今晚，同莎姊、Yan终于有时间约出嚟聚聚。见返一齐住咗2年嘅同室密友，鸡啄唔断咁讲讲讲。做喺六本木度，又係影相又係倾计，时间过得好快。

      自从大家做嘢之后，莫讲话聚下，就连倾下计嘅时间都冇。难得嘅假期，就算係短短嘅时间，都约出嚟食下饭倾下计。

      相册有更新了...

      2号一早，赶到火车东站，一个人搭上咗去HK嘅火车。一个人，真係好惊。

      经过咗2个钟嘅折腾，终于见到27号就到咗HK嘅爸爸。好快，就到咗旺角...买咗好耐都睇唔啱，因为要买鞋。不过最后都买到好想买嘅air force，新款，净係可以讲好sharp，但就冇话好中意∼先买咗一样嘢，爸爸就带咗我去同一班叔父朋友饮茶。最讨厌呢种场合了!!

      2点饮到4点几先肯下场，之后分道扬镳，我同爸爸去咗尖沙嘴嘅新世界中心。我冇买到嘢，而爸爸就买咗对鞋。原本打算即日来回嘅我，因为爸爸话留多日，所以就去咗酒店了。晚黑，同埋阿姨3个人去咗食我最爱嘅寿司。唔知咩原因，觉得HK嘅寿司特别好食，不过埋单就几吓人。食完嘢，去咗铜锣湾间时代广场，见到好多我一直梦寐以求嘅牌子。咩D-mop、evisu、gucci、Y-3...睇到都唔想行呀!!

      行到10点半先走，仲坐"叮叮"车返酒店添。

      第日瞓到11点先起身，之后又好辗转咁去到咩杏花邨间稻香饮茶。不过觉得啲嘢好好食。最后临走前，去咗万宁买咗好多垃杂嘢先踏上归途。

      2日1夜嘅行程，好赶。虽然冇买到咩大收获嘢，得对鞋同几件衫，不过就吸收咗好多丰富眼球嘅嘢，不得不提嘅係HK真係好多靓仔呀∼哈丷。

      5.1长假终于开始。捱咗8日，连续返工冇抖过，真係好辛苦。

      寻晚同斌少去咗行街食饭，呢个月佢啱攞咗份粮，就叫我帮眼买礼物俾佢妈妈。最后决定买表，铁达时。拣咗好耐，买咗只600几蚊嘅。喺男人之中，佢係我识得最孝顺嘅男人了。仲买咗4粒，每粒价值8大元嘅朱古力俾我食，虽然俾想象中苦，但又几甜。之后去咗益生馆点菜食饭，好有住家feel，以后都要去∼其间讲起只tough嘅银包，係大一嗰时，斌少第一份工，第一次出粮送俾我嘅生日礼物，我哋一齐买咗两只，而佢嗰只仲用到而家，但我嗰只已经送咗俾一个冇良心嘅贱人。真係好挂住佢--只银包。

      今日一早就好好太阳，决定将之前堆堆埋埋嘅衫攞晒出嚟洗，又睇晒之前down咗但未得闲睇嘅<康熙来了>。就咁样一日简简单单，已经觉得好满足。其实生活咪就係但求简单平凡之嘛。

      呢两日，有个男明显缺爱嘅表现，觉得好唔习惯。睇见身边有情人嘅朋友，为咗对方要生要死、刀仔吉大脾咁。面对爱情我宁愿选择逃避，亦都冇意思要再投入一段感情嘅冲动。如果有，大概就係好事近了。哈丷∼

      短期内，最理想生活...就係可以融入工作中嘅人和事，同一班朋友保持联系，每星期可以同斌少行街食饭，基金赚到钱!!

      本来今日上班仲係心情好好的。但唔点解，返到去就觉得辛苦。

      今日有人嚟检库，车嚟嘅时候，大家都好忙，但除咗我之外。芳姊係今日嘅主管，负责开箱。我本来就係好易嬲嘅人，佢名都冇叫声，净係"喂"咁叫我递把铰剪俾佢，我已经好唔妥，就算你係长辈又如何。递到俾佢又话我扎住个柄，把铰剪会整亲人，弹咗句"边有人咁样递铰剪架"∼我冇晒声出，企喺师傅后面生闷气。

      又係一阵委屈。其实我都已经有柜员卡，私章都有，不过仲留喺行长度。点解行长迟迟唔俾个私章我啫!? 我都係实习生啫，点解人哋冇我冇∼真係好唔公平。我唔想每日再帮人复印、复印再复印呀!!

      今日成个人好冇心机，坐喺师傅后面一直好少出声。我觉得我返去就好似虚耗时间咁。既冇嘢俾我做，自己又做唔到啲乜。

      今日请咗假，特登返培商交论文。其实今日斌少休息，佢陪我返。

      一早就落晒雨咁，几惊斌少唔肯陪我返。好在佢捱义气，仲唔使我出车钱，感谢佢呀∼不过迟到要我等係要不得的!! 去到车站，居然见到久未露面嘅伦明，但係却觉得差咗好多。大概係品位转变了，哈丷∼

      返到旧日嘅培商，桃花依旧，人面全非，见到嘅人冇个识嘅。就算识都係算知道而已。其实今日经过Grass铺头，隔住好多层障碍物，依稀见到旧面孔，不过就光咗头，肥咗好多咁。见到呢个势，冇勇气过去相认了。

      唔使个半钟，就搞掂晒交论文嘅过程。仲同徐峰闲聊咗几句。

      因为晚上仲要返银行开个关于保险嘅会，所以匆匆告别咗培商了。不过临行前上咗宿舍一趟，救命!! 成个墟咁，黑板仲公告我哋室有3个月未交水电费...

      斌少因为我要开会，返到三元里，佢就赶住去佢姨妈度食饭。我亦都赶返银行了。

      晚上，开咗个好有趣味嘅会。讲课嘅经理係一名有经验、有口才、有智慧嘅中年男人，叫Gary。我心入面暗暗称呼佢Uncle gary。会上，佢同我哋玩咗三个游戏，从游戏中带领我哋如何认识保险业，甚至係银行业。记得斌少入中国电信培训嘅时候，类似讲过，只有唔好的服务，没有不对的客人。大概就这样意思吧。

      9点才回到家，习惯早出晚归的生活了。