考试、又要返工。呢个星期真係好忙呀∼ 考试就应该冇问题嘅。不过喺银行真係好心淡呀，最让我心淡嘅係师傅。佢係我最尊敬、最崇拜嘅人，居然成日俾面色我睇。谂到都觉得辛苦呀!!

      呢2日索性少理，中午准时食饭，瞓到2点再上去问下有咩做，冇嘢做就坐喺师傅后面发吽豆。我做嘢都算扑心扑命啦，个个叫我做嘢我都落足百二分力。但係前日睇邮件，有关实习生跟踪评估，好奇入咗去睇下。点知个行长俾个分真係见到都心寒啦∼平时扮咩好人啫，笑面虎。出咗嚟做嘢，先知咩叫假呀!!假情假意∼

      男人又係。最近睇<溏心风暴>，觉得林夆好过分，居然连女朋友嘅好朋友都搞。何必啫∼唔中意就分手啦，出轨真係好可耻嘅行为。极度厌恶呀∼救命!!憎到自己心都痛埋添。

      又係一个星期嘅开始。一开始就好忙、好忙∼今日因为要入工资同侨汇嘅关系，做咗170笔交易。好多好多，个封包都好厚好厚。虽然真係好忙，好辛苦，不过一做起嘢嚟就宁舍有动力。搞掂好晒之后，又同主管清机，有时会觉得呢班前辈真係使得就使...不过算啦，新丁就预咗俾人使。

      寻日食饭时同表弟讨论过levi's。讲真好怪，以前读初高中嘅时候，边识咩牛仔裤喎，求其百几蚊条就觉得好贵。但係只要一上咗大学，自然就有时间，有金钱花费喺呢啲部分。成千蚊条牛仔裤都觉得值∼

      听晚要过长堤考试，有关柜员业务，考笔试。叠资料5.1前就印咗，不过呢两日先开始复习。目前为止先睇咗一半，听晚点考试呀??又要加油喇，做得银行就预咗。

      今日母亲节，同亚嫲姑姊佢哋中午出咗去食饭。

      前2日，已经俾咗钱妈妈祝佢母亲节快乐。明显佢好开心，所以呢两日对我都唔错。只要唔使同佢嗌交就已经好好。

      食完饭返到屋企，好无聊。摊咗喺度睇电视，结果发现有<金三顺>连播，好开心。睇咗一个下午，觉得玄斌好靓仔，不过喺出戏度就太唔好了，因为佢唔够专一，左摇右摆，唔知道自己中意边个，好唔要得!!睇完之后，又入房睇亚rain出<爱上绝食女友>，净係可以用傻更更嚟形容部电影。真係睇唔明，而且成百分钟，睇到我好眼瞓，好在有亚rain嘅招牌笑容提神。

      呢两日真係冇乜心机，今日听到首歌at17 - 你好吗...

      "在那天，为你哭过恨过；在那天，留了下伤心的我；当初的一切，重逢时别再讲它...

        在这天，若你竟挂念我；在这天，摇电话给我；知不知道，愁绪仍在天天增加..."   

      呢个星期返咗4日工，但就觉得特别攰。

      寻晚12点就落床，好快就瞓着。感觉特别好瞓，但成晚都死咁发梦，大概内容就唔记得，不过基本上都係某人!!救命∼瞓醒已经9点几...

      习惯性地，冇街出就一定睇电影。比较开心嘅係终于睇晒<死亡笔记>上下篇，真係好好睇，就算个结局夜神月同Ｌ都死咗。人心难测，其实猜心者都未必卑鄙。哈丷∼

      仲有rain出<爱上绝食女友>未睇，我要喺呢个周末搞掂佢!!

      返工变成咗每日嘅挑战，亦都变成每日唔会谂某人嘅地方。

      今日，比寻日又做多咗交易了。仲俾行长召咗入理财室做大客交易添，又专登俾个窗我做基金、入账、侨汇同唔做现金嘅交易。由朝忙到黑，今日7点半先走得。每日返到屋企都已经8点多。不过一个人静低，又会乱谂。

      好多谢关心我嘅人，其实寻晚莎姊讲得啱，佢揾我我係高兴的。不过佢嘅态度真係好有问题。记得4.5个月前，玩塔罗牌时问嘅问题，虽然实现咗，但却唔係我所希望的。想到某人，就心烦!!

      确实唔够绝，如果自己可以做到"宁愿我残忍，抛低这男人"呀!!