已經嚟到第四日，呢四日我哋都冇乜點講嘢，我有種感覺好似自己嚟咗旅行咁。。。搞到有啲想自己返香港！

今日依然好凍，原本想去京都，不過啲人太早起身，最後我都係放棄咗。。。我哋響梅田付近行，同買手信，行到夜晚先返翻屋企付近食嘢，今晚我好想食烤肉，好想食力丸，所以我要啲人陪我去。。。

響食飯嘅時候，我同佢講我死咗心係真架！一直以為嚟到大阪會好啲，但原來都係一樣，佢唔舒服我明，因為我都唔舒服，佢冇得瞓我亦明，因為我都逼住同佢冇得瞓。。。佢攰我亦体諒，但我比佢更攰！我唔想大家都冇嘢講，陣係睇住佢黑面同唔理我。。。我陣係想大家開開心心去過旅行咋。。。死心容易，但要變番以前咁又可以要幾耐？ 

今日係第三日響大阪，尋晚冇乜點瞓之後，今日個人超攰，不過我個 bb就瞓得超爽。。。每晚都打醉拳，睇嚟想瞓得舒服，就要返香港先得喇！

今日我哋去去咗天神橋同天王寺，有人好叻咁帶我去咗條天神橋睇😅咪我係咪好靚。。。其實今朝嘅對話應該係咁：

👶：今日想去邊？

我：今日想去天神橋，嗰到有個地方好現

（拎住本書指埋佢睇）

點知去到之後。。。

👶：你話要去天神橋睇條橋，話條橋好靚吖嘛！

我：我無啦啦點會為咗睇條橋而山長水遠嚟？我係想去嗰個大阪昔日🙄

👶：咁你又想去天神橋？

我：咁呢個地方名真係叫天神橋吖嘛😰

就係咁我哋兩個又行咗更遠嘅路，但都係開心嘅，因為可以同啲人一齊，不過今日就好凍同大雨。。。

去完睇條橋，我哋就去天王寺，我終於可以濕平喇。。。雖然基本上都係買俾家姐，但呢一刻我好似真係將最近返工嘅壓力減返出嚟！我哋買完嘢又去 gogogo ，我唔介意用咁多錢去玩，亦冇諗過同佢計，因為我只係想佢開心！夜晚我哋又返心齋橋再玩過！

低能仔，對唔住呀！呢幾日我真係咳到好辛苦，食藥食到好憫，所以可能對你敷衍咗啲，希望之後幾日可以好似剛拍拖時咁 sweet啦！ 

今日係第二日響大阪喇。。。尋晚算叫做瞓得多咗，不過今晚就冇得瞓，因為啲人瞓到好似打風咁，我一瞓著咗，就俾佢整番醒😭兼且仲要冇位瞓😪加上成晚不停咁咳，食咗啲藥又好攰，個人好辛苦！

今朝鬧鐘響咗之後，我就起身收埋啲衫，整好晒我自己啲嘢先叫佢，不過佢依然都係唔願醒。。。望住佢瞓得咁舒服，我都唔捨得叫醒佢！結果我成十二點幾先摷得醒佢…

今日我哋成日都留響梅田，不過就落雨。。。有啲似我嘅心情咁！其實或者我哋之間真係淡咗，所以好似對今次旅行都冇特別 plan ，亦冇好興奮咁。。。種感覺就好似平時響香港咁平淡！除咗 GOGOGO嘅時候，我同佢好似距離近啲之外，其他時候都好似嗰種好朋友嘅感覺咁。。。而我就好似為咗拉近我哋嘅距離，就只能同佢GOGOGO，因為只有嗰一刻我先感覺到自己嘅存在！

呢兩晚我終於知啲人成日講嘅同床異夢係乜喇！原來當兩個人瞓響同一張床，佢有佢瞓，我有我煲劇，甚至佢唔再會瞓瞓吓攬住我，種感覺真係好寂寞。。。我好想有番比人照顧同緊張嘅感覺！ 

話咁快就到去大阪嘅日子喇。。。種感覺好唔真實！今朝五點幾就整嘢去機場，或者因為尋晚冇瞓過，加上仲係係咁咳，個人其實有啲憫憫哋😞今年我哋提早咗兩個月去我哋嘅週年旅行，雖然都係嚟大阪，但我想同佢睇櫻花，所以就提前嚟♡希望我哋真係有個甜蜜之旅啦！

嚟到大阪都已經下晝一點幾喇！搞掂晒啲嘢就返咗住嘅地方，然後就真真正正開始我哋嘅甜蜜之旅∼今晚我哋去咗心齋橋食燒肉，其實都好味嘅，不過就叫得太多😂食唔晒囉！但唔緊要啦。。。一年先一次，最緊要係佢開心！

食完嘢我哋就四圍行，仲去咗 gogogo。。。啲人夾咗隻大 bob 俾我呀😱我真係超鍾意呀！不過我哋玩咗好多錢！玩埋呢個旅行，返到香港就唔可以咁玩架喇∼

唔知點解今次嚟到大阪對佢感覺好似唔同咗，我依然會樣樣以佢為先，為佢打點一切，但就好似同以前好唔同。。。感覺佢對我其實都淡咗，而我對佢究竟係淡咗？定穩定咗呢？唉。。。都係唔理咁多，有乜都過埋呢幾日先算啦！ 

 今日係超忙嘅一日，由開工做到收工，仲要 OT添。。。食咗啲藥個人都已經好攰，幸好頂得住咋！兼且今日好好彩咁開咗10萬，咁都唔使咁驚咋！不過仲有廿萬等緊我😭😭

收工之後諗住可以見到啲人，點知啲人陣係話響上環，開頭話要十點走，跟住又話十點半先走得，我又唔知佢去上環做乜？我揾佢佢又冇覆，我唔知應該響邊到等佢😞結果我落咗灣仔，企到十點半左右佢先覆我，佢仲未搞掂。。。我知道應該仲有排等，其實我嗰一刻有啲失望，因為我好想見佢，但最後我選擇乜都冇食自己返去。。。😞😞今日陣係食得一餐咋！

過埋聽日就去大阪喇。。。我計過要5點半起身，希望啲人真係醒到，唔會好似佢去韓國咁啦！