呢个周末冇停过呀。

      寻日7点半老豆车我返学校考四级，之后同莎姊返到广州后，就去咗neway会小鱼了。食饭唱K，好快就4点...之后去行下北京路，原本觉得唱得唔够喉，想去音乐龙续场，不过最后打消呢个念头。所以又去咗仙仔hea...而家，仙仔变咗我哋常聚居位了。喺仙仔接到文哥个电话，话今晚培训班有活动，即刻应承咗。

      见时间仲早，就去咗楼上间soso级洗定个头，因为知道冇时间洗，今日又要返工咁。9点又去咗大家乐食个饭填胃，之后就直踩mini了。上到歌哥，嘈到觉得有啲震。不过终于唱到亚FI首<下次下次>...

      又识多咗个师兄了。寻晚全场都係喺银行做嘅精英...哈哈∼有中行、建行、工行同汇丰添。

      捱到12点半，终于决定走了。返到屋，瞓落床唔够5个钟，又话起身返工。

      因为应承咗芹姊过西华帮佢攞ATM匙，所以迟到9点先返到东风西。一返到去，换好衫就上台做嘢。今日嘅主管係芳姊，一向都针对我嘅佢，今日宁舍黑人憎。如果某日我真係要离开中行，都要拜佢所赐。

      因为今日要调息，所以2点就可以关门。埋完数，3点就走人了。再过返西华交返条ATM匙俾人，之后即刻打的返屋企，瞓到9点几先起身食饭。

      确实有点狂∼好攰嘅周末，不但冇休过息，好似比平时更攰了。

      寻日係返学校办毕业攞证嘅日子。呢一日，足足盼咗我半年有多，原本以为自己可以好洒脱。但原来离开咗先发现，有几唔舍得。

      天气几炎热冇所谓、排队等咗好耐都ok...虽然可以讲折磨咗一日，不过仍然希望可以留多阵。返到学校，第一时间揾厕所，点知就去咗红蓝个厕所。记得以前某人成日送我返宿舍都係兜嗰度走。落返嚟见到Grass，肥咗又黑咗，望咗下铺头，又谂返最后一个学期疯狂嘅日子。有某人嘅日子与冇某人嘅日子。到咗F栋，见到好多人排队，又想见到某人又惊见到某人嘅心十五十六。搞掂晒，我哋仲去咗长驻饭堂小东北。食咗好耐冇食嘅"盏搞"...哈哈∼

      返到学校，每个地方都充斥住某人嘅味道，周围都好似係某人嘅影子咁。大概係咁，所以对嗰度既向往又害怕吧...

      不过以后都唔使再同某人有任何关连了，毕业意味住我同佢嘅距离係千里万里，大缆都扯唔埋了。希望大家都有好结果吧，对于某人发过嘅誓，已经过咗限期了。虽然佢从一开始就违背咗个誓言...但係，耿耿于怀喺我心入面嘅恨到此为止吧。

      一切都结束了...

      今日最高温度36℃。

      唔知係高温嘅影响，定真係好"盟憎"...成日个人都好燥。冇点出声讲嘢，亦都冇意欲要做。所以做错咗唔少嘢，虽然都唔係咩大问题。个脑转得特别慢，蠢蠢钝钝咗一日。我唔知係咪因为咁，好似宁舍唔得人中意咁。然而我都冇心载在佢哋嘅谂法了，净係想早啲放工返屋企摊。

       结果今日真係好早，6点半多就返到屋企了。

      又係今日。今日係传统嘅端午，我休息。原因唔係因为端午唔使返工，只係我请咗两日学原定呢两日返学搞毕业，结果听日先返咁。

      一早，亚妈就应节咁整咗只粽过我食，但係我就问点解要整枧水呀??亚妈好出奇咁问返我，你以前唔係好中意食嘅咩...我就喺度谂，点解我以前中意嘅嘢已经唔中意呢∼可能係我变咗了。以前中意嘅，而家未必中意；相反，以前唔中意嘅，而家都未必讨厌咁∼

      听日就要返学校啦，其实冇乜感觉架。今日Grass俾电话我，听到佢把声，又好似以前返紧学嘅时候咁。有时都好怀念下架∼但係反而出咗嚟做嘢，仲识多咗培商嘅人，好似同我同班嘅绮雯啦，两个一齐培训嘅师兄啦，仲有柳翔添...

      好快，听日之后嘅培商又成为过去啦。听日要好好望真老培...

      前晚瞓到半夜，突然收到条sms，话我QQ密码被修改。吓到半条命都冇∼

      即刻叫斌少帮我上去改密码，寻晚终于又重装过部机啦。原来部机係中毒已深，全部都係盗号木马，好在医得佢早呀!!哈哈∼突然先发现原来我个QQ对我嚟讲好重要。

      星期日係爸爸节，陪爸爸食饭，之后就去咗整头发啦。个头係我前所未有嘅贵∼唔明。整完头MC仲请我食饭，好在只衰嘢帮我悭返餐饭钱。仲有斌少后尾都嚟咗...食完仲同斌少去咗北京路，又买咗对鞋，不过都唔错嘅。行到好夜先返屋企添∼