今日都仲係休息，成日都留咗響屋企休息，食咗啲藥都係咁，但就好暈所以不停咁瞓，一瞓瞓到6點幾爸爸返！

今日爸爸生日，我哋同爸爸落咗海怡食飯，不過我都係食得唔多一食就痛。。。食完嘢就買埋外賣等啲人返！

啲人今晚成十點先返，我執埋去醫院啲嘢，就過佢到。。。今晚我哋冇講嘢，我等佢食完嘢執埋啲垃圾就走喇！搭的士出去嘅時候，我響到諗其實佢仲會唔會好似以前咁擔心我同掛住我呢？或者過多幾日，當佢去到韓國，就會有答案架喇。。。 

 今朝一早起身返工，本來諗住忍住痛捱到收工，但啲同事見到我咁，就叫我返去休息~我轉咗另一個醫生睇，希望可以好啲啦！

同爸爸食完嘢我就返去食藥瞓，而啲人就出咗去交收，今晚我煮完飯就過咗佢到，啲人食完飯就帶咗我去香港仔。。。我哋買完禮物俾爸爸，就去759濕平！啲人今晚真係俾我任買，不過我當然冇係咁買啦😌

今晚當啲人同我講個心形樽同個盒係另一個女仔送俾佢時，我個心即時一沉。。。因為我真係好驚，或者因為我哋最近真係好似差咗好多，加上佢又少咗 whatsapp 我，我真係怕會有人取代咗我😞

尋晚痛咗成晚，媽咪本來想帶我去急症室睇醫生，但我痛到個人好攰，結果一路痛住響張床，不知不覺瞓咗一陣，之後又痛醒咗😭

今朝一早又去咗睇醫生，醫生話如果我再咁痛落去，有機會會係膽石。。。不過點都要食兩日藥先，佢仲幫我打埋支止痛針，希望可以好啲！但其實我好驚，真係好擔心😞😞

啲人今日陪住我，但我哋冇乜講嘢。。。我已經覺緊去体諒佢，佢玩電話時我已經冇俾說話佢聽，佢唔出聲我亦冇講任何嘢~但當時間耐咗，我就好似習慣咗咁，好似都變到佢一樣咁！到佢開始憫憫哋問我做乜嘅時候，我覺得有啲委屈，因為佢話當佢靜夠想變番之前咁而我又咁樣，聽完之後我真係唔知可以點？好似當你想要一樣嘢，但對方又死都唔俾你，到你灰心嘅時候，佢又話想俾番你，但要你唔準諗，仲要即時好開心咁接受咁。。。其實真係好難做到，因為我都有感覺！

今晚我返到嚟雖然好痛，但我都有嗱嗱臨煮定飯盒俾啲人，我怕聽晚收工會好攰，返到嚟唔願郁啲人會冇嘢食。。。點知整好晒之後，我因為食咗藥個人好暈，撞咗埋到鐵門，右手中指即時係咁流血，嗰一刻我啲眼淚係咁流，但我分唔清究竟係我痛到流眼淚？定還是因為今日而流眼淚？ 

今日返一點，不過我9點幾就醒咗，個胃痛得好緊要，又屙又嘔。。。結果嗱嗱臨落四嬸到睇醫生！

晏晝食完嘢就返咗屋企，食咗啲藥依然都係痛，痛到坐都坐唔直。。。之後就一直瞓，瞓到六點幾~ 今晚我痛到冇見過啲人，而啲人好夜先返。。可能啲人會覺得我煩，因為我想知啲人幾點返，所以我揾咗佢幾次。。。對唔住呀！我只係掛住你😞 

今朝要開會，可以買定早餐等啲人一齊返工，真係好喇。。。開完會都成十二點，返到公司坐一陣就去食飯，之後一直都好忙，忙到七點就收工！

今晚真係好攰，原本返去煮飯等啲人，結果只係買外賣，加上今晚得我同爸爸撐枱腳，所以我同爸爸都係食外賣。。。

啲人今晚收工就返嚟，我哋終於可以二人世界喇！一齊行百佳，一齊睇電視，一齊玩，仲可以俾啲人抱住攬實我，呢啲感覺最真實∼但依然好想一齊放假響屋企二人世界。。。