今日中秋節，依然都要返工，起身都係攰同唔舒服。。。幸好今日返半晝！今日返工都好忙，搞咗一個朝早，下晝就開 party 喇！不過我好唔舒服，只係撐住落去~但都真係好開心☺

今日收四點，其實我都知我 bb chu 都未必可以早收，所以我過咗九龍灣接啲人收工，我好想啲人會覺得開心同覺得中秋真係人月兩團圓嘅日子😘響等緊佢嘅時候，我去咗 Starbucks 買咗杯咖啡坐響到，因為真係好攰，加上唔想嘥時間，所以就做埋啲功課，做完啲人都差唔多收工！

今晚我真係好開心，啲人陪住我同我屋企人食飯，其實我知佢唔想去，因為臨去之前佢講咗好多嘢，雖然有少少唔開心，但望住佢好努力咁適應，我已經覺得好滿足∼不過越夜我越唔舒服，個人越嚟越熱同喉嚨好痛，所以走嘅時候我冇乜講嘢，就連佢屋企我都冇去到😞啲人陪我行咗一陣，仲送埋我返屋企！其實我知佢今晚唔開心架…對唔住呀😫

放完三日假，今日又要開工喇！尋晚半夜開始成身發熱，仲要喉嚨痛同流鼻水，今朝起身超攰，有少少唔想返，想去睇醫生。。。不過最後唔想冇咗勤工，所以都係返公司！幸好返埋聽日又可以抖吓…

今日上晝都係學機同上理論堂，下晝我繼續考試，幸好一切依然順利渡過。。。收工之後，我就嗱嗱臨趕返嚟，因為要煮嘢俾啲人食，啲人收工就返咗嚟，我哋食完飯就落百佳行咗陣，其實我哋兩個都攰到傻，結果都係 hea 住瞓電視，之後就返咗屋企！

聽日就中秋節喇。。。係啲人第一次陪我屋企人過，好期待聽晚嘅來臨😍 

 今日係假期最後一日，我要一早起身去買嘢煮俾啲人做 lunch box ，兼且仲要整定中秋公司 party 嘅嘢，所以今日超忙💤晏晝我響屋企整嘢，而啲人就休息。。。我搞掂啲嘢就過咗佢到，啲人話今晚帶我去街😍

夜晚我哋去咗銅鑼灣，有人帶我食咗一餐好好味又好貴嘅日本嘢，因為啲人知我好鍾意，所以就帶我去。。。仲叫咗個好貴嘅魚生飯俾我，我每食一啖都覺得好幸福，真係超好味😋😋依家諗翻都好想再食！

今晚我哋食完嘢就行咗一陣，啲人開始冇乜嘢講，我估佢應該都攰。。。所以我都冇乜講嘢！返到去就一齊返咗屋企，幫佢按咗一陣，同貼咗退熱貼，我就返屋企喇！bb 我唔捨得咁快就要返工，我好想同你一齊生活呀😞

今日係第二日假期，由尋日開始，我就癡住啲人到今日下晝。。。呢兩日有開心，有唔開心，有笑，有眼淚，亦有靜落嚟諗以後嘅路嘅時候，就好似（最後勝利）呢首歌咁~

尋日我哋響旺角等，我期待咗呢個假期好耐，因為之前嗰一個禮拜我哋都好開心，所以我好想繼續落去，只但係。。。

我哋尋晚玩完之後就返咗去，成晚可以對住啲人我應該好開心至係，但我發現原來唔係咁，佢越黑面我就越唔知點咁，直到佢攬住我瞓足一晚，我感覺到佢每次醒咗再番上床後，佢都會攬番實我再瞓過，我以為一切都會變番一個星期前咁，但瞓醒之後佢都係咁黑😞直到佢問我使唔使返屋企先，我不期然諗番第一次嗰句（你阿媽掛住你）我知道佢想我返去…其實嗰一刻我有少少覺得難受！

今晚我哋出去睇戲，依然乜都冇講。。。我唔知可以點，望住佢咁我真係想喊😭我亦忍唔住發皮氣問佢究竟做乜？因為我真係分唔清佢係咪已經唔愛我？夜晚佢會攬到我實咁瞓，但對住我又係黑面。。。其實我做錯啲乜呀？ 

 今日真係好攰。。。起身嘅時候周身都好痛，攰到真係唔想郁，但捱埋今日就可以放三日假，所以都撐住返去！

今朝都係學機同按摩，上到十一點我就同同事對調，我決定今朝做嘢先，因為我想考試，温咗一陣理論，我就考試喇！幸好一切都順利完成，仲要好高分添。。。咁就可以安心放假喇！

收工之後就落銅鑼灣等啲人，不過啲人成十點先出到嚟，我哋食完嘢行咗陣就返屋企，見到佢咁攰，我就返咗佢到幫佢按摩，按完我成身散晒，瞓咗響張床到唔願郁，仲差啲瞓著咗💤如果有得選擇，我都想可以一直瞓落去∼唔想離開佢呀！