尋晚食咗藥好早就瞓咗，仲要瞓到今朝十一點八，個鬧鐘又冇響到，即時嚇醒咗😰😰醒咗之後，個人依然好唔舒服，仲係好暈。。。

返到公司開完會就要食飯，之後就一直忙到收工~今晚專登補埋嗰半個鐘走，諗住可以早啲見啲人，點知佢仲遲走過我😪等完啲人我哋食完嘢就返屋企喇！幸好聽日放假，咁就可以瞓得晏一啲先去覆診同買餸∼ 

今日都係返一點，我瞓到十一點先起身∼起身之後個人好攰，仲要發燒同係咁咳。。。

返到公司都仲係係咁咳，食完飯就補鐘去睇醫生，睇完就繼續返工，不過今晚可以補鐘收8點，咁就可以早啲見啲人！

今晚食咗啲藥個人好攰，我見到啲人就攬實佢，佢又係為咗氹我食嘢，又帶咗我去 sogo 食八爪魚丸~不過我都係食得好小！食完嘢我哋就搭車返去。。。 

今日係返工日，雖然返一點，但我又一早起咗身😪😪返到公司開始有嘢做，個人好攰。。。因為係咁咳，咳到聲都變埋，而且又冇乜胃口食嘢，陣係好想好想攬實低能仔😭好掛住佢呀！

今晚補鐘收9點，見到啲人我已經攬實佢，本來佢話帶我去食嘢，不過我冇胃口。。。最後我哋去咗 sogo ，啲人想我食啲嘢，佢就帶我去食大阪燒氹我食咗啲∼食完嘢我哋就搭車返去！

今晚返到嚟我就即刻煮飯，因為假如今晚唔煮，啲人星期三同四都冇飯食架喇！我邊捨得餓親啲人吖∼ 

 今日係星期日，係今個月最後一個星期日嘅假期∼同時亦係我農曆生日。。。

今朝又係一早起身同爸爸飲茶，跟住就去買餸。。。成個人好攰好攰！返到屋企都成點鐘，啲人又趕住出去，最後都係各自響出面等！

有人今日要去參加食熱狗大賽，其實我唔贊成佢參加，因為要3分鐘食最多嘅熱狗先叫贏，但要一次過咁逼自己食，其實真係好傷身同胃。。。我唔捨得佢咁樣！不過佢要去，我只可以十卜佢…

陪佢玩完之後，我哋食埋下午茶，就去行街喇！啲人話補償返個生日俾我，要令我開開心心咁過！當然都有唔開心嘅時候…因為我有時真係唔知佢諗乜？當佢一黑起塊面，我就頭都大埋，加上我真係超攰，我唔知可以點😞😞

夜晚我哋維持住唔出聲去睇吳浩康，個心有少少難受∼去到嘅時候，我忍唔住問佢做乜？佢好悔氣咁答我冇嘢時，我忍唔住爆喊！好似將呢段日子嘅難受一次過喊晒出嚟咁！因為呢段日子除咗返工好唔開心有好大壓力外，依家我同佢放假唔一樣，每次都好似好難揾佢，甚至佢返到屋企都係咁😞我真係好擔心佢已經有另一個，因為我知我唔夠好，亦唔係同佢好襯。。。其實浪子又係咪真係會回頭？以後都唔會再犯錯？定還是個個男人都會好似吳浩康咁不停犯同一個錯呢？

今日星期六，又係超忙嘅一日∼忙到差啲連飯都冇得食😑😑結果我調咗5點個客，我先可以食個快飯！

今晚收工之後等啲人嚟接我，我哋食完飯行咗陣就各有各走，佢趕住交收，我就返去煮飯盒俾佢∼

低能仔，今晚你話唔知點解同我一齊會覺得特別攰。。。其實我一直都有呢種感覺，每一次當你面對我，你都好似會好攰，但返到屋企得你一個，又或者你自己出咗去，你都會好精神咁…你知嘛，呢種感覺令我覺得你已經唔想對住我，甚至越嚟越小揾我，我好驚有另一個可以比到你開心同精力😞低能仔，我已經逼自己唔去諗，但你今晚講完之後，呢種諗法同感覺又走番出嚟😞