今日返工，一返到公司已經有客。。。做完個客都兩點幾，食飯嘅時候睇 whatsapp 先知啲人早走返咗屋企，我其實好擔心佢，又怕佢餓，又怕佢好唔舒服！但幸好佢都肯乖乖哋去睇醫生…

臨近新年好多人嚟做 facial ，我今日全日都好忙，本來收930，但最後都搞到成十點先收工！收工之後就趕返去買嘢俾啲人食，不過咁夜，只係得7仔可以選擇∼

每逢病咗嘅佢都特別嗲，我好享受呢種感覺，因為我知道當佢好番之後，一切都打回原形，我哋或者又會去返之前冇嘢講，甚至乎可能一齊出街都好似自己出咁。。。我唔想咁樣！其實我好想同佢開開心心，乜都一齊面對，一齊做架！只可惜。。。

低能仔，我仲好期待同你一齊食團年飯，一齊過新年，同以後每一個明天！

 呢幾日食藥食到呆呆哋。。。除咗瞓，就食藥，完全冇胃口同精神！其實呢幾晚佢 whatsapp 我，我都仲未瞓，不過我辛苦到冇覆過佢，由佢以為我已經瞓咗，我唔想佢擔心。。。呢排真係瞓得好差😞我已經病到有啲絕望喇！

今日放假。。。一早起身就去咗覆診，之後就返咗屋企∼

啲人晏晝帶咗我出去，雖然食咗藥又暈又攰，但我都有不停揾話題，希望同啲人開開心心咁過一日∼只可惜事與願違！

食完嘢走嘅時候，餐廳嗰個男仔撩我講嘢，之前都有問過我拎電話。。。嗰一刻我真係好想知啲人會唔會呷醋？仲有冇好似以前有人追我時咁緊張？不過一切都改變晒，佢已經冇乜反應喇。。。只係講咗句個男仔係人都撩！

之後我哋去咗行街，但我已經冇嘢講喇。。。因為我唔知幾時我嘅嘢啱佢聽？幾時又唔啱？我哋雖然拖住手行，但我覺得好似得我一個出街咁😥種感覺好辛苦。。。直到佢話可能係因為佢自己難相處時，我真係覺得呢個係藉口，亦唔係一個理由！點解前幾年我哋仲相處得好好？依家突然先變到咁？嗰一刻忍唔住喊咗出嚟…我返工都有壓力，每日幫咁多人按摩都好攰，食咗藥又暈又攰，返去仲要顧住煮飯，都一樣冇自己時間，但都顧及佢感受為先，見到佢都想佢開心，照樣幫佢按頸，揾話題同佢傾。。。但漸漸我發現原來得自己一個講，我開始唔想講嘢，甚至唔想見佢。。。我知自己已經企咗響牆角喇！或者個相士講得冇錯，今年結唔成婚，可能真係會分開😞 

尋晚瞓得好差，因為成晚都發惡夢~夢見啲人響我面前錫個小三，之後俾我發現原來每晚佢返到屋企，都會帶唔同嘅女仔返去😭😭我響夢裡面喊到死，仲走咗去跳海😭😭嗰種感覺好真實，跳落海嗰一刻嘅離心力大到我嚇醒咗！醒咗之後我響到諗，假如現實中我真係遇到佢係咁我又會點呢？我相信一定會同個夢境所發生的一模一樣，因為我知道失去佢，我等於失去全世界！

今日返工日，返到公司已經有客，一直做到三點先食飯，食完返去就考試，點知一幫個同事洗面，佢就問我做乜未好返就返工？原來佢feel 到我雙手好熱，仲即時拎探熱針幫我探熱😰最後要我退晒燒先可以返工。。。。。。。

今晚冇見過啲人（其實都唔算冇見過，因為佢send咗張自拍照俾我）我收工就嗱嗱臨返屋企。。。今晚好 lonely ，獨自食咗個 lonely 7仔。。。禾巧想你喔！

今日放假，尋日食咗三次中藥之後，今朝起身雖然仲係好痛，但明顯消腫咗好多。。。

晏晝同婆婆飲完茶，我就去買餸煮俾啲人食，跟住就趕返屋企煮飯同煲糖水。。。今晚煲椰汁紫米香芋露😋其實煲呢個俾啲人食係有原因架！因為紫米具有很高的營養價值，它含有多種維生素、礦物質、鐵質，以及天然黑色素與4種必須氨基酸,而芋頭含有一種黏質，可以促進肝解毒，鬆弛緊張的肌肉和血管，而且因為芋頭的澱粉顆粒比較小，僅為馬鈴薯的十分之一 ，唔會肥之餘，仲對佢好好添。。。希望佢鍾意食！

今晚啲人又遲咗返，佢返嚟食完飯，坐咗一陣同玩咗我一陣就走喇！我哋好似越嚟越小見，越嚟越小嘢講喇。。。