今日放假，9點幾就起身出去同爸爸食嘢，然後去買餸，諗住等啲人起身後，我哋可以手拖手一齊去街。。。點知啲人粒聲唔出自己出咗去，嗰一刻好無奈，仲差啲爆咗句點解又係咁？

今日同啲人去深水埗。。。我又喊咗出嚟！因為佢又變番嗰個佢~佢同我講因為我係佢女朋友，所以好自然將啲情緒發泄響我身上，聽完我其實冇乜嘢講，只係響到諗，當佢咁樣我會好難受，咁我又發泄響邊個到？

去完深水埗我哋落咗旺角，今晚我哋去咗俾人畫畫，幅畫雖然唔似我哋，但其實我好開心，同時亦覺得幅畫好珍貴，我真係好鍾意~畫完幅畫我哋行咗陣就返去喇…因為我要趕住煮9個餸俾啲人聽日帶返工嘛！ 

尋晚瞓得好差，成晚都係咁咳，根本冇乜點瞓過。。。今朝又返早，個人超攰呀！

第一個星期六冇得同啲人一齊放假，種感覺好唔知點咁！食飯嘅時候我揾過佢，不過佢到好遲先覆我，嗰一刻我有種感覺佢係約咗人！收工落到去就見到佢企咗響到等我，其實我好開心，直到我問佢今日約咗邊個，佢先話俾我知係女仔😔嗰一刻我有啲失望，因為原來我男朋友會去邊同邊個一齊我係會唔知。。。加上佢呢排對我嘅態度，兼且每日一篇又突然冇晒，我好難唔諗佢係咪有另一個，又或者鍾意咗第二個😞第一個星期六已經咁，我真係好驚以後嘅日子唔知會點？或者。。。

今晚食完飯之後，我哋就去睇戲，其實我已經好攰，不過我真係好想攬住佢睇戲同對佢耐啲，揾番嗰啲失去嘅感覺。。。睇完戲行咗一陣，我哋就返去喇！響車我攰到攬住佢瞓著咗。。。 

今日返早。。。朝早買定早餐等啲人一齊返工，不過我自己就冇食，因為仲係冇乜胃口，兼且仲有氣速！今日食完飯開始好忙，返到去就已經不停做嘢，好快就到收工，收工之後已經散晒喇！

夜晚等埋啲人一齊收工，啲人今晚帶我去旺角，起初都好開心架！但唔知點解佢交收完之後，塊面就開始黑。。。黑到連我都唔想再講嘢😞我哋食完一風堂之後，我忍唔住whatsapp 同佢講（其實如果每次出街，你都係咁嘅樣，我寧願唔再見喇😔）呢句說話真係好沉重… 因為我真係唔知做錯啲乜~每一次都係咁，我真係好攰！ 

尋晚成晚都瞓唔到，無論點瞓都好，我都係抖唔到氣。。。食完啲藥都係唔得，條氣都係好速~今朝我請咗假，睇完醫生返嚟食完藥就繼續瞓，但好似好似都冇乜用咁∼條氣都係好唔舒服😔夜晚我就煮定嘢等佢返，不過就好簡單。。。啲人媽咪今日返，所以我哋只可以見得一陣😖

今日放假日。。。第一次返呢到真真正正放假啲人唔響我身邊，今朝我十點幾醒咗食埋藥，飲埋杯薰衣草蜜糖，我又再瞓過，瞓到點幾俾媽咪嘈醒咗，我就整嘢去買餸煮飯俾啲人！

今日都仲係好攰…周身都仲係好痛同未退燒！但都有堅持煮飯！雖然放平日得我一個，但我都好忙，因為屋企有大把嘢要整，成個人散晒！

今晚啲人收工就返咗，拎埋啲嘢俾佢，睇咗陣電視同幫佢換埋床單按摩完就返咗屋企喇！二人世界最後一日，我哋就響平淡中渡過咗。聽日又要返工喇。。。