寻晚，接到个不速之客嘅电话。虽然係意料之外嘅电话，但係意料之内嘅内容我大概都估到。

      其实我觉得我已经够晒了解你啦，寻晚电话嘅内容，我知你唔只净係同我讲，我都唔係你心目中咩好重要嘅女人。你爱嘅係你自己，可能你觉得只要我再可以接受返你，你心入面会比较好过。你要嘅係一个可以接受你，原谅你所有错嘅女人，而唔单单係我一个。你话你已经变咗，喺呢大半年里面，你嘅转变我唔知，都唔清楚。但你依然係咁自私。如果你设身处地咁企喺我立场谂，寻晚个电话根本就唔存在。咩叫回到过去，如果你知咩叫过去就知再冇可能。

      你话你嘅错在于新鲜感。对，新鲜感确实好吸引。不过请你唔好为自己嘅不忠揾借口，唔好为自己嘅自私揾理由。你话我仲嬲紧你，前几个月可能我仲会。我翻旧账以事论事，只係想同你讲返我大半年前就想同你讲嘅说话。但係呢半年发生太多嘢，人係会变。太多嘅自以为是只会伤害自己。爱与被爱，我选择咗被爱。要我再用宝贵嘅时间去爱一个人，好难...

      如果寻晚你讲嘅嘢係我哋仲一齐紧嘅时间讲，我会好感动。不过timing已经过咗，我有我嘅忙碌，你有你嘅生活。冇交集嘅两个人，爱情只係纸上谈兵。

      你称呼自己做贱人，不过我习惯叫你做某人。我唔想承认自己曾经爱上嘅係一个错误、一个不值得自己付出嘅人。我知道自己当时自己有几弱智，当你为咗你嘅新鲜感出轨嘅时候，我讨厌自己所做过嘅行为。你话我冇去争取你...我好懦弱，如果要我争取一段逝去咗嘅感情，我宁愿争气。呢个就係我嘅答案...

      由寻日开始，我又开始邪神附体喇∼

      寻日做咗一日，原本觉得好哋哋。点知后尾睇封包，呢个又冇签名，嗰个又冇留身份证复印件。唉...何必偏偏选中我呢。于是好严格嘅馨馨(新主管，其实份人好好架)，要我自己走去揾返个客签名，佢话唔痛苦下係唔会上心个喎。我好惊，好惊好似上次咁要走返去揾个客。于是我哀求咗佢一阵，谂住都冇可能架喇。好好彩，最后馨馨都係打救咗我，叫我自己搞掂佢。以为大难不死就有后福啦。原来今日先嚟大嘢，从中午落去食饭前碰到个颠婆后，成个下午遇到3个有心理问题嘅客。

      总结一句就係，个个都话我邪。唉...

      我今年返咗乡下拜山架。唔好玩我啦...今日真係好灰架，仲一度好怀疑自己生坏命∼

      8点到，谂住自己一个衰衰咁就返屋企架喇。但死心不惜，谂住黑框都就走，所以一路上都放慢咗脚步。结果望咗好耐都唔见人，见到部车准备走之际，佢居然喺我后面跑上车。好惊喜...好在喺咁黑嘅一日，返屋企嘅途中有个男人安慰下自己。哈哈哈...好似发仔寒咁。

      近排听返呢首歌，觉得好好听。过去2年嘅暑假入面，我嘅世界只充斥住某人嘅身影。到咗今年，我习惯咗返工代替假期，上班当成娱乐嘅生活。生活里面，有冇某人似乎不再重要，大不了就係感情路上嘅一个过客。

      唔知当时嘅自己係冇知定蠢，不过而家总算认清咗真相。只可以讲，尚算满足现状。

      而家每日嘅返工，都觉得充满希望。因为可以见到佢。戴黑框嘅你认真做嘢嘅时候好吸引，讲笑嘅时候好似细路仔好得意，连瞓觉嘅动作都好迷人。中午落台食饭，原本以为你已经食咗饭，唔会再入茶水间陪我。但唔知点解，你居然入咗嚟，虽然冇讲咩，你就趴咗喺台面瞓觉。我又开始咗我弱智嘅谂法...哈哈，唔通佢想入嚟陪我??

      就係咁，我一边食饭佢一边瞓觉，度过咗我无聊嘅时间，好开心...

      呢个周末，我哋高中同学搞咗次聚会，就喺寻晚。其实就係有6个以前好玩得埋同倾得埋嘅见下面咁。原本仲应该有阿秋同王翔，不过人哋太忙啦，冇时间抽空见我哋。所以，我、王羽、陈剑兵、黄乔欣、邓文钊仲有黄丽萍聚咗一晚咁。见返王羽，觉得只死婆靓咗好多，佢9月份就话去澳洲啦，咁多年好朋友要分隔两地，唔舍得...

      6个人，9点几先约喺淘金饮嘢。间Pure嘅红酒好麻麻，结果自己冇食晚饭，仲饮到有啲wingwing哋，好在后尾去咗钱柜食buffet时食返好多嘢填肚，冇事了。结果寻晚颠咗一晚之后，5点几先返到屋企。瞓咗几个钟又话去食饭，因为婆婆生日。香港嘅阿姨同表妹都返咗嚟，好冇精神咁又走咗去食饭。我仲俾咗钱婆婆生日，虽然係阿妈交代落嘅。哈哈∼

      结果婆婆又封返利是俾我，打咗个和波...之后又接到Grass电话，话嚟个聚会咁。但实在太忙啦，婉拒咗之后，又同咗斌少去诳街街。差啲买咗只表，不过有啲犹豫，所以未买。结果去大禾食咗餐融嘅....哈哈。

      完美嘅周末呀....朋友比恋人更高分。

      呢个星期，係入咗中行以嚟最投入、最努力、最有成就同埋就係最发姣嘅一个星期。哈哈哈∼

      自从入咗西华，识咗某人，开始走出咗以前嘅阴影，对呢份工我只可以讲，过得去了。星期一开始到寻晚，平均每晚都8点半先走人，尤其星期四晚9点半先走。听落好似好吓人，一日工作12个钟喎...连斌少莎姊都话颠架。不过有个动力支持住，就係某人。除咗佢星期三休息我觉得宁舍失落之外，呢个星期做嘢都做得好开心。寻晚又可以一齐搭车走喎，嘻嘻...

      每日都可以咁啱一齐落柜食饭，可以倾下计讲下笑咁。之前讲过话唔会再中意呢类型嘅男人，结果又係自打嘴巴，好丢架∼不过佢已经有女朋友了...所以喺另一方面我是理智的，大概只係想喺工作嘅地方揾到个动力我就满足啦。

      喺西华做嘢，真係识到班好好嘅人。冇架子又倾得计，比起东风西，好太多了。话就话我係借调过西华，但係我已经有种唔想离开嘅感觉啦。