。

 尋晚好早就瞓咗喇！醒咗之後就嗱嗱臨整嘢返工，返到公司已經有嘢要做。。。做到成五點就到我考試，不過因為時間關係，我只係考咗三份之一🙄

其實今朝條頸已經好痛，我帶定咗止痛藥返去，但食咗都冇用。。。一路撐住做嘢，到收工嘅時候，真係頂唔順去咗揾靚仔醫生，兼且平時唔願打針嘅我，都痛到要佢幫我打針😫醫生話我頸椎有事，寫信俾我轉介去睇骨科做物理治療∼

搞掂晒啲嘢就趕返去接啲人收工，啲人成9點先收工∼我哋食完飯行咗陣就返去喇！雖然我好想佢可以陪我耐啲，但我知佢已經好攰，所以我好快就話返屋企！

希望聽日可以打8号風球休息一日啦！

尋晚臨瞓前啲人打俾我氹我，我好似將啲壓力爆晒出嚟，個心好痛，眼淚不停咁流… 結果我喊住瞓著咗！搞到今朝起身返工，眼真係好腫。。。

今日開始要考試喇。。。但仲未到我，我嘅壓力更大！因為頭兩個考完出嚟都頭 dup dup 咁，搞到個個都好驚，壓力就越嚟越大！呢幾日我都特登唔帶飯返工，我好想考試前都落街食飯，可以俾自己抖一抖，放鬆一吓，其實我最想都係啲人留響我身邊陪我行吓！

今晚收工我就返嚟睇醫生，我周身都仲好攰好痛，我一定要睇返好唔可以影響考試，希望食咗啲藥可以瞓得好啲啦！搞掂晒我就返去煮飯等啲人返，不過啲人今晚好夜返，我只係見咗佢好短時間就返屋企喇😞 

 話咁快又星期日喇。。。今朝9點幾起咗身，見到尋晚啲人除咗冇每日一篇之外，仲完全冇揾過我，我覺得好無奈，兼且好失望，因為我已經變得。。。。😞

今朝一早就同爸爸，家姐去食嘢，之後又要買一大堆餸 for 呢一個星期，啲嘢真係好重。。。而啲人就響屋企瞓到十二點幾先醒，真係好∼我都好想可以瞓！返到屋企又忙到一頭煙，因為要煮定啲嘢俾啲人返工食，咁啱啲人打翻電話俾我，嗰一刻我先知原來佢出咗去。。。佢返嚟就去剪頭髮，我哋都係5點幾先見！

今日我一直都好唔開心，原來問題係有人發現架！其實今日有人問咗我一個問題，我個心有啲唔舒服。。。有人問我每日都為低能仔煮飯同有時為佢執屋，放假又冇停咁買定嘢煮俾佢，冇時間抖同去玩吓∼仲問我佢每一日會為我做啲乜？定還是活響自己生活上？唔知點解我覺得好唔開心，同答唔到任何嘢！

嗰一刻好似叫醒咗我咁，原來我每一日所做嘅一切都係為佢，放工趕返嚟買嘢煮飯，過到去服侍完佢食飯就幫佢按摩，返屋企又要洗埋啲嘢。。。放假又係忙住煮飯，就算一齊去街都變得冇話題😰佢就好似活響佢嘅世界，我嘅存在根本唔再重要，我嘅一切佢已經冇再留意同緊張，起初我會覺得係穩定咗，但慢慢我發現根本唔係咁！只要佢覺得攰，佢就會對我冷言冷語，甚至黑面。。。其實我每日所做嘅一切都令我覺得攰😞我真係覺得個心同身都好攰喇！我今日成日都響到諗，其實我需要嘅究竟係咪佢呢？我所做嘅一切又係咪值得呢？我已經分唔清喇。。。