今日係情人節，亦係我年假前最後一個工作天！我等咗今日已經好耐喇…

今朝返早，我一早返到去已經有嘢做，由開工做到收工，今日俾起尋日更攰，因為我今日啲客平均一個要做成兩個幾鐘😞今晚收七點，但我收工嘅時候，都仲未起模，幸好有同事幫手咋，如果唔係都唔可以咁早走呀！

收工之後趕去銅鑼灣接啲人，啲人拎住扎花行過嚟，我覺得好幸福呀！不過最衰周圍都好多人，想食嘢係一件難事。。。本來我諗住求其食啲嘢，但啲人唔肯，結果帶我食放題！今晚我好開心，開心唔係因為啲人捨得洗錢同我食嘢同買花，而係佢成晚都攬實我，又同我傾計又冇黑面∼其實咁樣我已經覺得係難忘嘅情人節！

低能仔，好多謝你陪我渡過咗第五個情人節，呢五年我真係好幸福，亦認定咗你係我要揾嘅人，希望嚟緊嘅每一年我哋都一齊幸福快樂咁過！ 

地獄式嘅生活仍然繼續。。。過年前真係忙到瞓響到😪😪幸好返埋聽日，就有一連五日嘅大假咋！

今日忙到冇乜時間揾啲人，我其實都想知我冇揾佢，佢又有幾掛住我呢？今晚收830，我收工後就落銅鑼灣接啲人，食完飯我就同佢去買藥同潤唇膏，不過買完之後，我見到啲人嘅前女友，其實我嗰刻好驚啲人見到佢，我驚我真係驚。。。因為我呢排見親佢，佢都會好易唔開心，所以我先咁驚佢會唔鍾意我。。。

聽日就係情人節，希望我同佢有一個甜蜜嘅一日啦！ 

今日放假喇。。。不過尋晚好夜瞓，今朝又好早起身，加上最近真係好忙，所以個人其實仲好攰！而啲人我就俾佢瞓晏啲，我想佢抖耐啲，所以就晏啲先出去∼

我哋今日成四點先出街，出到去我哋去咗食我最愛嘅上海嘢，之後又買串燒食😍啲人仲買埋椰子糖俾我添呀！夜晚我哋就去咗揾大大與小妹，啲人買咗風車同咕𠱸俾我，小妹仲響風車上面寫咗句幸福快樂俾我哋，我真係希望我同啲人可以好似呢句幸福快樂咁一直到老！

其實今日我過得好開心，我發現我依然好似當初咁，好鍾意望住啲人，或者因為我覺得我好好彩，可以揾到我嘅大大，仲要咁靚仔😌（不過啲人成日以為我係監視囉！）但唔知點解每次當佢秒回變返黑面同唔講嘢，我就不知所措。。。我好怕呢種感覺😥 

今日返早。。。起身成個人都超攰，尋晚瞓得好差，成晚都發惡夢😪基本上同冇瞓冇分別。。。

今日都係好忙，超多客嚟做 facial ！又係做到冇飯食…不過我一路做一諗究竟應該買乜情人節禮物俾啲人？其實已經諗咗好多晚，我有諗過買頸巾自己繡佢個名上去，我又諗過買套衫加外套俾佢過年著，更諗過買鞋俾佢，亦諗過買按摩器，最後都係決定買眼部按摩器俾佢~因為佢成日都嗌眼痛，呢樣應該最適合佢！

今晚收工之後，我就去灣仔同屋企人食團年飯，不過冇啲人響身邊，我覺得好唔習慣！原來我已經習慣自己嘅生活係有佢響到，不論咩日子，節目，我都好希望佢響我身邊~今晚食飯我成晚都好掛住佢，唔知佢響邊？唔知佢有冇掛住我？唔知當我唔響佢身邊佢又會唔會覺得開心呢？

食完飯同家姐佢哋行咗一陣，買埋份情人節禮物就返去，今晚我哋都有見，響屋企過咗一陣二人世界，同試咗嗰個眼部按摩器，啲人就俾咗兩份小禮物我，一份係安仔真係好靚仔嘅演唱會DVD ，另一份係B女嘅新衫，呢個爸爸終於第一次㨂衫俾個女喇😭😭我好鍾意呀。。。最開心係啲人仲送埋我返屋企添😍 

 今日已經第五日，好攰呀。。。每日都 full晒，個人真係散晒💤幸好返埋聽日就可以放一日假，咁就可以同啲人去 relax relax 一吓，諗起都開心呀😌😌

今晚收工後，其實已經好攰，條頸同個頭都痛咗成日，但見到啲人之後就扮到冇事，因為我真係真係好掛住佢∼雖然我哋都係食完嘢行一陣就返屋企，不過只要見到佢，俾佢攬吓錫吓同傾吓計，我就已經好滿足！