今日又係一早倾盆大雨。原本今朝要开例会，好在师傅临我出门前发咗短讯俾我，话今晚先开。其实都唔知係好彩定不幸了。虽然可以迟少少出门，但结果仍然湿咗半个人先返到银行。

      返到去，乜多湿嘅，感觉好唔舒服呀!!

      今日，爸爸嚟咗我间行开基金户。哈丷∼喺做嘢嘅地方见到爸爸真好。师傅话我爸爸好后生，而其他人就话我爸爸好cool，好严肃。冇错，爸爸唔笑嘅时候确实我恶。不过我就一啲都唔觉，因为佢成日俾我逗笑了。 呢个星期又有两只新基金，好开心呀，又有得入市博杀了!!

      晚黑，要开返早上冇开到嘅例会。不过开会前，周行俾咗钱我，叫我买啲嘢返嚟俾大家食，于是我就同亚珊一齐出去买咗好多嘢食返去，有包包、牛奶仲有即食面添。个会虽然好无聊，不过同呢班人熟咗，觉得好搞笑。

      听日，终于要返几个月都冇返过去嘅培商。虽然有千百个不愿意，不过好在有斌少陪我。希望顺利交完论文，就即刻走得人啦。因为听晚仲要赶返银行开会...

      今日一早就狂风暴雨，每次落雨都係厄运嘅开始。一早就等唔到车，有车就多人到连门都开唔到。等咗好耐，好心急。结果又係搭咗2个站车再驳脚打的。点知打的都塞车，好运滞∼

      迟到咗5分钟吧，好快手即刻入去换衫。好在今日行长特赦，知道个个都会迟到，所以冇记名。

      今日攞到柜员卡了。兴奋咗一阵，之后就心情低落咗一个下午了。亚珊师傅係大肚婆，由于佢个B突然唔听话，所以下午请假走咗。亚珊就顺势上咗柜了。应该戥佢开心，不过我真係好闷。以前有佢起码有讲有笑，而家食饭又就唔啱时间，忽然觉得自己乜都做唔上。so sad....

      今日6点半就走，但亚珊就要留低打晒数先走得。

      对呢份工，哀怨味越嚟越浓。硬觉得"天不降大任于俺也"∼哈丷。

      最近对基金狂热，目前已经有2只基金喺手。日日都关心股市升定跌，见到个市升，就係觉得爽!! 哈丷∼

      今日，初初觉得自己好闲人，师傅休息，所以去咗跟华仔。开头冇咩做，都係帮手递下单同攞下嘢咁。就华仔叫我攞返份兑换单、亚哥叫我攞密码信之际，我冇非都係讲多咗次提醒下芳姊(今日嘅主管)啫，佢突然叼我叫我唔好催佢喎∼ 顶，我都係好心惊你唔记得啫，你唔急人哋都急架!! 唔係你去对住啲客你紧係姿柔啦，俾人闹嘅又唔係你。俾人窒完之后，真係觉得万分委屈，攎完单同信坐返去华仔后面嘅时候，几想喊∼ 咁大个女突然有啲俾人位高权重压住嘅感觉。感觉同呢个芳姊扛上樑子了!!

      之后冇几耐，华仔就俾我上台。佢一向都好照顾我，成日教我呢样嗰样，佢师傅亦係而家我嘅师傅，都可以讲佢係我师兄嚟架。上咗柜台之后，之前啲冤屈气冇晒，好认真咁做业务了。

      到咗下午，周行入咗嚟，因为有80W要解上人行，所以我同亚珊都要帮手扎钞。我哋都好认真咁扎架，虽然扎得冇咁好睇。结果又俾周行喷，又话呢样唔得嗰样唔得。不过我好识入位咁去咗周行度帮佢捆钞，之后佢就对亚珊好冷淡了。做咗嘢先知，原来识走位，拍下马屁比起你有实力来得重要!!

---------------------------------------------------------------------------------------

      不知不觉，写日记已经有2、3个月，从培训开始，发现发生嘅事唔多，不过都好有意义。记录咗自己第一次为自己嘅未来而努力，以前读书时候冇珍惜嘅机会，喺呢2、3个月，付出嘅确实唔少，但收获却係一辈子的。仲有就係识到一班培训班同自己惺惺相识嘅好朋友。

      不知不觉，离开学校同样係2、3个月，虽然有时仲係会怀念下，但那个地方仿佛不属于我，因为太悲伤了。无论係因为某人嘅关系，定係那地方，只会令我谂起只有堕落嘅日子。过咗2年半嘅寄宿生活，真係冇学到啲乜。只可以讲，自己长大了。

      那个地方，好似充斥住烟、酒、男人、钱同名牌，一个华丽包装嘅堕落生活。唔想再去怀缅咁样嘅一个地方，过去就让佢过去吧。值得怀缅的，应该就係有几个老友鬼鬼嘅死党吧∼(特别鸣谢莎小朋友，哈丷)...

      今日仍然一早就出大太阳。但係唔见得同我嘅心情相得益彰。

      今日客人明显比起寻日少得多，但係我却觉得比起寻日，我更显得无所事事。除咗复印仲係复印，难怪堪称"影后"...混混噩噩就过咗一日。唯一觉得安慰就居然係今日搭车都有位坐∼

      同周行讲咗下星期请假，要返学校交论文。真係唔多想返去，如果唔係有斌少肯陪我...学校有太多回忆，但太悲伤了，亦很深刻。只想返去速战速决罢就。

      只金鼎基金今日就停售，因为寻日就已经卖完。希望唔好压低个市先好，今日股市已经跌咗唔少了。情场失意时，应该赌场得意先啱∼

      寻日一场大雨，今日嘅天气变得好好。久违咗嘅清爽天气，感觉好舒服。

      今日有只新基金，银行一开门，条队就排都水泄不通。有好几次仲因为排队时间太长，啲客嘈到好似喺市场讲价咁。我都唔执输，一早就亚妈办定个基金卡，今日开始我都成为咗"基民"。哈丷∼好兴奋。小小地买咗1W蚊，希望分红嘅时候可以赚多啲啦。我要赚部手机返嚟呀...

      今日可能客人太多，大家都好忙。亦同时感到自己好冇能，喺咁忙嘅时候帮唔到大家忙。客人要问嘅我又答唔到，下下要问过师傅，自己嚟又惊答错。帮大家复印又做得唔好，最衰部复印机又有问题!!一度觉得好灰心。不过到咗中午过后，客人开始有所减少，大家心情平复晒，感觉就冇咁紧张了。

      清ATM机好似变咗我嘅专利，每次清机主管都叫我，慢慢都变成习惯了。每日返工也都变成习惯了，返工逼车，放工等车...每日每日，

      "我已经渐渐习惯，忙碌把生活填满"...

      "试着活得更理所当然"..

      ......

      "我已经渐渐习惯，对感情顺其自然，只是我还不明白，失去你的天空，为何看来不那么蔚蓝"...