两个星期冇同斌少出街啦。所以寻晚就约好今晚要去洗下钱。

      点知天公不作美，临落班先搞场大雨。不过仍然冇扫到我哋要行街食饭嘅雅兴。约好6点喺五月花等，结果我成6点半先走得人，一出门口，就飞的过去了。

      去到五月话都发觉颇多人，虽然翻风落雨咁。行咗阵，就入咗北京路，行咗2%，行咗广百，买咗衫衫了。但斌少就埋怨自己冇买到嘢，佢自己又唔谂下有成千蚊卡数未还咧...成8点，我哋先去食嘢，食咗好耐都冇食过嘅寿司，食极都唔厌，哈丷∼

      食完之后，我哋又担住遮，顶住风，继续行街街了。如果唔係时间关系，应该会睇埋出<甜心粉丝王>吧!!

      晚上嘅行程就结束了。买到想买嘅嘢，真好∼

      经过2日嚟上山又落山，今日对脚瘸咁滞。一早又同亚妈大炒，完全冇晒mood。

      "勐勐憎憎"咁去到车站坐车，睇边个都唔顺眼。返到银行，今日一啲士气都冇，死下死下。坐喺师傅后面走晒神，净係偶然听到有人叫我，然后去复下印咁。后尾俾斌哥点咗去执信箱，我同亚珊好似甩难咁，落咗柜台，一边打牙教一边执回单。好快就到咗下午。今日宁舍多人，关门之后仲有一大堆客，我又同主管去咗清ATM机，今日主管仲俾晒权我，等我自己车钱添。

      7点先出嚟坐车，返到屋企个人好似瘫咁。好攰呀，几时先有得休息??

      好辛苦呀!! 寻日先行完白云山，今日又要返乡下拜山。呢个周末都未停过，冇好好休息下。听日又话要返工喇。

      今日程车唔算辛苦，伯父开得好快，所以好快就到咗。嚟到山脚，发现多咗间厂喎，真係滴汗。爸爸同姑丈就走咗去揾路上山了。太阳伯伯今日工作好勤奋，晒得超级猛烈。之后爸爸就同伯父带队上山，行行下，姑姊望住脚底突然大叫，我沿住视线望过去。oh∼shit!! 我哋脚底都係蛆(即係尸虫)，我即刻跳到九尺远，仲死跳烂跳，只希望唔好喺我脚底有任何异物。难怪一路都闻到难闻嘅气味，原来係...真係谂到都想呕。我同姑姊仲唄度编剧情，假设有人埋尸荒野……

      天马行空之后，终于上到亚爷个坟。生咗好多杂草，地方好似细咗咁。爸爸、姑丈、伯父一班壮丁夹手夹脚将啲杂草、树木清理好。然后进行拜祭。我同家姊、表弟喺伯娘嘅教导下摆好晒要奠嘅茶酒，同要烧嘅元宝蜡烛。自己太落力了，结果落山之后上到车先发现，露在太阳底下嘅手臂居然晒到红晒，好惨!!

      之后又一行人去咗食饭。然后我就坐返爸爸部车踏上归途。寻日同今日嘅行程都令人好疲惫，现在对脚酸到不行。听日又要返去行行企企，唉∼咁又一个星期。

      今日同老谭(培训班入面其中一个师兄，因为佢叫我老胡，所以我叫返佢做老谭，哈丷∼)喺qq讲咗好多大家嘅事情，佢有佢嘅苦况，我有我嘅难处。这些让我们苦恼嘅人，真识折磨人呀∼仲有就係欣赏老谭够坦白，哈丷。

      晨早就同娘亲上到白云山，亲亲大自然。哈丷∼

      8点多啲就嚟到山脚，先发现已经人山人海。慢慢，我同亚妈进入人群中，步向山顶。原本都几轻松，但到半山腰，疲态就出现。45分钟嘅路程，终于嚟到个叫云潺嘅地方，除咗继续上嘅摩星领，呢度係最高嘅休憩站。亚妈话从第个口行落去，就有间茶楼，可以食嘢。于是，我哋又拖住疲惫嘅双脚继续行山旅程。嚟到间"双溪"茶楼，入面好多人，有人饮茶、有人踢毽、有人打羽毛球，山间中饮茶，另有一番滋味。食饱后，我哋又沿住上山嘅路落返去。

      呢次嘅白云山游，很畅快。基于太耐冇吸过大自然嘅空气，另外做下运动出下汗个人确实舒服，就攰咗啲咯。

      今晚重装过部电脑，即时"靓仔"晒，仲快咗好多添。

      听日又要跟老窦佢哋返乡下拜山。最近同山嘅关系太密切了∼

      咁又返咗一个星期工。今日珠江支行发咗个存折落嚟，我相信好快就会有粮出。

      不过见到份粮咁奀，都冇咩期望，食餐饭都应该冇鬼咗。但係点讲呢次出粮係我咁大个女第一次靠自己赚到嘅钱，我好珍惜架!! 今日师傅仲俾我上咗下柜台添，不过可能係做足五日嘅关系，今日上到柜觉得冇前两日嘅兴奋感。

      主管成日要我跟佢清ATM机，初初觉得好似委以重任，但係慢慢又觉得俾人揾笨。一车车五十几万，眼都花埋。其实实习嘅又唔係得我一个，点解唔轮流做下呢?? 乜都亚文亚文(而家啲同事都係咁叫我)∼

      听日休息，不过约咗亚妈去白云山。就等我同娘亲感受下大自然嘅奥秘啦∼哈哈哈哈哈哈哈。