尋晚又係咁發冷，仲要蓋住張被都係咁震，係咁出汗。。。成身都濕晒😪結果都係瞓得好差∼個人都仲係冇乜力同好暈！

今日終於都可以同啲人二人世界喇！啲人帶我去食好西，好耐都冇食過咁多嘢。。。病咁耐就介口咁耐，兼且冇晒味覺😖難得同啲人一齊，我梗係冇講我唔舒服，陣係想同佢開開心心咁過一日！夜晚我哋去咗 LUNA CAFE 到食嘢，不過我冇乜胃口，所以食得好小嘢∼食完嘢行咗陣我哋去咗 gogogo ，今日玩咗兩次，其實我之所以同佢去第二次 gogogo 係因為我好怕佢好靜。。。我好怕呢個環境！

玩完之後我哋就返去，因為我要趕住煮飯∼搞掂晒都已經一點喇！ 

今日搞掂晒啲嘢之後，我就去買餸。。。因為尋晚應承過啲人今晚煮餐好嘅俾佢，所以我專登去買和牛粒煮俾啲人食~

買完餸我就返屋企瞓咗陣，因為食咗啲藥好攰，而且個喉嚨仲好痛。。。聽日應該要睇多次醫生先得😞😞

6點幾醒咗就開始煮飯俾啲人，啲人8點幾就返咗，個傻佬好鍾意今晚嘅餸，見到佢食得開心，我就好滿足架喇！唔知仲要等幾耐，我先可以做一個真真正正嘅煮飯婆呢？每一晚都煮定飯等佢返。。。 

今日放假，但因為尋晚食完藥好早瞓咗，今朝十點幾就起咗身∼醒咗之後就同媽咪去食嘢同買餸，跟住就返屋企煮飯同食藥，搞掂之後就瞓咗∼

今晚睇完醫生打完針好攰，本來諗住等啲人返嚟同我食嘢，不過佢有啲夜先返，所以我煮咗個麵俾佢食！食完嘢走嘅時候，個傻佬唔小心踩到我，佢即時好緊張咁幫我睇隻腳，仲要幫我搽藥糕…望住佢呢個樣，我真係覺得好幸福呀！低能仔，多謝你咁錫我呀😘 

 今日係2018年第一日，估唔到要食藥中渡過，一早起身搞掂放假啲嘢，就繼續瞓覺。。。瞓到十一點就起身去睇醫生，同爸爸食埋嘢，我就返屋企食藥開始大昏迷，啲藥搞到我好暈呀！

今晚啲人帶我去睇戲同食🍕，明明喉嚨痛得好緊要，但有佢陪我食，我又食得多咗，仲覺得好好味添呀！食完嘢就去睇我哋2018年第一套戲（玩轉極樂園），雖然呢套係卡通片，但我覺得好好睇。。。可以攬實啲人咁睇戲，真係好舒服∼我好想以後睇每一套戲，都係同啲人一齊睇！

話咁快又一年喇！其實今年過得特別難捱，亦係最迷惘嘅一年…

二月嘅時候，我離開咗舊公司，轉去IM做一個美容師，壓力大到不停瘦落去，每晚都失眠~結果辭咗份工，休息到7月先開始 oasis 嘅生捱！雖然到咗呢一刻我都仲未知自己係咪真係鍾意呢一行，甚至係咪真係適合呢份工作，但我真係有努力咁去做，因為我俾其他人遲起步，所以要付出更多嘅努力，我只係希望可以令自己盡快知道究竟適唔適合！

五月係我最開心，亦係最難過嘅時候，開心係我同低能仔嘅4週年紀念，我哋嘅東京之旅∼但唔開心嘅係，表弟響5月20号選擇咗結束自己嘅生命~呢個仲係未令我相信嘅一件事，或者應該話係唔想相信嘅一件事！

而我同低能仔之間，亦出現咗好多大大小小嘅問題同矛盾，令我有想離開嘅時候。。。我睇唔到將來條路點行，亦唔知點行？！但幸好我哋都撐得過！其實到咗今日我依然好愛好愛佢，依然好想嫁俾呢個人∼希望2018年我哋都可以繼續咁愛對方！成為對方更親密嘅人∼