今朝一起身，心情就超好，因為尋晚訂機票嘅時候都仲係三月，總係覺得要等好耐先可以到五月，但今朝一瞓醒就已經係四月一号喇😍下個月就係我哋五週年，我哋就可以去我哋第一次旅行嘅地方😌😌

今日返工超忙，忙到冇飯食😞😞不過好好彩四月嘅第一日就爆數，呢個月可以唔使咁大壓力，陣係俾心機做 facial 賺工錢同賣 product 就得喇！

今晚收6點，啲人等我收工，我餓到食咗好多嘢，而啲人就買咗好多嘢俾我返工食😂好開心啲人呢兩日都對我特別温柔同細心😍其實咁樣相處係最舒服，或者因為我又食晒啲藥，個人冇咁吽同憫，所以我哋之間磨擦都少咗！我只希望我哋一直咁樣相處落去直到老😘 

今日啲人第二日假期，而我亦係要返工嘅一日，不過我今日真係超掛住佢，一路做嘢，一路諗住佢，好想好想見到佢！

今晚收工啲人嚟咗接我，我哋去咗食和民，其實啲人都只係想就我食我鍾意嘅嘢，佢同我食完嘢我哋就去IFC 行，啲人仲同我去咗買我最愛嘅海鮮做我嘅宵夜😍但其實太貴，咁啱嗰到又唔收EPS ，啲人為咗氹我開心，先買俾我食！不過我決定聽日俾番錢佢，因為我唔捨得要佢俾咁貴嘅嘢食！

夜晚返到屋企，我就好努力咁睇機票，因為啲人應承我哋嘅五週年去台北同我過😌最後經過家姐同Mandy 嘅協助之下，俾我揾到平機票同酒店，雖然比原定早咗一晚去，但起碼個傻佬第二朝真係可以瞓晏啲，而且又唔使怕唔知醒要趕飛機，去到食埋個宵夜就可以返酒店休息到第二朝，咁樣應該係對佢最好😂雖然兩個月內去兩次旅行真係好癲，但只要係同啲人一齊，我就最心滿意足∼期待5月快啲到啦！我要同啲人去食燒肉😋 

今日係一連四日嘅復活節假期嘅第一日，亦係我連開四日早嘅開始！啲人就爽啦。。。可以放咁多日假！

今日成日都不在狀態，因為啲藥攰到死。。。。雙眼根本睜唔大！幸好用埋張 lunch尾咭，可以早走一個鐘，收6點同啲人食飯行街！

今晚啲人好準時咁響樓下等我，我哋響中環行番落灣仔，唔算太熱同太凍嘅天氣係最舒張，啲人同我去利東街食飯同濕平，種感覺好似返番日本咁，或者因為今年最遺憾係唔可以同佢開開心心咁過呢個假期，所以總係好想揾番失去咗嘅感覺！

今晚返到屋企，我一直響到諗五週年同佢去澳門，但家姐話假如澳門個價錢都要三千幾蚊，點解唔去台北玩三日兩夜？嚟個台北美食快閃團？其實聽落好吸引架。。。因為我真係想同佢可以嚟多個甜蜜之旅2018，好想彌補番大阪嘅唔開心！ 

今日返工喇。。。仲要返早，個人超攰，有一刻真係唔想返工∼

今日成日都好忙，full booking 😪除咗十一點有時間食咗個早餐當 lunch 之外，之後就一直忙到收工。。。收工之後成個人都散晒喇！

今晚放工就返咗屋企食飯，啲人話9點半返，但到咗十點佢都未走，因為我太攰，所以就叫佢返屋企先😞😞今晚又冇得見喇！仲記得上星期嘅呢個時候，我哋應該食完串燒去咗gogogo ∼我好掛住嗰時好hea嘅時候，好想去多次旅行，好想去一個真真正正屬於我哋嘅甜蜜之旅！無唔開心，冇黑面，更冇發皮氣，只有笑同甜蜜！但要等幾耐呢？ 

話咁快8日假期完結喇！呢一個星期響大阪雖然唔算過得開心，亦有想返香港嘅衝動，但有啲人響我身邊，係我最想嘅事！

呢個星期我有諗過其實我可唔可以同佢一直到老？因為佢呢個星期好似變咗另一個人咁，我覺得好似好難相處咁。。。我唔知應該點算好！我好愛呢個人，好想同佢一直到老，但我呢個星期裡面，我感覺到佢根本就唔鍾意我，佢唔會再好似以前咁照顧我，亦冇點理過我，我就好似自己嚟旅行咁😞我真係好想知佢諗乜？假如真係唔再愛我，又或者已經愛另一個，我寧願佢話我知！