呢个周末好忙。忙，为下星期正式投入嘅工作而准备。

      寻日，同亚妈去咗行上下九。讲真，咁大女第一次认真行呢度，因为一直俾我感觉就係上下九人流复杂，唔中意。但係，喺妈妈嘅陪伴下，逐渐适应咗。为咗返工嘅服装问题，要买行政套装、要买黑皮高踭鞋、要买白色衬衫……行咗好耐先买咗条西裤同对鞋。对鞋好便，从我初一以嚟买嘅最便嘅一对鞋，唔因为价钱，只因为某种情感，觉得好中意。后未行到fortune duck见到啲袋成3折，好抵，亚妈好似又几中意，于是同亚妈讲，佢中意嘅就送俾佢。我攞起咗个$199嘅，亚妈都好中意，不过死话唔好，冇买到。我知道佢冇非都係想帮我悭钱，最后亚妈咩斩获都冇，返屋企又为我嘅晚餐而忙碌。

      今日，又到爸爸为我准备。一去就到咗友谊商店，又买咗对鞋，係balenciaga嘅，折咗都要400几。不过啲皮着起身好舒服，亦好正式，冇任何花纹、修饰。之后就为我嘅行政装着手，因为友谊冇啲正统啲嘅，于是就转移地点到咗天河。食完饭，入到天河城就上咗2楼天贸。点知一下子俾levi's吸引咗，行到埋去，又攞起之前好中意嗰条睇，记得上次爸爸叫我落HK买，但係今日佢居然叫我试喎!! 呵呵∼ 买裤有望。后尾个sales介绍咗条新嘅限量版，个价同我中意嗰条一样係$899，不过个款我就觉得麻麻。不过既然都试开，就一次试晒两条。结果爸爸话我嗰条好睇，于是就真係买咗啦，哈丷∼ 然后又落咗G2000睇行政装。Wah∼ 原来行政装好鬼贵架，一套要上千银。但係爸爸居然叫我试下，然后就叫个sales包起啦。今日买嘢用嘅钱我三个月实习都揾唔到呀!!

      呢两日，真係感受晒两位老人家为我付出嘅，真係"没法解释怎可报尽亲恩"呀∼

      唯一可以答应佢哋嘅就係"我有爸妈挂念，事业还望发展"啦。

      加油，听日又係新嘅挑战!!

      第一日返工，时间观念紧係最重要啦。

      因为离网点比较远，喺亚妈嘅督促下已经7点半就出门。结果部车等足我半个钟唔止，仲慢到蚁'栏'干咁。搞到十分紧张嘅我喺明智嘅决定下，选择落车打的。去到世贸一落车，就截到部的。一上车即刻催个司机唔该9秒9送我去到东风西。踏正25分正式步入东风西支行。

      第一日返工，乜都唔知，连去边度换衫都唔知，仲走咗去厕所。原来银行有个地方专俾员工换衫个喎。换咗一身不伦不类嘅工作服(因为未係正式员工，未有工衣，全部都係自己准备嘅)，扎咗个N世未扎过嘅"暨"，紧要嘅係着咗对成世女都未着过嘅高踭鞋，拐下拐下咁从更衣室行出嚟，相信唔少人都觉得诡异，哈丷∼ 亚珊因为屋企比我近，早就到咗。

      因为我师傅今日休息，搞到我今日冇得跟师傅，净係继续寻日嘅工作。中午大多数同事都自己带咗饭返去，我因为冇准备，临急临忙净係过隔离买咗只包衣肚。午休到2点，可以瞓觉嘅，但係我觉得瞓唔落，所以又继续做嘢，好似好勤力咁。一直冇点停过，除咗去厕所，到咗5点9正式收工。已经比其他同事早走好多，其他人仲要留喺度埋数。

      同亚珊换完衫之后就各自返屋企。除低咗对高踭鞋，发觉对脚已经唔多似自己嘅，痛苦。原来cons真係好舒服!!

      返工比培训来得更充实，劳动嘅成果，只要你有做到，就自然会看到。见到今日自己做嘅少少成绩，嗰种喜悦大过****，哈丷∼

      久违咗嘅太阳伯伯开始露面。有咗太阳，万象好似都有咗生机。

      今日，应张生要求返到培训地点--长堤支行。等到11点，张生终于蒲头，原本以为佢会讲下星期机场路培训嘅事宜。点知，突然一个意料之外嘅消息，"下午被分到各网点开始实习"。大家都俾突如其来嘅消息嚇亲。不过仲未等我哋有时间回神，好多时间就要开始准备。大家都将之前带返屋企嘅练功券上缴。然后就落5楼复印身份证。跟住係到15楼嘅中行饭堂食最后的一餐。真係好依依不舍，对咁样嘅变化，大家好似都变得冇所适从，最后的一餐，百感交集。

      我被分到东风西支行，具体地点我都唔知点讲好。庆幸嘅就係同我一齐分到网点嘅仲有亚珊。使既路盲又冇时间观念嘅我嚟讲係好消息。大概2点到，我哋踏入支行，规模唔算大，但都几多人。之后揾到行长，倾咗下计，填咗份表，就入咗柜台逐一认识咗下啲新同事。咁大个女第一次入银行嘅柜台，以前以为大家工作都应该好严肃，但係原来大相径庭。一群老老少少有讲有笑，而且话题不在我哋呢类年纪之下哦∼

      被派到柜台后嘅第一样工作係按日期分好近几个月嘅用户外币交易单。我同亚珊，足足从3点倒分到6点，冇停过，水都冇饮过。不过我哋呢种太认真嘅态度好似有啲同其他同事有出入，可能係"初归新抱，落地孩儿"，要时间适应。到6点，我嘅师傅细家姊(大家都咁叫，佢讲嘢好搞笑)，突然同我哋讲，你哋仲未走咩?? 真係滴汗，我哋好认真做紧嘢架。就係咁，我哋怀住感激师傅使我哋早啲脱离苦海嘅感动，离开咗银行。

      出到门口，天色已经好黑。在这样陌生的环境，又要重新认识一班陌生的面孔，行去车站嘅一条陌生的道路，一切都再陌生不过了。自己很软弱，面对这样的改变，坐喺车上，望住窗外，突然好想喊。

      不过后尾听到亚fi首<给十年后的我>，坚强了。"十年后的我"……

      今日冇出街，起身之后早餐同中午饭一齐食咗啲嘢就罢就。

      依饱个肚，就返入房开始煲电影。今日睇咗出新片<汉江怪物>...係科幻韩片。讲述几年前因为一个科学家冇慎重处理化学品，使化学品流入汉江之后，令到一只生物发生变异，几年之后就变成咗"怪物"喇。一日只怪物突然出现喺安静嘅人类世界，破坏咗一轮后，一个女仔俾怪物捉咗，女仔嘅爸爸、爷爷、亚叔、姑姊为咗揾返女仔嘅过程。未睇之前好多人都话恐怖，其实睇完之后我认为女仔一家人为咗揾佢而团结嘅精神更令人感动。结局虽然怪物死咗，但不尽人意，唔止女仔救唔返，就连爷爷都为咗保护自己嘅仔女脱离危险而牺牲埋。

      其实自己一向都几中意睇呢类型嘅电影，而且係down落嚟一个人睇。好似以前嘅<异型>、<后天>、<死神来了>、<金刚>……一啲自然现象，又或者自然现象都解释唔到嘅嘢，我会觉得好神秘又好吸引。但对咩<咒怨>、<笔仙>什么的就冇咩兴趣了，这种鬼神之说，睇得多个人都好似神经兮兮的，疑神疑鬼咁，毕竟大一嘅时候最经常看的就是这类片了。

      啱啱食完晚饭，接到张生嘅电话，通知星期四要返培训地点。虽然唔知係为咩事，不过我谂可能係交代下星期去培训嘅事同埋落网点实习嘅准备吧。

      明天会更好吗?? 这样的天气实在很难提起劲。

      今日係"待培"嘅第一日，不过过得好开心。

      因为今日喺班长嘅组织下，我哋一部分培训嘅人去咗neway唱K。2点多啲我就去到neway，入到房斋见到班长同师兄中哥，之后嘅人陆续先嚟到。有亚珊、谭颖、另一个师兄文哥、仲有绮雯、到最后最后先出场嘅肖穗明(人称渣哥，人渣个渣，哈丷∼ 云姊起的)。唱K嘅过程中，我哋仲玩咗大话骰同上诉。最好玩就係上诉啦，因为我哋仲玩true or dare，边个输咗就拣一样。结果最搞笑嘅就係中哥输咗盘俾我，我点咗佢去对面间K房问个女仔攞电话，真係爆笑!! 我都输过盘俾文哥嘅，结果俾佢点咗我去走廊揾个男嘅讲"我爱你"咁!! 真係有咁大玩咁大呀。

      到咗6点，唱K度散水之后，因为亚珊要交人，所以走咗，净返我哋就去咗农讲所附近间"利华"食咗餐好嘈嘅饭。点咗8餸1汤，食得好饱，喉咙都痛埋，因为嘈得滞，个个都要讲得好大声先听到。一餐愉快嘅晚餐，好开心，好多笑点。

      饮饱食醉，大家仲好有兴致，谭颖仲提议去影贴纸相。但行混成条北京路，居然冇个地方可以影贴纸相嘅!! 虽然大家有啲失望，但係毕竟以后日子还长，最后喺潮楼嗰度各散东西返屋企了。

      欢乐围绕住我哋呢班人，时间觉得过得好快，仲记得渣哥提议嘅珠江夜游&睇电影，虽然都冇咗下文，但係只要有我哋培训嘅一日，就会陆续有我哋嘅欢聚。

      原来，阴雨绵绵的季节，除了讨厌外，还有快乐。