今日，全部窗开齐，不过冇我份上柜。因为斌哥今日做返会计，而Tracy都顶返柜台个位。但係，今日嘅侨汇超级多，49笔，更不幸嘅係啲客开咗5个窗都做唔完。结果我去咗个会计窗度帮手入咗49笔嘅侨汇，连埋写好单。虽然好痛苦，亦都好忙碌，不过好过瘾...

      就係咁样，每日都做50笔倒，就好满意。

      今日发生件好不幸嘅事，就係那个我痛恨嘅某人，居然揾我。话可唔可以做返朋友，我冇理佢，佢发返条sms话冇兴趣就算，打搅晒?!

      我是招谁惹谁??真係有病架..！

      唔明点解会爱上佢。

      今日，第一次自己坐上柜台，做咗50笔交易。其实唔算交易，因为冇对外。不过就係用自己嘅柜员卡同私章，完成晒今日嘅侨汇。觉得好兴奋∼

      坐上台，先知自己究竟边度要改进，边度要保持，边度要多多学习。工作好似有咗起色，不再係枯燥乏味嘅复印、递单。寻晚几次干杯，"工作顺利"、"通过考试"...希望全部都开口中!!

      今日好感谢所有同事。一直以为佢哋好忽略我，当我亚四咁使。但係，我上台之后，佢哋好照顾我，有咩都即刻同我讲，帮咗我好多。就连个芳姊，同样令我好感动。

      今日好夜先走，第一次交晒箱先走。虽然好攰，不过比起前排嘅工作态度，变得积极多了。突然醒起，5.1去HK嘅时候，喺地铁居然有人问我路，当时我嘅感觉真係莫名其妙∼就同而家嘅心情一样，做嘢做到莫名其妙嘅兴奋。

      5.1最后嘅一日。招ed培训班终于搞咗次聚会，呢次更多人参加，除咗平时玩得埋嘅之外，仲多咗云姊、亚云、亚lee、东磊同光哥添。济济一堂，数数下有十几人，真係好开心。讲晒做嘢啲辛酸史，不吐不快呀!!

      饮饮食食，好快就喺利华消磨咗两个几钟。原本打算有下场，点知死人文哥、中哥同光哥自己揾节目，飞低咗我哋。所以我哋都觉得冇瘾，各自返屋企咯。

      真係好挂住培训嘅日子。我怀念的....

      今日，原本只係打算去剪个头发。不过俾莎姊同小鱼召咗出去唱K，所以又冇返屋企食饭。5.1假期都好似未喺屋企食过饭..

      去咗红点唱K，环境好好，最中意咁样嘅K场。而且歌都好新，大解歌瘾呀!!原本唱K仲话要3只女人仔去睇<十分·爱>，点知好辗转都係睇唔到，变咗食嘢团。不过3个女人1个墟，哈丷∼

      Go'相册...

      今日睇咗林狗嘅<是但噏·踎低喷饭>，觉得真係好搞笑，将而家社会、娱乐圈、政治嘅热点话题摆上舞台，变成搞笑又有深度嘅栋督笑。一个字"掂"∼

      今日仲睇咗杨丞琳出同志片<刺青>，同"踎低喷饭"好唔同。就係好无聊，俾我嘅感觉好似讲到而家社会好堕落，什么web-girl、什么刺青的。唉，虽然现在嘅社会确实改变，也不至于咁折堕吧。

      其实假期，冇非唔係出街就係喺屋企hea下。不过假期，反而让我觉得好怀念某人。好想知道某人现在嘅一切，佢呢排究竟忙乜、做紧乜嘢、仲有就係同紧边条女...好似一直生活喺佢嘅影子之下。

      5.1仲係有开心嘅消息，姊姊终于情花开，有得拖手仔啦。学斌少话斋，久旱逢甘露呀∼哈丷。真係好希望姊姊可以同佢个白羊拖耐啲，激情之后又可以细水长流!!