今日係放假日，原本諗住好好瞓一覺，點知由8點幾開始不停咁屙，結果比起平時返工，我只係瞓多咗30分鐘😔而啲人就開心，一瞓瞓到下晝兩點幾🙄🙄真係爽！

今日我哋三點幾先出街，本身啲人諗住帶我去觀塘同將軍澳，但我見個天好黑，好驚夜啲會好大雨，我唔想佢淋病，所以我哋近近哋只係去咗銅鑼灣！出到去我哋食咗個超好味嘅下午茶，仲要係 outback 😍真係好抵同好好食！我哋仲去咗 gogogo 。。。我知啲人返工壓力大，所以想同佢去玩，等佢可以放鬆啲！

玩完之後我哋又係搞到好唔開心，我一直以為過一陣會好啲，但原來係唔得架！我覺得個假期只係得我一個咁，我望住我有我行，佢有佢行，我個心好唔舒服，不停深呼吸唔俾自己啲眼淚流落嚟~直到去到灣仔，我忍唔住同佢講叫佢自己返去，我想行一陣😭我真係諗住走咗去以後唔再理佢，我真係唔想自己只係排後面😞我都想感受俾人重視嘅感覺，付出得多有時都會覺得好攰，我好想佢明白我已經好攰！最後佢氹我跟佢一齊返屋企…

其實我真係好珍惜同你一齊嘅時候，亦好珍惜你。。。我都想你都會一樣！ 

今日終於要面對嚟緊響呢間公司去定留嘅一日，因為今日就決定去邊間鋪，所以今朝同啲人一齊返工嘅時候，我一直唔出聲，我擔心緊假如調到好遠嘅話，我就要揾過另一份工，我其實好怕轉嚟轉去。。。

返到公司 HR 嘅同事已經響晒到，由於要每個同事都單獨見，等嘅過程真係好漫長，加上每個同事返到嚟都講話調到好遠，我真係開始擔心！最終我係最後一個見，結果我調去銅鑼灣，仲要係同 bb chu 好近😍一聽到呢到我已經開心到叫咗出嚟😂加上原來我呢兩個幾月嘅成績都算好。。。聽到咁嘅評語之後，我覺得我之前擔心自己能唔能夠做好美容師呢份工作，已經可以唔使再擔心喇！其實呢個算唔算係一個肯定呢？

今晚收工我同成班同事同 Miss 去食放題，成餐飯都食得好開心，但我個心一直掛住啲人，好驚啲人要等我好耐而肚餓。。。我9點半出到去旺角等啲人，啲人咁啱都出到嚟，同啲人食完嘢之後，我哋行咗一陣就返去喇！

聽日可以同啲人二人世界，希望我哋都可以開開心心😘 

今日都係啲人陪住我搭地鐵，我買定早餐等啲人。。。有佢嘅早上特別幸福😌搭地鐵嘅時候，我以為佢瞓咗，所以我就上網睇吓賣演唱會嗰個人覆我未？點知啲人睇到😅原本嘅surprise 冇咗喇！不過我由原本買嘅380，改咗做480😂話晒係佢偶像，我當然係想佢睇得清楚啲，最衰580嗰張賣得太貴，如果唔係我就買最貴嗰行架喇！

今晚收工我就去交收演唱會飛，然後就等啲人嚟銅鑼灣接我，不過啲人好遲先嚟，我哋食完嘢行咗陣就返屋企喇！好想好好享受埋呢個幾星期嘅日子。。。 

第二日返工有bb chu陪我，今日心情依然好好。。。不過呢啲咁 sweet 嘅日子，剩翻唔係好多日😞因為好快就要落鋪喇！

今晚收工之後，我都係趕返屋企煮飯，我要預備埋星期五嘅午餐俾啲人，因為啲人聽晚帶我去街街。。。而啲人今晚都早咗返嚟，仲陪我響床到攬住傾計，呢種感覺好實在同温馨！我真係好鍾意咁樣~每一次望住身邊嘅佢，我都覺得自己特別幸福，因為我比其他人幸運，我可以擁有佢囉！我陣係希望呢種幸福可以一直擁有落去，直到白頭到老😘 

 尋日請咗病假，今日要開工喇。。。起身嘅時候就算幾唔舒服，我都有堅持返工，因為唔想再扣多一日錢~

今朝行去搭地鐵已經吽吽哋，突然有人搭住我膊頭，原來係我 bb chu 😍返咁耐荃灣第一次同佢一齊返工，有人仲帶我買早餐兼餵埋我食，一朝早可以拖住手咁返工，真係好呀！響地鐵仲可以攬住啲人瞓咗一陣添！

返到公司已經攰到七彩，上晝上咗一陣理論堂之後，就開始瞓，食完飯返嚟都仲可以瞓多陣，瞓到成四點先醒，因為啲同事同Miss都見我好唔舒服，由我繼續瞓落去！

收工之後就趕返嚟煮飯俾啲人，不過啲人好夜返，我唔夠膽食藥住，因為我好驚我會頂唔順瞓著咗。。。今晚我哋又係見得好少時間，我好想對住佢耐啲呀！