乐极生悲??但好似与我冇关。因为冇咩乐事发生喺身上，不过我发觉自己真係狗屎命...

      十一点几，芹姊俾电话我话我捆钱少咗成千蚊。当时我成个人腾晒，好惊!!之后过咗冇耐，芹姊话真係揾唔到，问过周行之后要返去垫返一千蚊先。回想返星期五埋数嘅时候，我係冇错架∼我肯定自己嗰日唔会发生咁嘅事。打的返去嘅途中，真係好想大喊，因为呢个时候就算你同大家讲你冇错，依然冇人信你吧...事实就摆在眼前。

      返到去，交低咗钱之后，我都唔想再久留，立即离开咗。至于係咩原因，我当然好想知，不过唔係今日，因为思路好乱。呢件事嘅发生，我第一个谂法係我应唔应该顺便辞职。但係我发现，如果我而家走，代表嘅只有咩叫落荒而逃。我唔想再做逃避责任嘅弱者。喺爱情方面我係，但我唔希望连事业都係。就算走，我都要将呢件事查到清清楚楚、明明白白再走...因为我始终信自己!!

      人生在世，一定会有好多考验。既然改变唔到，就等自己去改变啦∼

      好似Winne咁，如果人都死咗，就咩都做唔到。我唔要做怕事嘅懦夫，等呢件事解决咗，去留再决定吧...

      不抱希望，才不会有失望。摆喺眼前嘅事实，我净係想佢真相大白...俾返个公道我。我唔係成日做错嘢而又冇责任心嘅人。好后悔当事情发生嘅时候，揾咗爸爸...自己嘅事以后就自己扛。

      寻晚，係莎姊嘅生日，一大班人去咗金矿帮莎姊庆生。之后又去咗沐足，好似迷上咗呢样以前觉得痛苦嘅节目，大概係因为上咗年纪。

      一眨眼就廿几岁人，真係觉得时间过得好快。数数下，原来识咗莎姊都好耐下了。想想这几年嚟，大家经历的，都係互相扶持走过来的。寻晚首<我们相爱6年>真係谂返好多∼

      之前喺某人Qzone度话看待爱情就好似听<涟漪>。但我觉得，<追>更适合吧...虽然一向都向往平淡嘅生活，但边有咁容易。现代人，个个都为两餐忙碌，假日里，又话行街唱K睇戏食饭。几难得话有个平静嘅一日∼ 到咗过平静生活嘅时候，应该都接近百年归老了。

      追，我们已经追唔返已经失去咗嘅时间、青春、又或者係爱情...等紧我哋的，係未来冇忧嘅生活，係寻找可以相伴一生嘅伴侣嘅生活，係拼搏努力工作嘅生活...         

      迷上咗<换换爱>，记得之前睇第一集嘅时候，觉得又係啲幸福美好嘅灰姑娘与王子嘅童话故事。不过睇睇，俾杨丞琳嗰种强迫自己唔好去期待、唔准幻想嘅性格吸引。好似而家嘅自己呀∼完全唔敢奢望，唔敢渴求，净係俾自己一个目标去努力，觉得踏实多了。唔抱希望，先唔会有失望，甚至绝望...

    呢几日天气实在热到震，24小时都好想带住个随身空调仔呀...哈哈哈∼

    天气确实好影响人。原来寻晚斌少发生件大事，连我都戥佢好唔开心。希望佢快啲冇事∼呢种事都千其唔好再发生啦。

    呢排中意返首<属于自己>...

        「还有牵引突然有感应
           在这一刻他很开心
           应该是又遇见了新恋情
           只是现在我不会妒忌
           不断找爱是他宿命
           就好像我总是选择孤寂
           在人与人来回试探眼神的言语
           在爱与不爱等待与放弃的煎熬里
           突然我会怀疑
           太执着的爱你
           是出自爱情
           还是因为不甘心
           在心与心碰撞后开始保护自己
           在放与不放沉淀与寂寞日子里
           直到看清楚爱情
           只属于自己」

    呢2日返工得特别攰。面对班同事、啲啰啰嗦嗦嘅客、仲有就係繁琐严谨嘅业务。

    不过对自己有过承诺，一定会坚持做好佢。但係无论自己几咁细心，仲係会出现啲非技术性嘅错误。好灰呀∼

    已经出咗200分努力，但睇在人哋眼里就乜都唔係。呢种谂法喺脑入面重复再重复...

    咩叫人工高、福利好，原来实习嘅时候付出嘅代价特别大。

    但係，仍然好有信心要做好佢!!

      寻日一早好似平时返工嘅时间，返到中行。返到去，大家已经准备大龙凤。换裙嘅着裙、打呔嘅打呔、化妆嘅化妆...都仲几兴奋嘅。之后一行人，小袋大袋装咗好多宣传单，大只佬去咗抬复印机，仲攞晒横额咁，有啲坐行长部车，有啲打的，有啲坐面包车，去到我哋活动嘅场所--富力桃园。

      嗰度係一个大型嘅住宅区，我哋嘅活动喺会所举行。原先仲以为室内有空调，但去到先知原来露天。Shit∼ 喺嗰度摆咗几张台，铺块布，上面顶住个遮太阳嘅蓬，好似开档小贩咁。台面放咗好多信用卡表，基金表同证券资料。呢次嘅活动同省行、仲有中银证券一齐搞。虽然唔算大型，不过规模都唔细。喺大家嘅努力下，顶住个大太阳，都争取到几十份卡表。见到亚哥大汗拓细汗，各位女士们个妆溶晒嘅狼狈样，唔係搞笑，係无奈...

      中午要净低4个留守大本营。好幸运，冇我份。于是我跟住大队，同一班领导食咗餐辣到喷火嘅湖南菜。亦都俾我见识到咩叫用餐礼仪，咩叫修养，一望就知。

      用餐完毕，又一伙人返到火辣辣嘅活动现场。正值中午，咁啱又係小暑，真係冇阴公呀∼ 2点钟，我又跟住某部分人，上到会所3楼帮手。就好似摆酒咁，每个嚟到嘅人都要先喺门口签名。而我就係叫人签名嗰个。另外仲有几个同我一齐...见啲人差唔多到齐，我又要坐入观众席入面邓脚。结果1个钟嘅证券讲座，变咗我嘅午觉时间。睡得饱饱的...哈哈哈∼

      活动喺4点半多正式结束。又要搬返好多嘢走...未到5点就返到银行。已经见到爸爸部车喺门口等我放工。

      唔理三七廿一，换好衫即刻跳上爸爸部车，先感觉到咩叫空调。个行长部车真係好唔掂...

      始终屋企人嘅温暖係冇人可以代替架。晚上，爸爸车我哋去到黄埔间头啖汤食饭，啲嘢好好食。而家好中意开车到好远嘅地方食饭，因为唔止食到更多唔同嘅美食，喺部车度又可以倾下计，又可以望住夜晚嘅景色，更可以瞓下觉∼

      虽然已经做咗嘢几个月，但係好似冇为屋企人做过啲咩，反而仲成日用紧爸爸俾嘅钱。每次谂到屋企人对自己嘅好，就好内疚...好想自己都可以为咗个家，作出啲贡献吧∼

      可能係自己敏感，有时面对唔中意自己嘅人嘅冷言冷语，听完真係觉得好灰心...但有时想到屋企对自己嘅企望，惟有忍气吞声了。佢哋冇非都係想我喺啲有知名度嘅大企业做份稳定嘅工作啫...唔想因为自己一时嘅不快，令佢哋失望。

      对不离不弃我嘅亲人，好多嘅歉意。平时唔识得体谅、唔识得关心，只顾好任性咁做自己想做嘅嘢，原来都係对佢哋嘅伤害，当遇到一啲啲挫折、困难，又好理所当然咁揾佢哋做避风港，我承认係自私的。请你们原谅我吧∼

      上星期任性地说辞职嘅话，我收回了...