今日都係要返工嘅一日，尋晚十一點幾就瞓咗，個人好攰好攰。。。今朝醒返好似精神啲，但放工之後都係散晒~加上左邊面都係腫同痛，又係乜都食唔到，超辛苦！

下晝嘅時候有人打過俾我，我終於都可以放鬆啲喇！食完飯返去繼續做嘢，好快就到收工！收工趕番去買嘢煮飯俾啲人，點知我冇帶鎖匙，媽咪響婆婆到，而爸爸家姐又未收工，我一個人響到四圍行等佢哋返嚟接我，最後爸爸同我哋響樓下食埋飯先返屋企！但我都係食唔到……

今晚煮完飯都成9點幾，啲人已經響屋企等緊我，臨過去之前啲人 whatsapp咗我一句都好冧嘅說話，因為佢比較小咁講，所以過到去就算幾攰都覺得值得！唔知點解今晚特別想嗲啲人，好想攬實佢。。。攬住佢嗰一刻，我舒服到差啲瞓著咗，我諗呢啲叫安全感！

聽晚有人話帶我去街呀😍好開心！

今日要返工喇！尋晚明明好早瞓，但唔知點解都仲係好攰，或者啲藥真係太散🤔

今日食飯冇聽過啲人把聲，總係覺得差緊啲嘢咁∼食完飯返去又做過，不過當我一瞓上張床時，我覺得四周圍啲嘢都好似三百六十度咁轉。。。好唔容易先捱到收工！

今晚又冇飯食，又係捱飯盒。。。而啲人梗係食住家飯啦！但佢今晚好夜先返，我已經專登唔食藥先，諗住會冇咁攰，可惜我都係冇晒力~啲人搞到要響樓梯口食飯，幸好今晚唔係好熱咋！啲人仲買雪膠俾我食添…正傻佬！我就嚟俾你谷肥喇~ 

 今日星期日。。。又打風😑😑點解咁鍾意星期日先打風架？捱多一日都唔得😩😩

今日家姐落街買嘢返嚟俾我食，我食完就食藥繼續瞓，因為啲藥實在太眼瞓，而且我傷風到連把聲都沉晒喇！個人好攰，本想今晚唔煮飯，因為我醒番已經係三點幾喇！不過啲人好似好失望，我就落街買餸煮俾佢。。。但買完之後已經由頭濕到落腳，因為實在太大雨喇！

啲人晏晝自己出咗去。。。佢返嚟買咗蛋糕俾我食，今晚我哋一齊睇大結局，佢仲餵埋我食添∼咁樣特別好味！我哋睇埋電視就返屋企喇…唔知點解我覺得假期永遠過得快過返工，聽日又要返工喇！

今晚家姐同我講，Irene 佢哋想我返去，因為 Luna 又出咗啲問題，雖然我知自己唔會返去，但聽到佢哋有問題就諗起我，我都已經覺得安慰喇！

今日放假喇。。。尋晚鼻塞得好緊要，又係咁流鼻水，搞到瞓得好差，幸好今朝家姐返工前開咗冷氣俾我，等我可以瞓得舒服一啲，一瞓瞓到十二點先起身~

今日啲人帶先去太子，原本想食千層蛋糕，不過呢幾日都休息。。。之後我哋去咗食一間幾好味，但又幾貴嘅午餐！食完嘢我哋就交收埋今晚張演唱會門票就行咗陣，跟住就返灣仔靚仔醫生到睇醫生，夜晚就去睇演唱會喇∼

其實我今日成日都好攰好唔舒服，啲鼻水又不停流，頸椎又好痛。。。但我一直堅持揾演唱會門票同佢去，係因為我希望佢真係可以放鬆啲，我唔想再因為佢嘅情緒又搞到大家都唔開心，我唔想再因為咁而令到大家嘅感情有條修補唔到嘅裂痕，我只係想同佢開開心心咁行到老！

愛你等於擁有一片天空　任何風吹草動

都有你存在其中　自然而然的輕鬆

一路到夏天的尾聲　無所謂到過於激動

我們有笑容　我們曾心動　不再是無動於衷

無條件為你不顧明天的安穩

為你變堅強相信你的眼神

不敢想不敢問　有一天壞的可能

無條件為你放棄單獨的旅程

為你堅強就不怕犧牲

我的靈魂　如此沸騰　為我愛的人

喜歡複雜還是習慣單純　我願盡力完成

你在我心中幾分　難以形容的責任

愛一個人付出才會完整

無條件　越愛就越深　永遠不分　啊

 今日星期五喇。。。返埋今日又可以放兩日假，好攰好攰∼

今朝返工已經開始有嘢做，搞到點半先可以食飯。。。好肚餓呀！食完飯就返去繼續做嘢，因為今日係星期五，所以特別忙∼但條頸又痛得好緊要，一直痛到今晚都仲痛緊，不過已經冇晒藥食喇！我諗聽日要去揾靚仔醫生配藥至得…

今晚屋企冇飯食，我收工就返去買飯盒同爸爸撐枱腳，兼且煮飯俾啲人返嚟食。。。啲人今晚成9點幾先返，我見佢塊面生咗咁多粒粒，就帶埋支針過去幫佢針清，但其實我已經好攰！

整完之後佢塊面黑晒，佢話因為佢冇郁，但我又叫佢唔好郁😞坦白講我嗰刻真係唔知可以點，我幫佢整緊嘅時候，已經有幾次差啲整親佢，我唔想佢整親先會叫佢唔好郁，因為我知道假如我整到佢，佢一定又會憫同黑面！最後都係一樣😞我無奈到就連掉垃圾俾佢個廚房門夾到都唔夠膽出聲∼當我走嘅時候，佢過嚟講對唔住我都冇應佢，因為嗰一刻我有句說話差啲講咗出嚟（我唔想再受你氣），我知我講咗就返唔到轉頭，所以我只可以喊住走😭而佢亦由得我走。。。