尋晚收工之後，就趕返林德华到睇醫生，食咗啲藥個人開始好攰，結果不知不覺咁瞓著咗∼成晚都冇見過啲人😞好掛住佢！

今日返早，返到公司主管捉住我傾計，估唔到佢已經知佢放大假時所發生嘅嘢！其實我真係好簡單，不論對感情，家人定還是工作，我都只係希望簡簡單單，我唔鍾意將啲嘢複雜化，是非我真係唔鍾意，所以我好多時都選擇唔出聲。。。我寧願自己一個人！不過我知道呢行冇可能冇事非😞

今晚收工，啲人嚟咗接我，不過佢病咗。。。我哋食完嘢之後，我就去買藥俾佢，其實我想佢睇醫生多啲架！行咗一陣我哋就返去喇…聽日就係2017年最後嘅一日，希望我同佢都可以開開心心咁渡過！

 今日返晏，但又係9點幾起咗身。。。點解每次都係咁？

返到公司已經有客，原本以為個 consultant 放假，我就會過得好啲~點知佢臨去台灣前都留啲蘇周屎俾我！唉…好嬲呀😞😞😞

今晚收工啲人就嚟接我，我同佢講我請佢食好嘢，因為心情真係好差。。。好想食嘢嚟平衡一吓自己情緒！點知個傻佬唔捨得我用咁多錢，只係同我去食公仔麵，雞蛋仔同魚蛋燒賣！呢啲老公響邊到揾吖😌

食完嘢就趕返屋企煮飯俾啲人…煮埋今餐就要等2018年先有愛心便丼食喇！如無意外應該係😂

今日聖誕節嘅最後一日，幸運地亦係我嘅假期，可以同啲人一齊放假，一齊去玩∼

今朝其實十點幾就醒咗，起身食完藥又再瞓番！瞓到差唔多一點先起身∼醒咗整埋啲嘢就過啲人到喇！

今日啲人帶我去玩，我哋去咗將軍澳go go go 。。。雖然只係白玩，但我都好開心架！去完將軍澳我哋又去咗中環，嗰到真係好靚∼而且仲好浪漫添！響中環嘅時候，唔知點解我係特別開心，笑得開心過響將軍澳嘅時候！或者因為中環俾我感覺真係特別浪漫，加上啲人拎住部相機係咁影我同個閃燈氣球！

今晚我同佢講咗我嘅感覺，最近我嘅安全感大跌，兼且壓力已經去到爆燈嘅地步！但我需要嘅真係好簡單，只係想佢用心陪我傾吓計，行吓，甚至氹吓我，我就足夠！而物質上嘅其實我真係唔係好需要，只係有時我得唔到安全感，我就會想佢買嘢氹我，令我覺得自己響佢心裡依然存在！但我每一次到最後都唔會捨得要佢俾錢。。。 

今日係聖誕節，都係返工日😖而啲人就繼續放假。。。我都好想同啲人一齊放假呀！

今日成日都冇客， on 居居咁等收工，朝早瞓低俾同事練機，下晝就俾人點去做阿四😪到兩點先去食飯∼食飯嘅時候，我好掛住啲人，不過都係打唔到俾佢，其實嗰一刻我係有啲憫架！因為我真係好怕佢失蹤~

今晚啲人嚟接我收工，其實我好開心架！啲人帶我去灣仔食飯同行街，去到囍帖街我覺得好靚，望住啲情侶響到自拍，我的確好羡慕∼我又點會唔想留住同佢過嘅每個節日？不過當我諗到每次叫佢同我一齊影相，佢都會話佢唔鍾意影相，所以我就冇出到聲。。。點知佢黑面話走，因為我唔同佢影相😞嗰一刻我好無奈，因為我唔知點適應！

行完街我哋就返屋企，原本想上啲人到，但因為要煮定飯盒俾佢，唯有嗱嗱臨返去煮飯！

聽日就放假喇！希望我同佢都有一個開心嘅假期，冇黑面，冇眼淚，只有笑聲∼ 

 今日係平安夜，但我一啲都唔平安。。。返工唔平安，就連收工都一樣唔平安😞今日應該係我嘅黑色星期日！

今晚收工之後，我就嗱嗱臨執嘢走~因為我一直都覺得聖誕節係一個好浪漫嘅節日，應該同一個好愛嘅人一齊過，我真係唔使好名貴嘅禮物，好浪漫嘅晚餐，我只係想我嘅聖誕節有佢陪響身邊，開開心心咁過就足夠！

今晚見到佢之後，我已經冇咗諗返工嘅事，但我隻手依然控制唔到揸實個拳頭（其實已經響好耐之前開始咁）不過我為咗令佢唔知，我一直都扮冇嘢，就好似以前咁笑…之後我哋因為食飯嘅問題，佢又開始黑黑哋面，嗰一刻我 down 上加 down 。。。同時亦不停諗佢下晝失蹤嗰段時間去咗邊呢？

食完嘢我哋去咗行吓，開頭都好開心架！但後尾我同佢講完笑，佢又開始好黑，我亦唔想再行落去，我一直忍住啲眼淚唔想流落嚟，但最後都失敗咗∼當佢行去入八達通，我望住佢背影，我真係唔想再係咁，唔想再撐落去。。。其實我忍住唔講出口，直到佢攬住我時，我忍唔住講（我唔想再行，唔想再自己一個行落去）講完我就停唔到喊晒出嚟，好似將返工嘅唔開心都喊埋出嚟咁！好攰。。。真係好攰😭

我知道自己最近真係好冇安全感，覺得搞到好似有抑鬱症咁。。。其實我真係只想同佢開開心心！