今日又係準時上班，到蓮香樓買早餐。今日買咗三隻包咁多，食到自己好飽。唔知係咪尋晚瞓得唔好，今日成日都冇乜精神。尤其數銀紙嘅時候，覺得特別悶。每日做同樣嘅事情，眞係覺得厭倦。前幾篇日記我冇點提培訓班啲人，因為覺得全部我都冇興趣，但今日想提下其實有個人自己有啲在意，在意嘅係佢把聲，因為好似吳卓羲，哈丷∼∼..佢喺我哋個班度都算唔錯嘅，但係應該有GF，所以我都會好理性的!!

       可能早餐食飽咗，中午冇乜胃口，凈係食咗個粉。食完個粉就趴咗喺臺靣瞓咗成個中午，覺得個人好攰，體力透支孒。下午又繼續上午重復嘅練習，乏味到極點。

       達正5點半先走人。因為約咗姊姊，而佢今日去SOHO大搞個頭，所以又要趕過去淘金孒。自己就嚟唔係自己架啦，因為太攰喇，好想好好抖抖...又喺see you here解決咗個dinner，就打的返屋孒。

       日子還是要過，但想過得舒服點。

      今日又係一早就返工，落咗车再去莲香楼买早餐。一切都好平静，好似暴风雨嘅前夕咁!!

      接近十点半，异样开始。有班话係练跳舞嘅人陆陆续续出现喺我哋培训嘅课室度，话要练跳舞，需要我哋培训嘅人"马上撤"!! 呢句嘢係条牙屎屎嘅中年八婆讲嘅，咁冇礼貌嘅命令式语气，係人听到都扯火。我执好咗嘢就讲声"唔理啦"..然后走人。点知俾条八婆叫住咗，大声夹恶咁问："绿色衣服那个!! 什么叫不理!? 你是这里实习的?? 你叫什么名字??"我真係想即场叼閪佢架，不过条婆乸个势好似唔凶得。跟住我好閪俾面咁答咗佢嘅问题……唔想讲啦，讲起都觉得邪，真係唔想因为呢种事俾人blacklist呀!!

      今日原本斌少要去HK架，点知部火车晚点，去唔到喎。斌少又冇mood，我又"庆"喎，所以咪一齐约咗去整头发咯。10点半就走咗出嚟，12点先返到屋企，换咗件衫，放低咗部计算机就去SOHO同斌少汇合啦。中午开始运势算转好咗，整咗个头¥200，都唔明自己整咗啲咩，净係剪同拉直咗执阴，不过mc贵咗呀，剪都要¥95，有病!! 不过算啦，心情唔好使下钱个人都开心啲嘅。哈丷∼∼

      整完个头心情都靓晒，然后就同斌少开始咗好耐都未试过嘅行街街活动。哈丷∼∼ 我哋首先去咗see you here食嘢，跟住去咗五月花、地王、流前.....行行行，倾倾倾，时间一眨眼就夜晚喇。然后斌少等我上咗车就结束咗一个下午嘅行程。

      寻日嘅嗰篇"杂念"真係冇错，原来只係自己想得太多了，寻晚斌少放工之后就俾咗电话我，虽然自己瞓到蒙蒙松松，但仍然感觉到斌少有忏悔之意， 所以决定原谅佢啦。

      这一天的感觉大上大落，如人生，必有高有低。能否释怀就係自己问题。

       其实今日应该写"实习：第十天"..但係有啲感觉真係好想讲出嚟!!

       我份人冇乜嘢，同亚妈嗌交可以冷战，冇咗呢份工可以揾过第二份，唔够钱使可以悭啲，但唯一唔可以冇嘅係朋友!! 人大咗，当然各为前程奔波係在所难免嘅事，所谓嘅朋友，唔係每日痴埋一齐嘅狗肉朋友，而係知心的、喺自己有需要嘅时候，喺身边扶住自己嘅朋友!! 朋友，范围太广太大，朋友可以好多，但係死党难觅，知己难寻。我好庆幸自己有个真係识咗15年嘅死党、知己。

       但係从06年尾，忙碌嘅生活就未停过。你要揾工，你要培训，你要同你班同事social，我要逃避某人，我堕落中，我要考试，我都正在为自己嘅未来而感到迷惘。以前平均一个礼拜见一次，变到两个月都未见过。以前日日都通电话，变咗几日都冇电话。唔知係大家真係忙到冇时间揾对方了，定係大家疏远了。就攞上星期嘅事嚟讲，明明讲好话上星期六剪头发，叫你去book时间。结果星期五晚问你book咗时间未，你竟然话冇咗回事。你确实好忙!! 然后你要话你星期三落HK，同你啲表哥表弟。之前讲好话我哋去嘅，而家呢?? 对，大家都很忙，你有你开心与唔开心嘅事，你自己唔开心就夜妈妈俾电话我，同我呻啲八婆，讲自己几唔开心，点点点.... 我呢?? 我第二日一早要返工，我都捱时间同你倾电话，等到你返屋企。但係我有唔开心嘅嘢你又知唔知?? 打个电话俾你又话饮紧茶食紧饭，迟啲俾返电话我，然后冇咗回事；倾QQ又话冲完凉电话讲，结果又係冇咗回事。好多时候我已经唔想讲你，知道你前几个星期确实有啲唔开心嘅嘢发生咗。但係所谓嘅死党、知己係咁做嘅咩??

      仲有姊姊，揾亲你都唔复佢，讲咩"我们三"啫，算咩一家人啫，屋企人唔係咁做架!! 我嘅感觉就係你冇珍惜过我哋三个嘅感情，你珍惜嘅係你份工，係你班同你去HK嘅屋企人。其实我哋好简单，点解唔可以返到以前，返到我哋三个一齐出街，一齐食嘢，一齐买衫，一齐睇靓仔，一齐讲初中嘅事，一齐傻笑....

       因为上个礼拜有两日实习都冇写到日记，所以直接跳到第九日。嘻嘻...

       玩咗两日，今日突然要早起真係唔多习惯。不过"鬼叫你穷咪顶硬上咯"，同亚妈嗌交仲冷战紧，搞到连早餐都冇得食!! 咩事啫，食自己咯。已经冇得食早餐好惨，点知今日搭车企咗好耐先有得坐，一切都係唔好嘅开始，好想今日快啲结束佢!! 落咗车，就喺车站间莲香楼买咗两只包包同牛奶，攞返上去培训度食。

       今日迟到嘅人特别多，可能大家都已经对培训冇晒热诚，个个死样咁。我一于少理，食完个breadfast就开始点钞同打计算机喇，唔想嘥时间。肯定呢两日玩到心散咗，做乜都慢晒，真係又要收下心啦。

       过咗两个钟无聊嘅练习时间，闷到极点嘅我开始有啲唔耐烦。点知呢个时候亚张生打电话俾班长话呢个礼拜嘅一、二、三下午都唔使返喎，开心都从个心度笑出嚟呀我简直。即刻执嘢就准备走人喇....(题外话，提下我个班长係个靓女嚟架，有机会将佢啲相up落相簿度^^)

       今日打包咗个饭返屋企食，点知等个饭等咗我成半个钟，嬲到我爆粗，妈妈的!!

       平淡的一天，疲累的一天。    PS：草莓唔襟摆，好快烂，好似爱情咁...

       一篇遊記:

       今日約埋莎姊、小魚同江莎莎一齊去咗苗圃嘅草莓園摘草莓，過咗開心嘅一日!! 大傢約好2點喺天河城個車站等，然後一齊搭78號車去。因為途中有少少事拖咗啲時間，搞到3點先岀發。其實初初有啲驚太晏去會玩得唔夠盡興。但係當我哋到達目的地嘅時候，已經興奮到唔記得曬時間。落咗車就衝到草莓園入靣，攞起盤就係咁摘。仲一路摘一路食，結果俾個亞叔閙唔食得，...

      (省略1萬字)

      摘咗一輪，又影下相咁，快楽不知時日過，已經成5點幾。我哋唔止摘咗草莓，仲買咗啲嗰度好新鮮摘落嚟嘅生菜、小白菜同油麥菜咁，眞係好新鮮，而且仲好便。我哋足足買咗十斤菜先捨得走。滿足曬購買慾，我哋就決定去衣飽個肚喇。心急嘅我哋一見到部234號車就唔理三七二十一，上咗。唔記得咗我哋仲講好咗要買木瓜。

      (省略1萬字)

      搭咗兩三個站，嚟到火爐山。哈哈...連自己都覺得自己好叻，第一次自助遊形式嚟到啲咁古色古香嘅地方。之後我哋行到山腳，揾咗間火爐山莊坐低開始點餸。經過一輪攷慮之後，我哋決定打邊爐，108蚊有一隻水魚同鷄，好抵。食下講下笑下，天色好快就黑曬，埋單之後就離開咗火爐山莊，行落山搭車。

      呢個時候大傢仲記得仲有木瓜未買，死心不惜嘅我哋，決定買埋木瓜先結束今日嘅旅程。就係咁，我哋嘅"草莓園遊"結束喺我哋買完木瓜上咗部78號車喇!!

                                                                                                          PS："省略1萬字"係因為過程太搞笑太多，講唔曬

        總之，今日眞係好開心嘅一日。希望以後可以多啲機會過呢種接近下大自然嘅活動!!

        多謝"草莓".....