今日好大雨，大到好唔真实。虽然係周末，但心情好沉重，唔知点解。

      对于爱情，早就抱住哀莫大于心死嘅心情对待。但点解不幸连我嘅朋友都唔放过??

      师兄中意嘅女仔，偏偏喜欢中意暧昧关系，迟迟唔肯确定关系。这边厢就朋友前朋友后，那边厢却做出啲令人误会嘅举动。如今有个女朋友投怀送抱，却唔係自己真心中意的。又有咩用??难道爱有错吗...点解好似好难求得完满。

      最好嘅姊妹莎姊，今日同男朋友分手了。个男嘅正贱人!!贪新厌旧，有咗第二个???曾经自己经历过嘅，可以唔知道有几痛苦咩∼莎姊，对唔住，今晚陪唔到你係我嘅错。

      乜嘢係爱情∼我已经好耐冇必要去参透，不过佢将好多人玩弄于股掌。呢种不幸嘅感觉几时先可以结束...??

      发觉一个星期入面，心情都会好极端。今日破晒记录，做咗340笔!!冇啦啦又叫我上柜台，除咗入工资，入侨汇，今日又要付支票，买基金。好多好多嘅嘢做∼

      虽然忙到中午饭好晏先食，忙到冇点瞓到中午觉，忙到交咗箱先走得，不过过得比较实际。今日冇我最憎嘅芳姊，不过就有我最爱嘅芹姊!!但仍然有我好憎嘅人，就係周行。讲起佢，俾个火都唔够，石油气就差唔多。我喺屋企都冇人叫到我做嘢架，落班前叫我去扫地喎∼你妈!!我超级有礼貌应咗佢一声"哦"，之后就攞起只袋走人啦，睬佢都有味呀。讲嘢句句都有骨架，仲使我去买雪糕喎，真係觉得自己做人做得好卑微呀!!

      今日虽然做咗340笔交易，不过就冲咗4笔账，连芹姊话要赞下我嘅话后尾都收返。哈丷∼芹姊好可爱。

      听日终于又捱到周末了，可以休息下啦。直至今日收市为止，买嘅基金已经赚到条levis啦，哈丷∼令人振奋呀。

      今日算係呢个星期最开心嘅一日。所谓嘅开心，只係觉得实习生活冇咁郁闷罢了。

      人情冷暖，边个对你好，边个对你差，其实好明显啫。虽然平时都仲係做入下侨汇，开下单呢啲闲所嘅工作，不过真係好多谢芹姊∼佢好撑我，我入账嘅时候，永远係佢山长水远帮我拉卡；好读嘢佢都委任我做，好似清机、开挂账单、揾侨汇...平时係同佢感情比较好，又讲得笑。最爱芹姊了∼有佢上班嘅一日，我先有动力。

      仲有许颖，即係亚哥，佢平时点我做得最少嘢，份人又搞笑，又抵谂，喺银行入面人缘好好。最近对佢有咗好感了，哈丷∼尤其係佢嘅生日，11月11号，佢个身份证号码係我记得嘅第三个男人嘅身份证号码，哈丷。

      海宁一样好好人，大我两年吧，係大堂经理。一直就觉得佢份人好相处，傻大姊，虽然有时都会叫我帮佢做嘢，不过就揾借口帮我"吞啵"。

      其实慢慢发现，人还是有各自的优点的，只要向好处想。

      喺姑姊嘅带协下，今日约埋斌少去咗做个普通座谈会，赚咗200几蚊。哈丷∼不过搞笑嘅係，因为有呢啲奸着数嘅活动，所以全家总动员，去到座谈会先发现家姊、未来姊夫、姑妈仲有表哥都喺度，真係济济一堂呀!!

      斌少又见到之前培训嘅朋友，成村人都识嘅。哈丷∼不过我就净係签个名，攞咗钱就可以走人。但係斌少就要开个简单嘅会，需要个几钟。结果我就一个人喺中华间starbucks等咗佢成个钟。攞到赚到嘅钱，就去咗买衫，多谢斌少送咗半件衫俾我。哈丷∼不过佢仲买咗只新表，白色，好靓架。

      之后又去咗仙仔食饭，最后去埋吉之岛买嘢，完成咗一日嘅行程。

      今日行去车站时，居然见到陈涛，肥咗好多，变咗个靓嘅肥仔。唉∼ 结果令我谂到<瘦身男女>华叔嘅造型，滴汗呀!!

      中意听返首<终身美丽>，入面有句歌词：当你知己才是虚伪。

       今日，终于忍唔住，喊咗。喺银行返工，真係好辛苦，一啲人情味都冇。虽然我只係个实习生，冇咩地位，俾人点下做下嘢我冇怨言。但係今日，好过分。

       成日俾人叫去入下侨汇、入工资嗰啲已经觉得好难受，仲要逼我去啲会计窗入，要主管授权又远。所以今日又俾个芳姊，讲咩要去到咁远拉卡，行死我咩...我心谂，咁叫咩我入帐啫!!有病架∼

       之后又叫我去第二个窗度入，因为今日亚珊请假，所以空咗个窗出嚟。点知部打印机又神咗，黑到爆呀!!个芳姊仲叫我自己一个搬部神咗嘅打印机去理财室换过部出嚟，搬都唔係问题，起码揾个人帮下我挂。完全冇人理你生定死架，真係觉得好委屈呀!!入到理财室，换过部打印机出嚟之后，又发现个插头唔啱，又叫我搬返去换返。就咁，来来回回咗5次∼到后尾要入嚟嘅时候，冇人帮我开门。于是就去咗厕所喊了。

       喊完我都唔知咁辛苦为乜。虽然后尾入返去之后，大家态度都好咗好多，都知道我唔开心，所以唔敢再点我做嘢。但係一度搞到我好想放弃呢份工呀!!

       最近，个个都话唔想做，因为好辛苦。不过谂深一层，就算去到第二度做嘢，咪一样要从低做起，受人气。

       今晚，约咗莎姊出嚟，讲咗好多大家嘅辛酸史。个人都松咗好多，冇再咁抗拒份工。不过做咗嘢先知道，原来好多嘢都要自己承受，自己捱，冇人帮你，同时人哋肯唔肯帮你都係一个问题...