今日喺西华第一次上柜，喺大家都对我冇任何了解嘅情况下，我今日都算做得几出色，冇差错。

      喺西华做嘢，较轻松。应该係以前东风西有对公业务嘅关系吧∼而且同东风西啲人嘴型唔啱。但到咗西华，发现同龄人比例极高，细个自己嘅居然有成2个咁多。喺西华，有个叫亚文嘅靓仔。如果俾着以前，我谂大家应该好邓我高兴，因为呢个人，高、瘦、戴黑框眼镜。哈哈∼3年前我仲俾呢类型嘅人迷到神魂颠倒。今日，中午落柜食饭，好开心西华仲有个茶水间可以食饭，环境都算唔错，同个细我一年嘅亚文倾咗好耐，不过估唔到居然细过我...

      去到最唔惯嘅，莫过于要自己整封包。不过还好，仲有个亚婷几照顾我。佢帮我整埋封包，虽然有点肉酸。当然唔可以同亚树整嘅比啦，哈哈∼不过都仲係几挂住东风西架，仲不时怀念下嗰度啲熟客添。

      可能西华嘅柜台环境比较差，但后台嘅设备就好好。果然呢度係我嘅新开始...

      9个月喇∼我哋三个9个月冇一齐聚过啦。9个月之后嘅第一次重聚，我哋选择去红点唱K。

      唱唱下，拣咗首老歌<友共情>。点知，同姊姊一听到，即刻泪散K场。搞笑吧...胡绮文到底几耐冇咁样喊过呢，真係冇认真计过。斌少为免尴尬，仲不停喺度唱，而且仲死咁笑我同姊姊!!我谂如果冇你哋两个，亦都冇我了吧。

      唱完K行到电梯口，哈哈，居然见到莎姊同小鱼。好鬼有缘咯...

      之后去咗天河城，3傻由头颠到落尾。对住你哋，唔係笑就喊，乜压抑都冇啦...哈哈哈∼

      下次再见面，又唔知係几时啦。

      突然又已一年
      祈望再会面
      旧朋友
      就算心永未遥远
      但这刻渴望见
      即使重聚再短
      时光可变
      世界可变
      人情亦许多都变迁
      友共情不变
      那种真找不到缺点
      你我再次相见
      随年和月
      身心虽耗损
      友共情从难扭转
      心内那热暖
      仍是纯真未变

      捱咗4个月，终于捱出头。今日，正式成为中行嘅员工啦。

      虽然份所谓嘅劳动合同模糊，待遇不明，过分简单。不过唔理三七廿一，见到有人要我，所以决定卖咗自己了∼哈哈哈...睇住份雇佣合同，唔肯定又迷惘，估唔到自己居然捱到呢一日。记得上星期嘅自己，仲不断决定要走嘅念头。算数了，就算走，都係1年后嘅事。一个上午嘅时间，就将自己卖咗俾中行1年...希望之后会有好日子过啦。

      对于离开咗东风西，毕竟都几怀缅，点讲都有几个月嘅感情啦。不过呢次调咗过西华，可能绝大多数都係同龄人嘅关系，而且邱行又出奇咁嘅好人，所以算过上好日子了。

      自从唔见咗一千蚊后，先发现钱原来好难赚。但爸爸居然俾返钱我，感动嘅唔係我呢个月又可以有钱使，而係爸爸毫不吝啬咁用自己辛苦赚嚟嘅钱嚟补救我嘅过失，好伟大呀∼

      爸爸话，养儿一百岁，长忧九十九喎...但愿爸爸长命百岁，但就唔好忧心我喇，我要生性呀!!

      今日，上珠江办消卡手续。咁啱师兄有事要上去，所以碰面了。

      很快，10点就可以走人。二话不说即刻打的返屋企摊，不过仲係过咗居委办咩计生证咁。身水身汗之后，就留喺屋企直到12先过西华报到了。车程好远呀，我都快瞓着啦。

      去到之后，见到个好好人嘅行长，一班算友善嘅新同事，因为未熟络。一切嘅新环境都嚟得咁完美。签咗名之后，丘行就批准我走得喇...好开心。之后我过返东风西，执包袱∼返到去，一个墟咁，今日居然停电。入面乌黑一片，冇客人，狼籍到爆...亚珊讲笑话我一走，就停电啦。不过我一啲都笑唔出，毕竟呢个係我出身嘅地方嘛，边个想佢衰呢...入面空调都冇，灯又冇，净係可以发电维持电脑同录像嘅操作，冇奈。我匆匆执好晒嘢，交低咗亚珊两句，一袋二袋又打的返屋企了。

      忙里偷闲嘅一天。18号嘅呢一日，抹杀了我喺东风西嘅一切不愉快...同样，我同某人连最后嘅同学关系都瓦解了，因为今日佢正式毕业啦。一切一切嘅结束，能否意味又有崭新嘅一页开始呢∼

      咩都唔谂啦...顺风顺水嘅人生，连偶像剧都不再出现了，更何况现实。只希望可以每日都可以充实，因为呢日嘅闲情，我过得好心虚。

      今日，终于要对东风西网点讲再见了。正式被调到西华网点...突然下午收到嘅通知。

      一早，应邮件通知，8点半就去到广医一院集中体检。虽然之前已经验过一份，但基于话真实性不足，唔接受喎。今日嘅体检，仲特别安排咗人事嘅人落嚟监督，严格∼

      折磨咗2个钟，终于搞掂。一群人等，去到附近嘅M记坐低，开始讲大家嘅辛酸眼泪史。讲讲下，有个同事真係喊咗，佢嘅遭遇，我都颇为同情。最唔争气就係亚珊，居然抽完血去到M记晕低...真係俾佢吓到一额汗。好在后尾都冇事。

      就喺M记期间，芹姊同FIFI分别打咗2次电话，催我哋返去。结果我哋好冇奈咁搭车邓下邓下返到去。

      直到做晒啲客，打完箱，谂住又过完一日打仗嘅日子之际，突然收到个西华理财经理电话，问我嘅存在。当时仲好相信肯定讲笑啫，就算係，都未有咁快挂...点知就咁啱遇着嘅巧合，听日上珠江办手续。

      直到知道自己要离开东风西，先有种好唔舍得嘅感觉。从3月15号开始，我就一直喺东风西，努力过、辛酸过、痛苦过、心灰过、甚至想过要放弃...但最后都係放弃咗打算放弃嘅念头。因为始终有开心嘅回忆∼

      唔舍得师傅、FIFI、许颖、Tracy、亚树、丸姊、芹姊、淑仪、海宁、华仔...太多人啦。我永远唔会忘记，係呢班人教咗部分我出身嘅道理，教训历历在目。

      东风西，别了∼