今日如常上班，不过因为顺车嘅关系，早咗15分钟到。

      今日仲带咗实习日记返去写，为咗赶工，连中午瞓觉嘅时间都牺牲埋。到咗下午，跟住Tracy上咗柜台做业务。颇中意做柜员嘅感觉，人哋啲钱要由你去处理，要你先可以办到业务。哈丷∼有求于你嘅感觉，真好!!今日做咗几笔交易係之前未做过嘅，兑换。人哋攞外币嚟兑RMB，不过我觉得都係运吉嘅。一个小朋友攞100蚊港纸兑，一个亚姨就攞50蚊葡币同100蚊港纸兑。加加埋都係鸡碎咁多。 但係好悬殊，亦有个亚姨攞咗10万嚟存，就车机都车到我烦。另外有个外国人预约攞咗1万美金。唉∼

      我哋行有2个平民窗，3个VIP窗，如果你冇VIP卡，就要喺平民区排队排餐死。所以我一定要赚好多钱，唔要去排队!!

      今日落闸前就做净几个客，所以好快就走得人。仲特登行去搭290，1蚊车。结果又塞车又慢，搭咗成45分钟车，瞓醒都未到∼

      好快我就要成为"基民"，基金个基，要赚钱钱!!

      寻晚忙到连电脑都冇开。寻晚东风西支行举行咗次合规座谈会，有珠江支行嘅领导嚟，所以宁舍紧张。

      7点钟左右，梁行同周行先开咗个简单嘅例会，讲咗下着装要求同业务细节。之后就有个叫亚清嘅同事加入咗我哋，正式开座谈会。每个人都要对案例进行发言，我係最后一个，因为资历最浅。到我嘅时候真係好紧张，联自己心跳都听到咁!! 未发言之前准备咗几句发言词，但係轮到自己嘅时候就忘记咗，要讲嘅讲得唔全，可能太紧张嘅关系，所以草草就结束了。呢次发言係我第一次喺网点嘅表现，紧张之余觉得同班同事嘅关系又好咗好多了。哈丷∼

      开到8点半先放人，返到屋企已经9点几。食完饭睇咗阵电视，冲完凉就即刻上床瞓觉。因为实在太攰了，连个头都係今日早上起身先洗。

      今晚又要开会，係去长堤进行"反假"培训，针对最近高频出现嘅汇丰银行千元假钞。培训7点钟开始，培训好有用，已经知道辨认真伪钞嘅方法。当然方法唔可以外涉，因为要提防造假技术。陆陆续续见到培训班嘅一啲好友，好开心，就算相聚嘅时间好短。

      呢两晚都好忙，晚上却又瞓得唔好。寻晚频频发梦，梦嘅都係某人。梦中某人要同某黄姓女子结婚，梦中嘅自己好唔开心，仲发烂咋添。结果梦醒之后嘅自己个心痛到不行，究竟係咩事?!

      虽然最近都好忙，唔应该有时间谂其他。可惜"忽然非常想念他"∼(孙燕姿首<安宁>真係好哈听)。

      寻晚极度失眠，半夜醒咗就半睡半醒到天光。唉∼ 救命。

      不过今日上班又唔觉好眼瞓咯。师傅今日返工，不过带病上岗，下午仲病情告急，仲要退守岗位添!! 见师傅咁痛苦，我都肉紧埋。想喺隔离照顾下师傅，点知俾芹姊叫咗去清机。

      "亚哥"有壯阔嘅胸膛都不敌天气，更何况师傅单薄嘅身子。真係要保重身体呀∼

      呢轮篇毕业论文搞到头都大晒，听晚又话开咩合规座谈会，仲要写实习日记30篇……

      最近最近，成日一上网就会去某人个qq。对，係qq...点解我有呢种僻好?? 还是某人一直冇改密码嘅缘故。所以，我希望某人改qq密码，等我戒甩呢铺瘾∼

      难得嘅周末，应该好好利用。不过我好似冇乜地方可以消遣....

      寻日，就自己嘅身体问题，爸爸带咗我去睇病病。辗辗转转，睇个病搞咗成个上午。发现喉咙发现，另外仲生咗两粒叫淋巴核嘅嘢。真係好惊，不过医生话食啲消炎清热嘅药就会冇事。后尾仲俾斌少话我係"热气青年"...

      寻日，係去公公度拜山嘅日子。但由于我睇病拖咗时间，所以缺席了。个心觉得好内疚，因为自己有少少私心冇去到，好怕啲元宝蜡烛烧着嘅味、好怕人逼人嘅感觉(平时搭车逼到怕晒)。HK嘅姨丈同表妹都返咗嚟，晚上一齐食饭，去到婆婆屋企就立即装咗柱香俾公公，希望佢谅解。

      呢个周末为咗准备要交嘅论文同实习日记苦恼。因为乜都唔知从何做起，真係万事起头难呀∼

      经过咗寻晚少少时间，篇论文终于有少少眉目。

      今晚之前就要搞掂佢，不然听日返工又会冇时间了。

      今日早上搭车特别痛苦。因为部车好多人，逼到我头发又乱、袋又孭唔好....我係好易动气嘅人，尤其俾啲level低嘅人拥挤住自己嘅时候，真係好火!!

      呢排斌少话佢好信耶苏，佢要入基督教，佢要受浸。俾佢感染得多，今日扯晒火嘅时候，自己就谂一个心中有怒火、有怨恨而且心地唔多善良嘅人，主会保祐吗?? 于是中午就俾电话斌少，佢话我係主嘅儿女，主会原谅我喎∼

      我相信一句，信者得救吧...

      最近生活都没什么烦心的。工作顺利，又识多咗一班培训班嘅朋友，同daddy、mammy冇顶颈之余仲相亲相爱。一路平顺嘅生活却有点美中不足，就好似一个健康嘅身体需要补充维他命。有一个人，令我萌生想同佢长厢私守嘅念头，係那种平平淡淡、一生一世嘅憧憬。我知道那比较难成真，只是给我这种无聊的生活增添一个梦罢了。

      原来人生平淡，也是一种幸福。那种轰轰烈烈的感觉，对上咗年纪嘅我嚟讲，避之则吉吧!!

      "难刻骨铭心，亦能找到护荫"∼ 我不想要爱上的感觉，只想要安定的生活。