今日down咗Kary只新碟听，有首歌<各行各路>，好中意。

      同爸爸讲好咗，听日返学校搬晒啲嘢返嚟，好似即将要同培商分清楚河汉界咁。不过我都知係时候脱离啦。又係一个结束同一个开始。就好似小学升初中、初中升高中、高中升大学、到而家大学出嚟社会咁。等培商嘅一切结束，我就要重新做过一个我。每个时期，都会有啲影响、左右又或者帮助到我嘅人，我唔会忘记，不过都唔见得会再上心了。

      自从做咗嘢，所谓嘅朋友真係寥寥无几。寻晚KK问点解我唔拍拖，应该话我冇兴趣吧∼

      "明白愛是剎那消遣"...歌词好啱。

      "成熟了學會,分手也不算糟,明白你的愛,得不到更好,寧願你我不拖不欠,再各自擁抱"...

      "無辦法共處,祝福會比較好;能面對失去,比得到更好;寧願理性收起感性,去各自起舞;投入與放手需要順從運數,縱使記憶不老;前度遠,明曰近,明曰太多不需要因愛虛度"...完全讲出晒而家嘅心声啦。

      呢首歌同样教识我，返学校攞毕业证唔一定要19号∼

      今日发生件不幸嘅事，虽然唔喺我身上。今日亚丸付多咗2万俾个客，真係好大祸。不过好在通过睇录像，原来俾咗只鬼。又好好彩，只鬼好好人话可以俾返我哋。但咁啱佢去咗东莞，要晚上10点返...

      之后，我师傅同fifi就开始一定我同亚珊再三留心要做嘅业务，同埋要注意手势之类的。师傅曾经就喺实习期间唔见咗3千蚊，fifi又话试过多付咗个客5千...种种都令我更加留意自己平时做嘅工作。

      从寻日开始，个市跌到跳水咁，心血少啲都唔掂。今日收市前终于升返少少，先冇咁腾咋∼

      最搞笑有个客，见个市跌成咁即刻嚟赎回基金。唔知点解点试个密码都错，所以点都赎唔到。腾到个客笑死我∼点知收市前突然升返晒，个客突然拍我窗口话"你好嘢"咁喎...我师傅佢哋即刻话，使唔使"猪"啖亚文呀∼真係笑死。

      开始习惯 咗上柜嘅日子啦。虽然係好攰，不过乜都冇时间谂啦，除咗一齐返工嘅亚哥。哈丷∼我落柜食饭佢又落嚟喎，讲嘢好搞笑呀佢...

      返到银行，先发现原来今日係6.4。其实对我嚟讲完全冇意义，说说罢了。

      最近呢个星期，股市跌到冇谷底，眼见赚到嘅levis得返个裤脚，真係好想喊∼唉...

      身体好差呀，又咳又感冒，痛苦到不得了。我又怕传染俾fifi，而家跟住我上柜嘅师傅，皆因佢係大肚婆嘛。今日做到2点先落嚟食中午饭，点知个死斌少打咗N次电话嚟，等我仲以为咩大件事，点知净係想话我知杨丞琳出新戏好好睇∼食饱饭冇嘢做嘅行为。

      今晚又组织去打波，不过就冇乜人赏面，所以我都少理，早啲返屋企比较实际。亚树今日请假，因为冇人睇封包，搞到成8点先走得人。救命∼听日又话要开例会，一早赶返去，顶...

      今日，原本打算去睇下病的，因为不停咁咳。结果冇去到，因为唔想。

      留喺屋度，反而做咗错事吧。由于好奇，我打开咗某女子留俾某男子嘅留言，係关于某女子话会继续等某男子到今年10月嘅内容。睇到咁嘅字句，我都觉得好震惊。不过呢个讯息某人永远都唔会再知道了，因为我嘅好奇∼我到底係咪做错咗事呢，不过追溯返数月前，对唔住我嘅却係佢两个。所以呢件事我当冇发生过...

      记得寻日睇<十分爱>，stephy因为alex嘅一句"报应"，得到种种教训。关于报应，我一直深信不疑。未受到报应嘅，係时辰未到啫...某人对我发嘅誓，一直耿耿于怀。因为我相信天有眼，每个人都係公平架。